كونفەرەنتسيا جۇمىسىن تاريح عىلىمدارىنىڭ دوكتورى, م.قوزىباەۆ اتىنداعى سقۋ پروفەسسورى اقمارال ىبىراەۆا اشىپ, جۇرگىزىپ وتىردى. قۇرمەتتى قوناقتار قاتارىندا قازاقتىڭ تۇڭعىش عارىشكەرى, كەڭەس وداعىنىڭ باتىرى جانە حالىق قاھارمانى توقتار اۋباكىروۆ, قازاقستاننىڭ ەڭبەك سىڭىرگەن ساۋلەتشىسى سەرىك رۇستەمبەكوۆ, «دۇنيە ءجۇزى تۇركى حالىقتارىنىڭ كونگرەسى» قوعامدىق بىرلەستىگىنىڭ پرەزيدەنتى ارمان اقمۇقانوۆ, ل.ن.گۋميلەۆ اتىنداعى ەۋرازيا ۇۋ پروفەسسورى سەرىك نەگيموۆ, شوت-امان ءۋاليحانوۆتىڭ قىزى بايان ءۋاليحانوۆا جانە ت.ب. بولدى.
العاشقى ءسوز وبلىس اكىمىنىڭ ورىنباسارى عاني نىعىمەتوۆكە بەرىلىپ, ول وبلىس اكىمى قۇمار اقساقالوۆتىڭ قۇتتىقتاۋ ءسوزىن وقىپ بەردى. «ومىردەن وزعانىنا ءبىر جىلدان اسقان اتاقتى جەرلەسىمىز شوتا-امان ءۋاليحانوۆ ارتىنا وشپەس ءىز قالدىرعان جان. ءبىز ونى تاماشا ارحيتەكتور, بەلسەندى قوعام قايراتكەرى, ەلتاڭبامىزدىڭ اۆتورى رەتىندە ارقاشان ماقتان ەتىپ, قۇرمەت تۇتامىز» دەلىنگەن قۇتتىقتاۋدا.
وسىدان كەيىن ءسوز توقتار اۋباكىروۆكە بەرىلدى. ول ءوزىنىڭ شوتا-امان ۋاليحانوۆپەن العاش تانىسقان ساتىنەن قىزىقتى ەستەلىك ايتىپ بەردى. «1991 جىلدىڭ قازان ايىندا «سويۋز تم-13» كەمەسىمەن عارىشقا ۇشاردا ءبىر توپ قازاقستاندىق بايقوڭىرعا كەلىپ, ءبىزدى شىعارىپ سالدى. سونىڭ ىشىندە شوتا-امان ءۋاليحانوۆ اعامىز دا بولعان ەدى. ول ماعان قازاقستاننىڭ بولاشاق ەلتاڭباسىنىڭ سۋرەتىن كورسەتىپ, ءوزىنىڭ وسى جوبامەن ۇزاق جىلدار بويى اينالىسىپ جۇرگەنىن, ەندى سونى وزىممەن بىرگە عارىشقا اپارىپ كەلۋدى وتىنەتىنىن جەتكىزدى. گەربتىڭ جوباسى قاتتى ۇناعانى سونداي, مەن ونى ءوزىمىزدىڭ باسشىلارىمىزعا كورسەتىپ, قازاق ەكيپاجىنىڭ سيمۆولى قىلۋدى ۇسىندىم. ولار قارسى بولمادى. ءسويتىپ, گەربتىڭ جوباسىن عارىشقا شىعارىپ كەلگەن ەدىم. كەلگەن سوڭ جوبانى شوتا-امان اعامىزدىڭ قولىنا تاپسىردىم. كەشىكپەي ەلتاڭبانى تاڭداعان كونكۋرستا وسى جوبا جەڭىپ شىعىپ, قازاقستاننىڭ رامىزىنە اينالدى. شوتا-امان اعامىز ونىڭ عارىشقا شىعىپ كەلگەنىن ارقاشان قۋانىشپەن ايتىپ, «ونىڭ جولىن سەن اشتىڭ» دەپ ماعان ريزاشىلىعىن ءبىلدىرىپ وتىراتىن. ول ءوز حالقىنىڭ ناعىز اينىماس پاتريوتى ەدى», دەدى ول.
قازاقستان ساۋلەتشىلەر وداعىنىڭ توراعاسى سەرىك رۇستەمبەكوۆ, سولتۇستىك قازاقستان مەملەكەتتىك ءارحيۆىنىڭ ديرەكتورى ساۋلە مالىكوۆا, سونداي-اق ارمان اقمۇقانوۆ, بايان ءۋاليحانوۆالار دا تاماشا ەستەلىكتەر ايتتى. ال سەرىك نەگيموۆ «ش.ءۋاليحانوۆتىڭ عۇمىرناماسى مەن عىلىمي كوزقاراسى», KAZGOR جوبالاۋ اكادەمياسىنىڭ پرەزيدەنتى ايدار تاتىعۇلوۆ «ش.ءۋاليحانوۆتىڭ KAZGOR-مەن شىعارماشىلىق بايلانىسى», وسى ۇيىمنىڭ باس ساۋلەتشىسى توقتار ەراليەۆ ش.ءۋاليحانوۆ تۋرالى ەستەلىكتەر, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى مۇحامبەتقالي بۇركىتباەۆ «ش.ءۋاليحانوۆ ءومىرىنىڭ ونەگەلەرى», ءال-فارابي اتىنداعى قازاق ۇۋ پروفەسسورى گۇلنار مۇقانوۆا «ش.ءۋاليحانوۆ شىعارماشىلىعىنداعى ۇلتتىق جادىگەرلەردى جاساۋشىنىڭ ءستيلى» دەگەن تاقىرىپتاردا باياندامالار جاسادى. بارلىق بايانداما جينالعان قاۋىمنىڭ قىزىعۋشىلىعىن تۋدىرىپ, شوتا-امان ءۋاليحانوۆتىڭ ءومىرى مەن شىعارماشىلىعىنىڭ قازاقستان رامىزدەرىن جاساۋعا قوسقان ۇلەستەرىن ايقىن پاش ەتتى.
كونفەرەنتسيانىڭ سوڭىنان «شوت-امان ءۋاليحانوۆتىڭ شىعارماشىلىق مۇراسى» اتتى جەتى تومدىق جيناقتىڭ تۇساۋى كەسىلدى. سونىمەن بىرگە سولتۇستىك قازاقستان ءوڭىرىنىڭ ونەگەلى تابىستارىنا ۇنەمى ءۇن قوسىپ جۇرەتىن جانە رامىزدەر تۋرالى بىرنەشە تانىمدىق ماقالالار جازعان پروفەسسور سەرىك نەگيموۆكە «سولتۇستىك قازاقستاننىڭ قۇرمەتتى ازاماتى» اتاعى بەرىلدى.
