قازاقتىڭ عاجايىپ سۋرەتشىسى باقىت باپىشەۆتىڭ شىعارماشىلىق قولتاڭباسى 1980 جىلداردا ەرەكشە ءۇردىس الدى. تۇركىلىك پونتەيزم, كوشپەندى الەمى جانە ولاردىڭ ويلاۋ جۇيەسىن ءوز كەنەبىندە ميفتىك ەلەمەنتتەر ارقىلى شەبەر جازدى. باتىستىڭ ابستراكتىلىك ءتىلىنىڭ كوركەمدىك قۇندىلىعىن ۇلتتىق ەرەكشەلىكتەرمەن اسپەتتەپ, ءداستۇرلى ويلاۋ جۇيەسىنە سالىپ, مەتافوراعا نەگىزدەلگەن سيمۆولدىق شەشىمدەر قابىلدادى. مۇنى «اي استىنداعى اعاش» كارتيناسىنان-اق اڭداۋعا بولادى.
اتالعان تۋىندىدا ءتورت بۇرىشتى فورماتتا تۇنگى اتموسفەرادا جايقالعان جالعىز ءتۇپ جاس اعاش بەينەلەنگەن. فون قارا تۇسپەن بەرىلىپ, اعاش فورماتتىڭ قاق ورتاسىنا تاستان قالانعان دۋالدىڭ جوعارعى جاعىنا ورناتىلعان. جاس اعاشتىڭ ءدىڭى تىك ءبىتىپ, بۇتاقتارىمەن كەنەپتىڭ جوعارعى جاعىنا تىرەلىپ كەنەپ بەتىندە قىسىم تۋدىرىپ تۇر. قاپ-قارا اسپاننان ايدىڭ ءوزى دە, ايدى تۇسپالدايتىن جارىق تا كورىنبەيدى. تەك اعاش جاپىراقتارى مەن دۋال بەتىنە تۇسكەن سارعىش, قىزعىلت تارتقان بوياۋ رەڭىنەن ءتۇننىڭ ايلى ەكەنىن تۇسپالداپ بىلەمىز.
جان-جاعى تىك ءتورتبۇرىشتى ءپىشىن قۇراپ قالانعان تاس دۋالدىڭ ىشىنە ەگىلگەن مۇنداعى اعاش جاساندى وركەنيەتتىڭ نەمەسە تاريحي تامىرىنان, وزەگىنەن, جەرمەن تىكەلەي بايلانىسىن بىلدىرەتىن نەگىزىنەن اجىراعان بۇگىنگى مادنيەتتىڭ, ۇرپاقتىڭ سيمۆولى ىسپەتتەس. اعاش جاپىراقتارى دا جاساندى گۇلدىڭ جاپىراقتارى ءتارىزدى بىردەي كولەمدە جەتىلىپ, جارقىراپ تۇر. ونىڭ ءمىنسىز تىك بىتكەن ءدىڭى تۇنگى اسپاننىڭ ورتاسىنا ءسىڭىپ اسا بىلىنبەي بەينەلەنسە دە ءوزىنىڭ مىنسىزدىگىمەن اربايدى...
سۋرەتكەردىڭ شىعارماسىنداعى جاس ءتۇپ جاساندى جولمەن وسىرىلگەنى سونشالىق, تابيعي نەگىزى جوق ءتارىزدى. بۇل ءوز جەرىڭدە بۇرشىك اتىپ, گۇل جارعانىڭىزبەن, وزگە مادەنيەتتىڭ قىسىمىندا تاربيەلەنگەندىكتەن تامىرىڭىزبەن تامىرلاس جەمىس بەرە المايتىنىڭىزدى ايتىپ تۇرعانداي.
