سانيتارلىق-ەپيدەميولوگيالىق باقىلاۋ كوميتەتىنىڭ مالىمەتىنشە, جازدىڭ ءبىرىنشى كۇنىندە شومىلۋ ماۋسىمى رەسمي تۇردە اشىلادى جانە ول قىركۇيەك ايىنا دەيىن جالعاسادى. دەگەنمەن سۋعا تۇسپەس بۇرىن ول جەر شومىلۋعا قاۋىپسىز ەكەنىن انىقتاپ العان دۇرىس.
جاعاجايدىڭ ءتۇبىن الدىن الا تەكسەرىپ, سونداي-اق توتەنشە جاعدايدا كومەككە كەلەتىن ادام تابىلاتىنىنا كوز جەتكىزىپ بارىپ شومىلۋ كەرەك. وتباسىنىڭ قاۋىپسىزدىگى ءۇشىن ارنايى شومىلۋ ورىندارىندا دەمالعان دۇرىس.
«نۇر-سۇلتان قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى جازعى كەزەڭدە قالا شەگىندە ورنالاسقان, ونىڭ ىشىندە شومىلۋعا جانە دەمالۋعا ارنالعان ورىن رەتىندە پايدالانىلاتىن اشىق سۋ قويمالارى سۋىنىڭ ساپاسىنا مونيتورينگ جۇرگىزدى. زەرتحانالىق زەرتتەۋ ناتيجەسى بويىنشا ەسىل, اقبۇلاق, سارىبۇلاق وزەندەرىنەن جانە نۇرا-ەسىل كانالىنان الىنعان بۇكىل سۋ سىناماسىندا سانيتاريالىق-حيميالىق كورسەتكىش بويىنشا سايكەسسىزدىكتەر انىقتالدى. اتاپ ايتقاندا ءتۇسى بويىنشا - 2,71 ەسە, تەمىر مولشەرى بويىنشا - 2,3 ەسە جانە وتتەگىن حيميالىق تۇتىنۋ بويىنشا - 1,87 ەسە نورمادان اسىپ كەتتى», دەپ ءمالىم ەتتى كوميتەتتەن.
شومىلۋدان كەيىن جاعىمسىز سالداردىڭ الدىن الۋ ءۇشىن قاراپايىم جەكە گيگيەنا ەرەجەلەرىن ساقتاۋ كەرەك, ياعني مۇمكىندىگىنشە تەزىرەك گيگيەنالىق دۋش قابىلداپ, ەشقانداي جاعدايدا سۋ قويمالارىنان سۋ ىشپەۋ كەرەك. بەلگىلەنبەگەن جەردە شومىلۋ ءوزىڭىزدىڭ جانە جاقىندارىڭىزدىڭ دەنساۋلىعىنا قاۋىپ توندىرەدى.
«بەلگىلى ءبىر جەردە شومىلىپ, دەمالۋ ءۇشىن سۋ ايدىندارىنداعى سۋدىڭ ساپاسىن وندىرىستىك زەرتحانالىق باقىلاۋدى قامتاماسىز ەتۋ بويىنشا قاجەتتى جۇمىستار جۇرگىزىلگەن ايماقتاردى عانا تاڭداڭىز. بۇل سىزگە دەنساۋلىعىڭىز ءۇشىن ەش ۋايىمداماي, تولىققاندى, ساپالى دەمالۋعا كەپىلدىك بەرەدى. سونداي-اق سۋ قويماسىندا شومىلۋعا تىيىم سالاتىن ارنايى اقپاراتتىق بەلگىلەرگە ءجىتى نازار اۋدارۋ قاجەت, دەپ ەسكەرتەدى ۆەدومستۆو.
