ورال قالاسىنداعى مادەني-اعارتۋ بىرلەستىگى مەكەمەسى ۇيىمداستىرعان بۇل تەاتر تويى قازاقستان رەسپۋبليكاسىنىڭ حالىق ءارتىسى, «وتان وردەنى» يەگەرى, كينو جانە تەاتر اكتريساسى ح.بوكەەۆانىڭ 105 جىلدىعىنا دا ارنالىپ وتىر.
تەاتر فەستيۆالىنە اقتوبە وبلىسىنان نۇرپەيىس بايعانين اتىنداعى تەمىر اۋداندىق مادەنيەت ءۇيىنىڭ جانىنان قۇرىلعان «امانات» جاستار تەاترى, اقتوبە قالالىق مادەنيەت ءۇيىنىڭ «اقتوبە» بالالار تەاترى, اقتوبە وبلىسى قۇرايلى مادەنيەت ءۇيىنىڭ «اLL-Art» بالالار جانە جاسوسپىرىمدەر تەاترى, اتىراۋ وبلىسى, قۇرمانعازى اۋدانىنان ونەرپاز اۋىلدىق مادەنيەت ءۇيى جانىنداعى «ورلى» حالىق تەاترى ۇجىمدارى ارنايى كەلدى. سونداي-اق باتىس قازاقستان وبلىسىنان سىرىم اۋداندىق مادەني-دەمالىس ورتالىعىنىڭ تەاترى, اقجايىق اۋداندىق مادەني-دەمالىس ورتالىعىنىڭ تەاترى, قاراتوبە اۋداندىق مادەني-دەمالىس ورتالىعىنان «Oscar» بالالار مەن جاسوسپىرىمدەر تەاترى, ورال قالاسىنان ماقاشەۆا تەاترى, دينا نۇرپەيىسوۆا اتىنداعى بالالار مۋزىكا مەكتەبىنىڭ ۇلكەن جانە كىشى توپتارى, «التىن وردا» بالالار مەن جاسوسپىرىمدەردىڭ قوعامدىق تەاترى, بارلىعى 150-دەن اسا بالعىن ونەرپاز قاتىسىپ جاتىر.
تەاتر فەستيۆالىنە قاتىسۋشى ۇجىمداردى ورال قالاسى مادەنيەت جانە تىلدەردى دامىتۋ ءبولىمىنىڭ باسشىسى سەرىك كايىرليەۆ قابىلداپ, جەتەكشىلەرگە ساتتىلىك تىلەدى. ال فەستيۆالدىڭ اشىلۋ سالتاناتىندا «جاستار مادەنيەت سارايىنىڭ « ۇلى دالا تويى» «الاش» ەتنو-فولكلورلىق ءانسامبلى, «سالتانات» بي ءانسامبلى ونەر كورسەتتى.
- مۇنداي ونەر دوداسى قالامىزدا تۇڭعىش رەت ۇيىمداستىرىلىپ وتىر. باستامامىزدى قولداعانى ءۇشىن ورال قالاسى اكىمدىگى مەن باتىس قازاقستان وبلىستىق مادەنيەت باسقارماسىنا العىس ايتامىز. تەاتر ونەرى كورەرمەندى سيقىرلى قيال الەمىنە تارتىپ قانا قويماي, حالىقتى ەستەتيكالىق تالعامعا, ادامگەرشىلىك پەن ىزگىلىككە تاربيەلەۋدىڭ اسا ماڭىزدى قۇرالى ەكەنى ءسوزسىز. جاس ۇرپاق الەۋمەتتىك جەلىگە كىرىپتار بولعان قازىرگى زاماندا وسىنداي بەلسەندى ونەردىڭ ماڭىزى وتە ۇلكەن. ءبىزدىڭ ماقساتىمىز – بالالار شىعارماشىلىعىن دامىتىپ, كورشىلەس وبلىستار اراسىندا مادەني بايلانىستى تەرەڭدەتۋ. فەستيۆالگە قاتىسىپ جاتقان بارلىق 11 ۇجىمعا ساتتىلىك تىلەيمىز, - دەدى ورال مادەني-اعارتۋ بىرلەستىگىنىڭ باسشىسى سەرىك توقمامبەتوۆ.
فەستيۆال ەكى كۇنگە سوزىلادى. سايىسقا ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا اكتەر, «قۇرمەت» وردەنىنىڭ يەگەرى ەدىل رامازانوۆ باستاعان قازىلار القاسى تورەلىك ەتۋدە. بولاشاقتا بۇل ونەر سايىسىن ەكى جىلدا ءبىر مارتە وتكىزىپ تۇرامىز دەيدى ۇيىمداستىرۋشىلار.
باتىس قازاقستان
