جاۋاپتى ۆەدومستۆو وكىلدەرى جەرگىلىكتى حالىقپەن كەزدەسىپ, كيىككە بايلانىستى وزەكتى ماسەلە كوتەرىلدى. سەبەبى ورال پوپۋلياتسياسىنداعى كيىكتەردىڭ سانى 800 مىڭنان اسقان دەسەدى. حالىق وسىنىڭ سالدارىنان جايىلىمدىق جەرلەردە ءتورت ت ۇلىككە ازىق قالمايدى دەپ الاڭداۋلى.
«كيىكتەردىڭ كوپتىگىنەن شارۋالار جاپا شەگىپ جاتىر. جايىلىمعا ميلليونعا جۋىق كيىك كەلسە, ەشقانداي دا ءشوپ قالمايدى. بۇلاردىڭ سانى ايتارلىقتاي كوپ. قالاي دا ازايتۋ كەرەك», دەدى جانىبەك اۋدانى كۇيگەنكول اۋىلىنىڭ تۇرعىنى بورانباي ايتقاليەۆ.
ەكولوگيا ءمينيسترىنىڭ ورىنباسارى كيىكتەردى اۋلاۋ ءۇشىن بيولوگيالىق نەگىزدەمە كەرەكتىگىن ايتتى. سونداي-اق ۆيتسە-مينيستر شىلدەدەن باستاپ وڭىردە ەرەكشە قورعالاتىن تابيعي اۋماقتار قۇرىلاتىنىن جەتكىزدى. وسى ارقىلى ورال پوپۋلياتسياسىنداعى 250 مىڭداي كيىكتى اتالعان اۋماقتا ۇستاپ تۇرۋ كوزدەلەدى.
«بۇگىندە رەسپۋبليكالىق ماڭىزى بار ەرەكشە قورعالاتىن تابيعي اۋماقتار قۇرۋ تۋرالى قاۋلى شىقتى. قاۋمالدىڭ اۋدانى 314 504,1 گەكتاردى, رەزەرۆاتتىڭ اۋدانى 343 040,1 گەكتارعا جەتەدى. ول باتىس قازاقستان وبلىسىنىڭ بوكەي ورداسى, جانىبەك, كازتالوۆ, جاڭاقالا اۋداندارىنىڭ اۋماعىندا ورنالاساتىن بولادى. مۇندا كيىكتىڭ 250 مىڭ باسىنا دەيىن ساقتالادى», دەدى ءا.شالابەكوۆا.
قازاقستان اۋماعىندا بەتپاقدالا, ورال جانە ءۇستىرت سياقتى كيىكتەردىڭ الەمدىك پوپۋلياتسياسىنىڭ 95%-دان استامى شوعىرلانعان.
