پارتيا توراعاسى كونستيتۋتسياعا وزگەرتۋلەر ەنگىزۋ بويىنشا وتكەن رەفەرەندۋمنىڭ اشىق ءارى دەموكراتيالىق ۇردىستەردىڭ ساقتالۋىمەن وتكەنىن ايتتى. سايلاۋشىلاردىڭ كەلۋى, داۋىس بەرۋ ناتيجەسى ازاماتتاردىڭ ناقتى تاڭداۋ قۇقىعىن, سونىڭ ىشىندە, وزگە پىكىردە قالۋ قۇقىعىن كورسەتەدى, دەپ سانايدى ازات پەرۋاشەۆ.
«رەفەرەندۋم ءوزارا سىيلاستىق پەن ساياسي پىكىرتالاستا سابىرلىقتى ساقتاي وتىرىپ, ازاماتتارىمىزدىڭ وزگە پىكىرلەرمەن ساناسۋى سەكىلدى قوعامنىڭ جاڭا ساياسي مادەنيەتىن ايقىنداپ بەردى. رەفەرەندۋم بارىسىندا ۋچاسكەلەردى باقىلاعان «اق جول» دەموكراتيالىق پارتياسىنىڭ وكىلدەرى سايلاۋ زاڭناماسىنىڭ قاتاڭ بۇزىلۋىن تىركەمەدى. تەك داۋىس بەرۋ ناتيجەسىنە اسەر ەتپەيتىن تەحنيكالىق اقاۋلار مەن سايلاۋشىلار تىزىمىندەگى بىرقاتار سايكەسسىزدىك بايقالدى. رەفەرەندۋم قورىتىندىسى تالاسسىز بولىپ تابىلادى جانە قازاقستان حالقىنىڭ مىقتى پرەزيدەنت, ىقپالدى پارلامەنت پەن ەسەپ بەرەتىن ۇكىمەتى بار مەملەكەتتى باسقارۋدىڭ جاڭا مودەلىن قۇرۋ باعىتىن قولدايتىنىن ايعاقتايدى», دەدى پارتيا توراعاسى.
سونداي-اق ول: «رەفەرەندۋم, سونداي-اق, پرەزيدەنت ق.توقاەۆقا جانە ءادىل مەملەكەت پەن جاڭا قازاقستان قۇرۋ جولىنداعى ميلليونداعان قازاقستاندىق ءۇمىت ارتىپ وتىرعان باستامالارىنا دەگەن قوعام سەنىمىنىڭ جوعارى دەڭگەيىن كورسەتتى. بىراق 5 ماۋسىمدا قازاقستان حالقى جول اشقان مۇمكىندىكتەردىڭ ءىس جۇزىندە جۇزەگە اسۋى ارقايسىمىزعا تىكەلەي بايلانىستى. بارلىق ازاماتتاردى, كاسىپكەرلەر مەن شەنەۋنىكتەردى, جاستار مەن زەينەتكەرلەردى, جۇمىسشىلار مەن شارۋاگەرلەردى, ءتۇرلى ۇلتتار مەن ءدىن وكىلدەرىن – شىن مانىندە جاڭا, ادىلەتتى قازاقستان قۇرۋعا شاقىرامىز», دەدى حالىققا ارناعان مالىمدەمەسىندە.
