تمد بايقاۋشىلار ميسسياسىنىڭ باسشىسى, تمد اتقارۋشى كوميتەتى توراعاسىنىڭ ءبىرىنشى ورىنباسارى – اتقارۋشى حاتشى لەونيد انفيموۆ, تمد بايقاۋشىلارى رەفەرەندۋمنىڭ 865 ۋچاسكەسىنە بارىپ بايقاۋ جۇرگىزگەندەرىن اتاپ, داۋىس بەرۋ پروتسەسى اشىق ۇيىمداستىرىلعانىن مالىمدەدى. «ۇلتتىق جانە حالىقارالىق بايقاۋشىلارعا داۋىس بەرۋ پروتسەسىن بايقاۋ ءۇشىن قاجەتتى جاعدايلار جاسالعان. رەفەرەندۋم ۋچاسكەلەرى اقپاراتتىق ماتەريالدارمەن جانە قاجەتتى جابدىقتارمەن جاراقتاندىرىلعان. رەفەرەندۋم جوعارى ۇيىمداستىرۋشىلىق دەڭگەيدە ءوتتى, قولدانىستاعى زاڭناماعا سايكەس ساياسي ناۋقاندى ۇيىمداستىرۋشىلار ازاماتتاردىڭ ەركىن ءبىلدىرۋ قۇقىعىن ىسكە اسىرۋ ءۇشىن ءتيىستى جاعدايلاردى قامتاماسىز ەتتى», دەدى لەونيد انفيموۆ.
اتاپ وتسەك, ميسسيا قۇرامىندا بارلىعى 144 بايقاۋشى بار بولسا, ولاردىڭ 6-ۋى ۇزاق مەرزىمدى نەگىزدە جۇمىس ىستەدى.
سونىمەن قاتار, تۇركپا بايقاۋشىلار دەلەگاتسياسى دا رەفەرەندۋم كوميسسيالارىنىڭ ءتيىستى رەسۋرستارمەن تولىق قامتاماسىز ەتىلگەنىن جانە مۇنداي ساياسي ءىس-شارالاردى وتكىزۋگە كاسىبي تۇرعىدا دايىندالعانىن اتاپ كورسەتتى.
ءوز كەزەگىندە ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ رەفەرەندۋمدى بايقاۋعا قاتىسقان شەت مەملەكەتتەر مەن حالىقارالىق ۇيىمداردىڭ ورتالىق سايلاۋ ورگاندارىنىڭ وكىلدەرىنە العىسىن ايتتى. سونىمەن قاتار ول حالىقارالىق ۇيىم وكىلدەرىنىڭ رەفەرەندۋمدى بايقاۋعا قاتىسۋى ونىڭ بەدەلىن ارتتىراتىنىن جانە بۇل ەلىمىزدە وتكەن ساياسي ناۋقاننىڭ جاريالىلىعى مەن اشىقتىعىنا كەپىل بولاتىنىن, ونىڭ ىشىندە شىۇ وڭىردەگى عانا ەمەس, جالپى الەمدەگى بەدەلدى جانە قارقىندى دامىپ كەلە جاتقان ۇيىمداردىڭ ءبىرى بولىپ تابىلاتىنىن اتاپ ءوتتى. ءباسپاسوز كونفەرەنتسياسىندا ورك باسشىسى تۇركىتىلدەس ەلدەردىڭ پارلامەنتتىك اسسامبلەياسىنىڭ ءوزارا ءىس-قيمىلدى كەڭەيتۋگە قىزىعۋشىلىق تانىتىپ وتىرعانىن قۇپتايتىنىن دا مالىمدەدى.
