«گاز جوبالارىنا ارنالعان ىنتالاندىرۋ شارالارى ارقىلى ەلىمىزدىڭ رەسۋرستىق بازاسىن تولىقتىرۋ تۋرالى ماسەلە وتكىر بولىپ تۇر. قازىر رەسۋرستىق بازانى كەڭەيتۋ ءۇشىن قاشاعان كەن ورنىندا گاز وڭدەۋ زاۋىتىنىڭ 1-كەزەڭىن ءۇش كەزەكپەن (1, 2 جانە 6 ملرد تەكشە مەتر) سالۋ بويىنشا جۇمىس جۇرگىزىلىپ جاتىر. ول 2030 جىلعا قاراي تاۋارلىق گازدىڭ ءوسىمىن 6,2 ملرد تەكشە مەتردەن اسىرۋعا مۇمكىندىك بەرەدى», دەدى مينيستر.
بولات اقشولاقوۆتىڭ ايتۋىنشا, 2021 جىلعى ماۋسىمنان باستاپ قۋاتى 1 ملرد تەكشە مەتر جوبانىڭ ءبىرىنشى كەزەڭى بويىنشا قۇرىلىس-مونتاجداۋ جۇمىستارى بەلسەندى تۇردە جۇرگىزىلىپ جاتىر. ءبىرىنشى كەزەڭدى 2024 جىلدىڭ باسىندا ىسكە قوسۋ جوسپارلانىپ وتىر.
«گوز-دەردى سالۋ قاشاعان جوباسىنىڭ 2-فازاسىندا پىسىقتالىپ وتىر, ول مۇناي ءوندىرىسىن تاۋلىگىنە 400 مىڭ توننادان 700 مىڭ تونناعا دەيىن وسىرۋگە مۇمكىندىك بەرەدى. بۇعان قوسا, مينيسترلىك فيسكالدىق پرەفەرەنتسيالار بەرۋ ارقىلى رەسۋرستىق بازانى جاڭا گاز جوبالارى ءۇشىن كەڭەيتۋدى ىنتالاندىرۋ بويىنشا جان-جاقتى جۇمىس جۇرگىزىپ جاتىر», دەدى ول.
مينيستر گاز جوبالارىنا سالىقتىڭ بوساتۋ تۇرىندەگى فيسكالدىق جەڭىلدىكتەر جاسالاتىنىن حابارلادى. اتاپ ايتقاندا, ءوندىرۋ باستالعان كۇننەن باستاپ 10 جىلعا كتس-تەن باس تارتۋ, ءوندىرۋ باستالعان كۇننەن باستاپ 10 جىلعا ەكب-دان باس تارتۋ جانە جەر قويناۋىن پايدالانۋعا بالامالى سالىققا اۋىسۋ قۇقىعىن بەرۋ.
بۇل شارالار 2030 جىلعا قاراي تاۋارلىق گازدىڭ رەسۋرستىق بازاسىن 6,7 ملرد تەكشە مەترگە دەيىن ۇلعايتۋعا مۇمكىندىك بەرەدى.
ارۋجان امانگەلدى
