«التىن كۇن اسپانى, التىن ءدان دالاسى» دەپ مەملەكەتتىك گيمننەن باستاۋ العان «كوك اسپانىم – كوك تۋىم» گالا-كونتسەرتى كورەرمەننىڭ زور ىقىلاسىنا بولەندى.
مەرەكەلىك كونتسەرتكە ارنايى كەلگەن مەملەكەتتىك ەلتاڭبانىڭ اۆتورى بەلگىلى ارحيتەكتور جانداربەك مالىبەكوۆ جينالعان قاۋىمدى مەرەكەمەن قۇتتىقتاپ, ۇيىمداستىرۋشىلارعا ءوزىنىڭ العىسىن ءبىلدىردى.
«مەن بارشا قازاقستاندىقتاردى بۇگىنگى مەرەكەمەن قۇتتىقتايمىن! كوك بايراعىمىز جەلبىرەپ, ەلتاڭبامىزدى الەم تانىپ, ءانۇرانىمىز اسقاقتاي بەرسىن! بۇگىنگى مەرەكەلىك كونتسەرت فورماتى, قۇرىلىمى, مازمۇنى جاعىنان ەرەكشە بولدى. جاڭا قازاقستاندى قۇرۋعا باعىت العان ەلىمىزگە وسىنداي رۋحاني-تانىمدىق جوبالار ءاردايىم قاجەت. جاڭا وي سالاتىن, زامانىمىزدى جىرلايتىن, شابىت بەرەتىن كونتسەرت بولدى», دەدى ول قۇتتىقتاۋ سوزىندە.
كونتسەرتتىڭ باستى ەرەكشەلىگى – ونىڭ جانرلىق سان الۋاندىعى. بۇل كەشتە كلاسسيكالىق مۋزىكا, ەسترادا مەن ۇلتتىق ونەر, ميۋزيكل تەاترىنىڭ شىعارماشىلىعى جاقسى ۇيلەسىم تاپتى. كونتسەرتتە روزا رىمباەۆا, ەرلان رىسقالي, ازامات جىلتىركوزوۆ, مەدەت چوتاباەۆ, ارداق بالاجانوۆا, ايزادا كاپونوۆا, گۇلسىم مىرزابەكوۆا, كۇنسۇلۋ تۇرىكپەن, اسقار مۇقيات, امىرە, الىبەك الماديەۆ, رۋحيا بايدۇكەنوۆا, ازات مالىك, سالتانات مەڭدىعاليەۆا, ءبىرجان ايتاحمەتوۆ, ديدار ابدۋحالىق, ايگەرىم التىنبەك, T&Y دۋەتى ونەرىن ورتاعا سالدى. سونداي-اق كورەرمەندەر قازاق مەملەكەتتىك سيمفونيالىق وركەسترى, «استانا سازى» قازاق فولكلورلىق ءانسامبلى, «Forte Trio» مەملەكەتتىك تريوسى, «Astana Musical» مەملەكەتتىك تەاترى مەن «Saz&Soul» توبىنىڭ ونەرىن تاماشالاي الدى.
قازاقكونتسەرت باسشىسى اقتوتى رايىمقۇلوۆا رامىزدەردىڭ 30 جىلدىعىنا ارنالعان مەرەكەلىك ءىس-شارالار الداعى ۋاقىتتا جالعاسىن تاباتىنىن ايتتى. «مەملەكەتتىك رامىزدەردىڭ 30 جىلدىق مەرەيتويى قۇتتى بولسىن بارشامىزعا! رامىزدەردە حالقىمىزدىڭ تاريحى, مادەنيەتى مەن رۋحاني قۇندىلىقتارى كورىنىس تاپقان. پاتريوتتىق رۋح بەرىپ, وتانسۇيگىشتىككە جەتەلەيتىن رامىزدەرىمىزدىڭ ۇلكەن مەرەيتويى كەڭىنەن ناسيحاتتالۋى كەرەك. وسىعان بايلانىستى قازاقكونتسەرت ماۋسىم ايىنىڭ سوڭىنا دەيىن كورەرمەندەرگە ءار ءتۇرلى فورماتتاعى ءىس-شارالاردى, اتاپ ايتقاندا, كونتسەرتتەر, ميۋزيكلدەر مەن جاڭا قويىلىمداردى ۇسىنادى. سونداي-اق جاز بويى بالالارعا ارنالعان تەگىن كينو كورسەتىلىمدەر وتكىزىلەدى. «قازاقستان» ورتالىق كونتسەرت زالىنىڭ ەسىگى كورەرمەندەر ءۇشىن ءاردايىم اشىق», دەپ مالىمدەدى قازاقكونتسەرت ديرەكتورى ا. رايىمقۇلوۆا.
