«بۇعان دەيىن حابارلانعانداي, قازاقستان رەسپۋبليكاسىنىڭ ورتالىق رەفەرەندۋم كوميسسياسىندا 10 حالىقارالىق ۇيىمنان, 13 شەت مەملەكەتتىڭ ورتالىق رەفەرەندۋم ورگاندارىنان 272 بايقاۋشى, سونداي-اق قازاقستان رەسپۋبليكاسىندا تىركەلگەن ديپلوماتيالىق كورپۋستان 41 شەتەلدىك بايقاۋشى اككرەديتتەلگەن. سونىمەن قاتار, رەفەرەندۋمدى مونيتورينگىلەۋگە شەتەلدىك باق-تىڭ 215 وكىلى قاتىسىپ جاتىر. جالپى, ميسسيالار داۋىس بەرۋ پروتسەسىنىڭ ۇلتتىق زاڭناماعا جانە حالىقارالىق ستاندارتتارعا سايكەس جاقسى ۇيىمداستىرىلعانىن اتاپ وتەدى. ورتالىق رەفەرەندۋم كوميسسياسى مەن اۋماقتىق كوميسسيالاردىڭ ۇيىمداستىرۋ جۇمىسى وڭ باعالانادى. كەيبىر سايلاۋشىلاردىڭ شىنايى مەرەكەلىك كوڭىل-كۇيىمەن قاتار, جوعارى بەلسەندىلىگى بايقالادى», دەدى رومان ۆاسيلەنكو ورتالىق رەفەرەندۋم كوميسسياسى الاڭىندا وتكەن بريفينگ بارىسىندا.
ونىڭ اتاپ وتۋىنشە, رەفەرەندۋم بارىسىن بايقاۋعا تمد ميسسياسىنان 144, ال ەقىۇ دەموكراتيالىق ينستيتۋتتار جانە ادام قۇقىقتارى بيۋروسىنان 10 ادام كەلگەن.
«جالپى, داۋىس بەرۋ دايىندىق كەزەڭىندە 27 جىلدىڭ ىشىندە قازاقستانداعى ءبىرىنشى رەفەرەندۋمعا قىزىعۋشىلىقتىڭ ارتقانىن اتاپ وتتىك. كوپتەگەن حالىقارالىق سەرىكتەسىمىز ونى ەلىمىزدىڭ دەموكراتيالىق ۇدەرىستەر مەن راسىمدەردى ۇستانۋىنىڭ ايقىن دالەلى جانە ەلدە ورىن الىپ جاتقان وزگەرتىستەردىڭ رۋحى رەتىندە قابىلدادى», دەدى ول.
