قازاقستاننىڭ ءار وڭىرىنەن ىرىكتەلگەن 2010 جىلى تۋعان ەڭ ۇزدىك جاس سپورتشىلار بىلتىرعى الەم چەمپيوناتىنىڭ ءتورتىنشى ورىن يەگەرلەرى جانە ەۋروپا چەمپيوناتىنىڭ قولا جۇلدەگەرلەرىمەن تەرەزەسى تەڭ ويىن كورسەتتى. باس باپكەر كاكاۋ باستاعان, قاقپاشى يگيتا مەن الاڭداعى ويىنشىلار البەرت اقبالىقوۆ, ءبىرجان ورازوۆ, داۋرەن تۇرساعۇلوۆ, شىڭعىس ەسەنامانوۆ, ەدسون سىندى ساڭلاقتار قوشتاعان جۇلدىز فۋتزالشىلار جاس ورەندەردەن ايلاسىن اسىرا المادى. اسا تارتىستى وتكەن ويىندا 16 گول سوعىلىپ, ماتچ تەڭ ەسەپپەن اياقتالدى.
ويىن جولداستىق كەزدەسۋ رەتىندە بولعانىمەن, الاڭدا قوس تاراپ ءبىر-بىرىنە دەس بەرگەن جوق. ەشكىم دە ايانىپ قالعىسى كەلمەدى. يگيتانىڭ الىستان تەپكەن دوبىنان كەيىن ەسەپتى ءبىرىنشى بولىپ اشقان ۇلتتىق قۇراما ويىنشىلارى ءبىرىنشى تايمدا 3:1 ەسەبىمەن جەڭىسكە جەتتى.
ەكىنشى تايمدا دا ويىن قارقىندى باستالىپ, كەزدەسۋ ادەتتەگىدەي الما-كەزەك شابۋىلعا ۇلاسىپ جاتتى. بىراق بولاشاق چەمپيوندار دا قاراپ قالعان جوق. 1:5 ەسەبىمەن جەڭىلىپ جاتىپ, ماتچ سوڭىنا دەيىن تارازى باسىن تەڭەستىرىپ كەتتى. كەزدەسۋدىڭ اياقتالۋىنا ءبىر مينۋت قالعاندا البەرت اقبالىقوۆ تابلوداعى كورسەتكىشتى 8:7-گە جەتكىزگەنىمەن, ۇلتتىق قۇراما ويىنشىلارى جەڭىستى ۋىسىندا ساقتاي المادى. سوڭعى شابۋىلدارىن ءساتتى وتكىزگەن جاس ورەندەر ەسەپتى تەڭەستىرىپ ۇلگەردى. قورىتىندى ەسەپ – 8:8.
جولداستىق كەزدەسۋ اياسىندا مادەنيەت جانە سپورت ۆيتسە-ءمينيسترى سەرىك جاراسباەۆ فۋتزالدان ەۋرو-2022 دوپ دوداسىندا 7 گول سوعىپ, ءتۋرنيردىڭ ۇزدىك سۇرمەرگەنى اتانعان ءبىرجان ورازوۆقا ماراپاتىن رەسمي تابىستاپ, قفف فۋتزال دەپارتامەنتىنىڭ ديرەكتورى اسقار ابىلداەۆتى العىس حاتپەن ماراپاتتادى.
ال ويىنعا قاتىسقان كىشكەنتاي بالالارعا ۇلتتىق قۇراما مۇشەلەرى ەستەلىك سىيلىقتار تابىستاپ, كورەرمەندەر مەن جانكۇيەرلەر فۋتزال جۇلدىزدارىمەن ەستەلىك سۋرەتكە ءتۇستى.
