قازاقستان • 02 ماۋسىم، 2022

ەگەمەندىك ەتالونى

378 رەت كورسەتىلدى

كوكىرەگىندە ورلىك سالتانات قۇرعان ادام ءۇشىن ەلدىكتىڭ بەينەسى – مەملەكەتتىك رامىزدەر. شۇكىر، ازاتتىق العان تۇستا ەلدىگىمىزدى جاھانعا ءماشھۇر ەتەتىن ءتول تاڭبامىز ەلتاڭبا، مەملەكەتتىڭ مەرەيى مەن مارتەبەسىن ايقىنداعان كوك تۋ، مەملەكەتتىك گيمن دۇنيەگە كەلدى. بۇل قاسيەتتى ۇشتاعان – ەلدىكتىڭ اجىراماس بولىگى، ازاتتىقتىڭ باستاۋى.

ءيا، ۋاقىتىندا ازاتتىقتىڭ الاۋىنداي بولعان قازاقستاننىڭ تۋىن كورگەندەردىڭ القىمىنا جاس تىعىلعان دا بولار. بۇل كۇندى عۇمىرىن ۇلت ازاتتىعى ءۇشىن كۇرەسكە ارناعان الاش ارداق­تىلارى ارمانداۋمەن كەتتى. ال ءبىز ەندى وسى كوك تۋدىڭ استىن­دا ءبىر اتانىڭ بالاسىنداي، ءبىر قولدىڭ سالاسىنداي باس قوسامىز.   

وسىدان وتىز جىل بۇرىن قازاقستان پرەزيدەنتى نۇر­سۇل­تان نازارباەۆ «قازاق­ستان رەسپۋبليكاسىنىڭ مەملەكەت­تىك تۋى تۋرالى»، «قازاقستان رەسپۋبليكاسىنىڭ مەملە­كەت­تىك ەلتاڭباسى تۋرالى» جانە «قازاقستان رەسپۋبليكاسى مەم­لەكەتتىك ءانۇرانىنىڭ مۋزى­كالىق رەداكتسياسى تۋرالى» زاڭدارعا قول قويسا، 2007 جىلى «قازاقستان رەسپۋبليكاسىنىڭ مەملەكەتتىك رامىزدەرى تۋرالى» زاڭ قابىلداندى. سودان بەرى 4 ماۋسىم مەملەكەتتىك رامىزدەر كۇنى رەتىندە مەرەكەلەنىپ كەلەدى.

شاكەن نيازبەكوۆتىڭ قول­تاڭباسىمەن دۇنيەگە كەلگەن مەملەكەتتىك تۋىمىز، جان­داربەك مالىبەكوۆ پەن شوت-امان ءۋاليحانوۆتىڭ ءتول تۋىن­دىسى رەتىندە تانىلعان ەل­تاڭ­بامىز قاي كەزدە دە ەلدىڭ ەل­دىگىن ايقىنداپ تۇرادى. كوك تۋ مەن ەڭسەلى ەلتاڭباعا قارا­عاندا بويىڭدى شاتتىق سەزى­مى كەرنەمەۋى، مارقايىپ ماسات­تانباۋىڭ استە مۇمكىن ەمەس.

ويتكەنى مەملەكەتتىك را­­مىزدەر – ازات ەلدىڭ ماق­تا­نىشى. ال اۋەلدە مۇ­قان تولەباەۆ، ەۆگەني برۋ­سيلوۆسكي، لاتيف حاميدي ۇش­تىگىنىڭ اۋەنىنە، مۇزافار الىمباەۆ، قادىر مىرزا-ءالى، تۇمانباي مولداعاليەۆ، جادىرا دارىباەۆالاردىڭ سوزىنە جازىلعان العاشقى گيمن 2006 جىلعا دەيىن ازات ەلدىڭ ايبىنىن اسىرسا، 2006 جىلى پرەزيدەنت نۇرسۇلتان نازارباەۆتىڭ باستاماسىمەن پارلامەنت اقىن جۇمەكەن ناجىمەدەنوۆتىڭ سوزىنە جازىلعان ءشامشى قال­داياقوۆتىڭ «مەنىڭ قا­زاقستانىم» ءانىن مەملەكەت­تىك گيمن رەتىندە بەكىتتى.

بۇگىنگى قازاق تۋىمەن ماق­تانادى. ولاي دەۋىمىزدىڭ وزىندىك سەبەبى دە بار. ەلدىڭ تۇت­قاسىن ۇستاعان مەملە­كەت باسشىسى رەسمي ساپار­لارمەن شەت مەملەكەتتەرگە بارعاندا كوك تۋىمىز كوكتە قالىقتاسا، سپورتشىلارى­مىز حالىقارالىق باسەكە­لەردە اتوي سالعاندا باي­را­عىمىز بيىكتە جەلبىرەپ، ءان­ۇرانىمىز شىرقالادى. مۇندايدا بويدى كەرنەگەن ماقتانىش سەزىمى جانارعا جاس ۇيىرەتىنى دە بار... ويتكەنى كوكتە تۋ عانا ەمەس، قازاقتىڭ ءوزى سەكىلدى ازات قۇس قىران دا قالىقتاپ بارا جاتقانداي بولادى دا تۇرادى.

سپورت دەمەكشى، كەڭەس ودا­عىنىڭ قۇرا­مىندا ميۋن­حەن مەن ماسكەۋ وليمپيادا­سىن­دا اتوي سالعان ءالجان جار­مۇحامەدوۆ (باسكەت­­بول) پەن كلاسسيكالىق كۇرەس­تە قار­سى­لاس شىداتپاعان جاقسى­لىق ۇشكەمپىروۆ اتوي سال­عان كەزدە قىزىل يمپەريانىڭ تۋىن كوتەرىپ تۇرىپ: «ازات ەلدىڭ تۋى قاشان جەل­بىرەيدى» دەپ ويلا­عان دا شىعار. ءال­جاندى قاي­دام، جاقاڭمەن سۇح­بات­تاسقاندا: «بۇگىنگى سپورت­شى­لار باقىتتى عوي. جا­ھان­دىق جا­رىس­تار­عا تاۋەل­سىز ەلدىڭ تۋى استىندا بارادى» دەگەن ەدى. سول سوزىنەن-اق ونىڭ ەگەمەن ەلى­مىز­دىڭ را­­­مىز­دەرىنە دەگەن قۇرمەتى بو­لەكتىگى باي­قا­لاتىن.

قازاق وعلاندارى اراسىنان العاشقى رەت بوكسشى بەكزات ساتتارحانوۆ سيدنەي وليم­پياداسىندا اتوي سالىپ، ءانۇرانىمىزدى اسقاق­تاتىپ، كوك تۋىمىزدى جەلبىرەتتى. راس، بەكزاتقا دەيىن ليللە­حامەردە وتكەن قىسقى وليم­پيادادا شاڭعىشى ۆلاديمير سميرنوۆ، اتلانتادا بوكسشى ۆاسيلي جيروۆ پەن كلاس­سيكالىق كۇرەستىڭ شەبەرى يۋري مەلنيچەنكو اتوي سالعاندا دا قۋانعانبىز. الايدا بولمىسى بەك­زات­تىقتان جارالعان بەك­زات­تىڭ جەڭى­سىنىڭ ءدامى باسقاشا ەدى. ودان كەيىن افينادا ال­ماس قىلىشتاي جارقىراعان جيىرما ءبىر جاس­­تاعى باقتيار ارتاەۆ ابىرويىمىزدى ساق­­تاپ، جالعىز التىندى يەلەنگەندە دە كوز ۇشى­­نا ءتۇيىر تامشى تىعىلا بەرگەن. «بار بول، باقتيار!» دەگەنبىز جال­عىز التىندى قور­­­جىن­عا تۇسىرگەن باۋىرىمىزعا ري­زاشىلىق كەيىپپەن.

ول كەزدە قۇندىلىق باس­­­­­قاشا ما ەدى، الدە ازات­تىقتىڭ باستاپقى جىلدارى بولعاندىقتان بويداعى رۋح اسپانداپ تۇرۋشى ما ەدى، كىم ءبىلسىن؟! ايتەۋىر بەكزات پەن باقتياردىڭ جەڭىسى ەل­دى ەرەكشە قۋانتقانى ەستە. ودان كەيىن دە سايىپ­قى­ران­دارىمىز تورتكۇل دۇنيەنى وزىنە قاراتقان كەزدەر از بول­عان جوق.

التى قۇرلىق مويىندا­عان التى الاش ار­داق­تى­لارى ارمانداعان كوك تۋى­مىز كوكتە جەل­بىرەپ، رۋحتى كو­تەرەتىن گيمنىمىز ۇدايى شىر­­­قالىپ، ەلتاڭبامىز ­ەل­دى­گىمىزدى ەسەلەي بەر­سىن!

ابىلايدىڭ اق تۋى مەن ازات ەلدىڭ كوك تۋىنىڭ اراسىندا ءۇش عاسىرلىق تاريح جاتىر. ول كەزدە كوك تۋىمىز دالا مايدانىندا، باتىرلار اتتىڭ ۇستىندە شاپقان ساتتە جەلبىرەسە، بۇگىندە بەيبىت ەلدىڭ اسپانىندا جەلبىرەپ تۇر. ءبىز ءۇشىن اق تۋ دا، كوك تۋ دا قىمبات. ويتكەنى جيىرما بىردەن ءۇشتى الۋعا بولمايدى.

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار