وسى ويىننىڭ ناتيجەسى قاي كوماندانىڭ جەڭىمپاز اتاناتىنىن ايقىندادى. ءسويتىپ, اسا تارتىستى كەزدەسۋ بارىسىندا ى.التىنسارين اتىنداعى №65 مەكتەپ-گيمنازياسىنىڭ كومانداسى №90 جالپى ءبىلىم بەرەتىن ورتا مەكتەپتىڭ كومانداسىنان باسىم ءتۇستى. قورىتىندى ەسەپ – 3:1.
ى.التىنسارين اتىنداعى №65 مەكتەپ-گيمنازياسىنىڭ كومانداسىنا 20 ملن تەڭگە كولەمىندەگى باس جۇلدە بۇيىردى. تيىسىنشە, ەكىنشى ورىندى №90 جالپى ءبىلىم بەرەتىن ورتا مەكتەپتىڭ قۇراماسى ەنشىلەسە, جۇلدەلى ءۇشىنشى ورىندى ت.تاجىباەۆ اتىنداعى №47 مەكتەپ-گيمنازياسىنىڭ جاس فۋتبولشىلارى جەڭىپ الدى.
فۋتبول – جاسوسپىرىمدەر اراسىندا ەڭ تانىمال سپورت تۇرلەرىنىڭ ءبىرى. الايدا قالا مەكتەپتەرىنىڭ شىمكەنت جاستار ليگاسىندا ونەر كورسەتۋى وسكەلەڭ ۇرپاقتىڭ ۆولەيبول, باسكەتبول جانە شاحمات سىندى وزگە دە سپورت تۇرلەرىنە دەگەن قىزىعۋشىلىعىن وياتتى. بۇل ءۇش سپورت ءتۇرى دە جوباعا ەنگىزىلگەن. سوندىقتان اتالعان سپورت تۇرلەرى بويىنشا ۇيىمداستىرىلعان جارىس جەڭىمپازىنا باستى ماراپات رەتىندە 20 ملن تەڭگە كولەمىندە قارجىلاي جۇلدە قاراستىرىلىپ وتىر. جالپى, جۇلدە قورى 80 ملن تەڭگەنى قۇرايدى. بۇل قاراجات دەمەۋشىلەر ەسەبىنەن قاراستىرىلعان بولاتىن.
تانىمال قازاقستاندىق سپورتشىلاردىڭ باسىم كوپشىلىگىنىڭ جەڭىس جولى مەكتەپ قابىرعاسىنداعى سپارتاكيادالاردا باعىندىرعان بەلەستەردەن باستاۋ العانى انىق. وسى قاعيدانى قاپەرگە العان جەرگىلىكتى بيلىك بۇگىندە مەكتەپ وقۋشىلارىنىڭ نەعۇرلىم كوپ بولىگىنە ۇلكەن سپورتقا جول اشۋ, ولاردى دەنەشىنىقتىرۋمەن اينالىسۋعا جانە سالاماتتى ءومىر سالتىن ۇستانۋعا باۋلۋ ماقساتىندا جۇيەلى جۇمىس ىستەپ جاتقان جايى بار.
قالادا جاستار ليگاسىنا دەگەن قىزىعۋشىلىق ارتىپ كەلەدى. بىلتىر جوباعا 140 مەكتەپ قاتىسقان بولسا, بيىل بۇل كورسەتكىش 151-گە جەتتى. سپورتتىڭ ءتورت ءتۇرى بويىنشا ۇيىمداستىرىلعان جارىسقا جالپى العاندا 6 مىڭعا جۋىق وقۋشى قاتىستى. ولار فۋتبول, ۆولەيبول, باسكەتبول جانە شاحمات ويناپ, كىل مىقتىدا كىم مىقتىنى انىقتادى.
– مەن 7-سىنىپقا دەيىن فۋتبولمەن اينالىستىم. ال كەيىنگى ءۇش جىلدا باسكەتبولعا دەگەن اڭسارىم اۋىپ, سپورتتىڭ وسى تۇرىنە دەن قويىپ كەتتىم. ءوز باسىم وسى ويىن ءتۇرىن وركەسترگە ۇقساتامىن. سەبەبى ءار دەتال ماڭىزدى. ءاربىر ۇساق-تۇيەك دۇنيە ءوزارا تۇسىنىستىككە اسەر ەتەدى. سونىڭ بارلىعى تۇپكى ناتيجەدە كورىنىس تابادى. بۇل تەك الاڭدا عانا ەمەس, ويىننان تىس ۋاقىتتا دا باعالى دۇنيە, – دەدى م.ح.دۋلاتي اتىنداعى №8 مەكتەپ-گيمنازياسىنىڭ 11-سىنىپ وقۋشىسى ءارى باسكەتبولدان مەكتەپ كومانداسىنىڭ كاپيتانى ەرسۇلتان احمەتبەك.
ەرسۇلتان كۇن سايىن كەم دەگەندە ەكى ساعات ۋاقىتىن سپورت الاڭىندا وتكىزەتىنىن جاسىرمادى. الايدا بۇل ارەكەت ساباقتى جاقسى وقۋعا كەدەرگى كەلتىرمەيدى. كەرىسىنشە, تەمىردەي تارتىپكە تاربيەلەپ, ۋاقىتتى دۇرىس جوسپارلاۋعا, بارىنە ۇلگەرۋ ءۇشىن كۇن ءتارتىبىن قاتاڭ ساقتاۋعا ۇيرەتەدى. مەكتەپ تۇلەگى ءۇشىن جاتتىعۋ – ومىرلىك قاجەتتىلىككە اينالدى. ءتىپتى, باسكەتبولعا اۋەستەنگەنى سونشا, الداعى ءومىرىن سپورتپەن ۇشتاستىرۋعا بەل بايلادى.
ارينە, م.ح.دۋلاتي اتىنداعى №8 مەكتەپ-گيمنازياسى وقۋشىلارىنىڭ بىلتىر شىمكەنت جاستار ليگاسىنىڭ جەڭىمپازى اتانعانى جاقسى موتيۆاتسيا بولعانى انىق. سول العاشقى جارىستاردا كوماندا تۇگەلگە جۋىق وسى قۇرامدا وينادى.
ءبىر جىلدىق جاتتىعۋ ويىن ساپاسىن بۇدان دا بيىك دەگەيگە كوتەرۋگە مۇمكىندىك بەردى. كوماندا كەزەكتى وراسان زور جەڭىسكە جەتەرىنە كۇمان كەلتىرگەن جوق. بالالاردىڭ ءوز وزىنە دەگەن ءدال مۇنداي سەنىمىنىڭ ارتىندا قاجىرلى ەڭبەك, ويىن تەحنيكاسىن جەتىلدىرۋ مەن ۇدايى دايىندىق تۇرعانى بەلگىلى.
– ءبىز قورجىنعا سالعان كەزەكتى 20 ميلليون تەڭگەنى مەكتەپ قانداي ماقساتتا جۇمسايتىنىن بىلمەيمىز. بىلتىر جۇلدە قاراجاتىنا مەكتەپكە ارناپ ينتەراكتيۆتى تاقتالار ساتىپ الىندى. بۇل تاقتالار وقۋشىلاردىڭ ءبىلىم الۋىنا كوپ كومەكتەسەدى. ماسەلەن, ينتەرنەت بار, سۋرەت سالۋعا قاجەتتى دۇنيەنى جۇكتەپ الۋعا, ءارتۇرلى دۇنيەنى قۇراستىرۋعا بولادى. بۇل مۇلدەم باسقا دەڭگەي. قاراجات مەكتەپتەگى بارلىق كابينەتتى وسىنداي تاقتالارمەن جابدىقتاۋعا جەتتى, – دەدى ەرسۇلتان احمەتبەك.
ج.ايماۋىتوۆ اتىنداعى №64 مەكتەپ-گيمنازياسىنىڭ قۇراماسى ليگا جارىستارىنا العاشقى رەت قاتىسىپ وتىر. سوعان قاراماستان ۆولەيبولشىلار كومانداسى جۇلدەلى ءۇشىنشى ورىن يەلەنىپ, تاماشا ناتيجە كورسەتتى.
– ءبىز ءوز ناتيجەمىزگە ريزامىز. ەڭ الدىمەن, ءبىزدى جاتتىقتىرعان مۇعالىمگە العىس ايتامىز. مەكتەبىمىزدى جەرگە قاراتقان جوقپىز. كەلەسى جىلى ناتيجەمىزدى بۇدان دا جاقسارتا تۇسەمىز دەپ ويلايمىن, – دەدى 9-سىنىپ وقۋشىسى اقنيەت حاسانوۆا.
ۆولەيبولدان باس جۇلدە ءال-فارابي اتىنداعى №113 جالپى ءبىلىم بەرەتىن ورتا مەكتەپتىڭ كومانداسىنا بۇيىردى. ال ەكىنشى ورىندى ا.بايتۇرسىنوۆ اتىنداعى №50 مەكتەپ-گيمنازياسىنىڭ وقۋشىلارى يەلەندى.
شاحمات تاقتاسىنداعى شايقاستاردا و.جولداسبەكوۆ اتىنداعى №9 IT مەكتەپ-ليتسەيىنىڭ وقۋشىلارىنا تەڭ كەلەر ەشكىم بولعان جوق. ەكىنشى ورىندى ى.التىنسارين اتىنداعى №65 مەكتەپ-گيمنازياسىنىڭ زياتكەرلەرى يەلەندى. ءۇشىنشى ورىندى ت.تاجىباەۆ اتىنداعى №47 مەكتەپ-گيمنازياسىنىڭ شاحماتشىلار كومانداسى جەڭىپ الدى.
ءتورت سپورت ءتۇرىنىڭ ارقايسىسىندا توپ جارعان ءبىرىنشى ورىن يەگەرلەرىنە اقشالاي جۇلدەلەردى شىمكەنت قالاسىنىڭ اكىمى مارات ايتەنوۆ تابىستادى. ونىڭ باستاماسىمەن بىلتىر ءدال وسى اۋقىمدى سپورتتىق جوبا باستاۋ العان بولاتىن.
– شىمكەنت جاستار ليگاسى قالامىزدا ەكىنشى رەت وتكىزىلىپ وتىر. جوبا ەل پرەزيدەنتىنىڭ تاپسىرماسى بويىنشا ىسكە اسىرىلىپ, بۇقارالىق سپورتتى دامىتۋعا جانە جاستاردى پاتريوتتىق رۋحتا تاربيەلەۋگە باعىتتالدى. سەبەبى سپورت تەك دەنساۋلىقتىڭ كەپىلى عانا ەمەس, سونىمەن قاتار ەرىك-جىگەردى جانىپ, تاباندى بولۋعا تالپىندىرادى. بۇگىنگى ءتۋرنيردىڭ جەڭىمپازدارى ءوز مەكتەبىنىڭ ابىرويى مەن بەدەلى ءۇشىن كۇرەستى. بۇل بالالار ەرتەڭ ناعىز ازامات بولىپ, ەل نامىسىن قورعاپ, وتانعا قىزمەت ەتەدى دەپ سەنەمىن. بۇگىنگى جەڭىس سىزدەردىڭ الداعى ومىرلەرىڭىزدىڭ تاماشا باستاماسى بولسىن, – دەپ مۇرات ايتەنوۆ جاس سپورتشىلاردى جەڭىسىمەن قۇتتىقتادى.
ىرىكتەۋ كەزەڭدەرى مەن جارىستار ازدى-كوپتى ءۇش ايعا سوزىلدى. ونى ۇيىمداستىرۋمەن ءارى تورەشىلىك ەتۋمەن دەنەشىنىقتىرۋ جانە سپورت سالاسىنداعى 400-گە جۋىق مامان اينالىستى. جاتتىقتىرۋشىلار تەك ويىندى باعالاپ قانا قويماي, رەسپۋبليكا چەمپيوناتتارىندا ونەر كورسەتەتىن قۇراما كوماندالارعا ەڭ مىقتى ويىنشىلاردى تاڭداپ الۋ ماقساتىندا جاس سپورتشىلارعا مۇقيات زەر سالدى. بۇل دا شىمكەنت جاستار ليگاسىنداعى ماڭىزدى ەرەكشەلىكتەردىڭ ءبىرى سانالادى.
شىمكەنت
