جاڭادان اشىلعان ينكليۋزيۆتى بالاباقشا 2 جاستان 7 جاسقا دەيىنگى بالالاردى قابىلدايدى. باقشانىڭ جايلى جانە جارىق بولمەلەرى وڭالتۋعا قاجەتتى زاماناۋي جابدىقتارمەن جابدىقتالعان. ءبىلىم بەرۋ باعدارلاماسى ەرەكشە بالانىڭ ءوز قاتارىنان قالماي ءبىلىم الۋىنا بەيىمدەلىپ قۇرىلعان, سونىمەن بىرگە تاربيەشىلەر قولداناتىن ارنايى ادىستەر بالانىڭ ءبىلىم باعدارلاماسىن تولىعىمەن يگەرۋىنە كومەكتەسەدى.
اتالعان جوبا نۇر-سۇلتان قالاسى اكىمدىگىنىڭ قولداۋىمەن ىسكە اسۋدا. جوبانىڭ بىرەگەيلىگى ەرەكشە قاجەتتىلىكتەرى بار بالالارعا العاش رەت استانا مەديتسينا ۋنيۆەرسيتەتىنىڭ پروفەسسورلىق-وقىتۋشىلىق قۇرامى تاراپىنان مەديتسينالىق-وڭالتۋ كومەك كورسەتىلەتىندىگىندە.
ەندى بۇل باقشاعا سويلەۋ قابىلەتى, اۋتيزم سپەكترى, ورتالىق جۇيكە جۇيەسى بۇزىلعان جانە باسقا دا ەرەكشەلىكتەرى بار بالالار مەديتسينالىق-پەداگوگيكالىق كومەكتىڭ تولىق كەشەنىن الاتىن بولادى.
بالالارمەن لوگوپەد-دەفەكتولوگ, رەابيليتولوگ, بالالار نەۆروپاتولوگى, پەدياتر, پەداگوگ-پسيحولوگ, ەرگوتەراپەۆت, كينەزيوتەراپەۆت, سونداي-اق سۋردولوگ وتورنولارينگولوگ جانە نۋتريتسيولوگ سەكىلدى تاجىريبەلى ماماندار اينالىسادى. بالاباقشا استمۋ-دىڭ كلينيكالىق بازاسىنا اينالادى, وندا مەديتسينا ستۋدەنتتەرى مەكتەپكە دەيىنگى ۇيىمدار دەڭگەيىندە بالالارعا كومەك كورسەتۋ بويىنشا قوسىمشا بىلىكتىلىككە يە بولادى.
«مەكتەپكە دەيىنگى مەكەمەلەردە ەرەكشە قاجەتتىلىكتەرى بار بالالاردىڭ بەيىمدەلۋى جىلدامىراق وتەدى, سەبەبى دەنى ساۋ قاتارلاستارىنىڭ اراسىندا ولار الەۋمەتتىك تاجىريبەگە يە بولادى.
پرەزيدەنت بيىلعى جىلدى بالالار جىلى دەپ جاريالادى جانە ءبىزدىڭ مىندەتىمىز - وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعىن قامتاماسىز ەتۋ», دەپ اتاپ ءوتتى استانا مەديتسينا ۋنيۆەرسيتەتىنىڭ باسقارما توراعاسى-رەكتورى كامالجان نادىروۆ.
