«ۇكىمەت سۋ رەسۋرستارىن باسقارۋعا قاتىستى بىرنەشە شارا قابىلداپ جاتىر. ءبىرىنشى, ترانسشەكارالىق سۋ رەسۋرستارىن پايدالانۋدا كورشىلەرمەن مەملەكەتارالىق سۋ قاتىناستارىن قۇرۋ كەزىندە حالىقارالىق سۋ قۇقىعى قاعيداتتارىن بارىنشا ىسكە قوسۋ قاجەتتىگى. ەكىنشىسى سۋعا دەگەن سۇرانىس ارتقان جاعدايدا تاپشىلىقتى جويۋعا قاتىستى. ياعني قولدا بار سۋ رەسۋرستارىنىڭ الەۋەتىن ساقتاپ, ولاردى يگەرۋدە ينتەگراتسيالانعان باسقارۋ پراكتيكاسىن جاقسارتۋ. سونىمەن قوسا حالىقتى, سۋ جۇيەلەرى مەن ەكونوميكا سالالارىن سۋمەن تەڭگەرىمدى قامتاماسىز ەتۋگە ءمان بەرىلىپ جاتىر», دەدى سەرىك قوجاحمەتوۆ «ECOJER» ءىى حالىقارالىق ەكولوگيالىق كونگرەسى بارىسىندا.
ونىڭ ايتۋىنشا, سۋ رەسۋرستارىن قورعاۋ, باقىلاۋ جانە پايدالانۋدا باسسەيندىك ينسپەكتسيانىڭ قىزمەتىن كۇشەيتۋ قاجەت. سەبەبى بۇگىندە باسسەيندىك ينسپەكتسيا قىزمەتكەرلەرىنىڭ جۇكتەمەسى جوعارى بولۋىنا بايلانىستى سۋ قورىن قورعاۋدا باقىلاۋ السىرەگەن.
«جوعارىدا اتالعان سۋ رەسۋرستارىنا قاتىستى ماسەلەلەردىڭ شەشىمىن عىلىمي تۇرعىدان قامتاماسىز ەتۋ ءۇشىن «قازاق سۋ شارۋاشىلىعى» عىلىمي-زەرتتەۋ ينستيتۋتىنىڭ بازاسىندا سۋ رەسۋرستارى مەن سۋ شارۋاشىلىعى پروبلەمالارى جونىندەگى سالالىق عىلىمي-زەرتتەۋ تالداۋ ورتالىعىن اشۋ جوسپارلانىپ جاتىر. ماقسات – سۋ رەسۋرستارى كوميتەتى مەن باسسەيندىك ينسپەكتسيانى نىعايتۋ», دەدى ول.
