ءىس-شارا الداعى 5 ماۋسىمدا وتەتىن كونستيتۋتسياعا وزگەرىستەر ەنگىزۋ جونىندەگى جالپىرەسپۋبليكالىق رەفەرەندۋمعا ورايلاستىرىلعان. ۆەبينارعا حالىقارالىق ءبىلىم بەرۋ كورپوراتسياسىنىڭ 50-دەن استام بەلسەندى ستۋدەنتى قاتىستى.
الماتى قالاسىنىڭ ءماسليحات دەپۋتاتى ءاسيا اقانوۆا رەسپۋبليكالىق رەفەرەندۋمعا ۇسىنىلاتىن وزگەرىستەر مەن تولىقتىرۋلاردى ءتۇسىندىردى. «جاڭا قازاقستان ءبىلىمدى, ىزدەنىمپاز جانە جاسامپاز جاس ازاماتتىڭ ينتەللەكتۋالدى ۇرپاعى تۇسىنىگىنە سايكەس كەلۋى ءتيىس. سوندىقتان جاستار ءتۇسىندىرۋ جۇمىستارىنا, ءىس-شارالارعا, ونىڭ ىشىندە پىكىرتالاستارعا بەلسەندى قاتىسۋى ماڭىزدى», دەپ تۇيىندەدى ءسوزىن دەپۋتات.
جالپى جيىن اشىق سۇراق-جاۋاپ فورماتىندا ۇيىمداستىرىلدى. سونىمەن قاتار جاستار ەلدىڭ ساياسي, الەۋمەتتىك, ەكونوميكالىق جانە مادەني دامۋى جولىندا قابىلداناتىن كونستيتۋتسيالىق رەفورمالار, سونداي-اق كونستيتۋتسيانى جەتىلدىرۋ تۋرالى ءوز پىكىرلەرىن ءبىلدىردى. حبك ستۋدەنتى باعلان لەسبەكوۆ مۇگەدەك جاندارعا كومەك كورسەتۋ ماسەلەسىن اتاپ وتسە, ايىم ماساباەۆا ءاربىر قازاقستان ازاماتى وڭ وزگەرىستەردى وزىنەن باستاۋ كەرەكتىگىن, ياعني «ارقايسىمىزدىڭ يگى ىستەرىمىز بەن وڭ باستامالارىمىز جاڭا قازاقستانعا اينالۋدىڭ العاشقى قادامى» دەگەن پىكىرىن قوستى. سونداي-اق ۆەبينار اياسىندا الەۋمەتتىك جەلىلەردەگى, ونىڭ ىشىندە TikTok-تاعى اقپاراتتى سۇرىپتاۋ ماسەلەسى قوزعالدى.
