تمد ەلدەرى عانا ەمەس, تاياۋ شىعىس ەلدەرىنە تانىمال بولعان حولدينگ «قىزىلجار» ارنايى ەكونوميكالىق ايماعىنا سالىنىپ جاتقان وسى زاۋىتتى ءوزىنىڭ قۇرىلعانىنا 25 جىل تولۋ مەرەيتويىنىڭ قارساڭىندا ىسكە قوستى. ءۇش جىلعا تاياۋ ۋاقىتتا حولدينگ 10 ملرد تەڭگە ينۆەستيتسيا قۇيعان ەكەن. قۇرامىندا 5 مىڭعا جۋىق ادام قىزمەت اتقاراتىن حولدينگ ءوزىنىڭ كەنتاۋ, شىمكەنت, الماتى, قىزىلوردا, ورال, اقتاۋ, نۇر-سۇلتان قالالارىنداعى كاسىپورىندارى قاتارىنا ەندى پەتروپاۆلدى دا قوسىپ وتىر. بۇل زاۋىت سولتۇستىك قازاقستان وڭىرىندەگى ءىرى كاسىپورىنداردىڭ ءبىرى بولماق. ول جىلىنا 13 مىڭ دانا ترانسفورماتور شىعارىپ, ونىڭ 90 پايىزىن شەتەلدەرگە ەكسپورتتايدى. تولىق قۋاتىندا جۇمىس ىستەگەندە كاسىپورىن 400-گە جۋىق ادامدى جۇمىسپەن قامتيدى.
اعىلشىنشاسى Alageum Electric دەپ جازىلاتىن وسى كومپانيانى العاشقى بولىپ قولعا الىپ, نەگىزىن سالعان كاسىپكەر سايدوللا قوجاباەۆ. ول ءوزىنىڭ جۇمىسىن الدىمەن كەنتاۋ ترانسفورماتور زاۋىتىن اشۋدان باستاعان. تۇركىستان قالاسىندا ومىرگە كەلگەن ول قازىر ەلىمىزدەگى ءىرى كاسىپكەرلەردىڭ قاتارىندا قۇرامىنا «كەنتاۋ ترانسفورماتور زاۋىتىنان» باسقا ورال, اقتاۋ ترانسفورماتور زاۋىتتارى, «الماتى ەلەكترمەحانيكالىق زاۋىتى», شىمكەنتتەگى «ەلەكترومونتاج» اق جانە تاعى باسقالارى ەنەتىن Alageum Group كورپوراتسياسى باقىلاۋشىلار كەڭەسىنىڭ توراعاسى.
ء«بىز ونىمدەرىمىزدى ارمەنيا, ازەربايجان, رەسەي ەلدەرىنە ۇزدىكسىز شىعارۋدامىز. ولاردىڭ تاراپىنان ونىمدەرىمىزگە ەش شاعىم بولعان جوق. ەندى وسى ونىمدەر پەتروپاۆل قالاسىنداعى جاڭا زاۋىتتا دا شىعارىلاتىن بولادى. ماسكەۋدىڭ «موسيزولياتور» اتتى كومپانياسىمەن 20 جىلعا وندىرىستىك ىنتىماقتاستىق ورناتقانبىز. ولار بىزگە ترانسفورماتورعا قاجەتتى جوعارى ءۆولتتى تەتىكتەر جىبەرىپ تۇراتىن. سونىڭ ىشىندە ەمالدى يزولياتسيالانعان تەتىكتەر دە بار ەدى. وندايدى رەسەي الىس شەتەلدەن الاتىن, ەندى اتالعان قۇرال ولارعا كەلمەيتىن بولدى. سوندىقتان ەمالداۋ جەلىسىن وزىمىزدە اشۋعا ءماجبۇر بولىپ وتىرمىز», دەدى «پەتروپاۆل ەلەكترتەحنيكالىق زاۋىتىنىڭ» اشىلۋ سالتاناتىنا قاتىسقان ول.
وسى سالتاناتقا ماسكەۋدىڭ «موسيزولياتور» اق ساتۋ جونىندەگى ديرەكتورى ماكسيم وسيپوۆ تا قاتىستى. ول جاڭا زاۋىتتىڭ ونىمدەرىنە ءوز باعاسىن بەردى. «زاۋىتتىڭ ستانوكتارى جوعارى تەحنولوگياعا بارىنشا ساي. مۇنداي جەردە ونىمدە اقاۋ بولۋى مۇمكىن ەمەس دەپ ويلايمىن. سەنىمدى جابدىقتار بولسا ارقاشان دا ساپالى ونىمدەر شىعارۋعا بولادى», دەدى.
وبلىس اكىمىنىڭ ورىنباسارى داۋرەن جانداربەك كورپوراتسياعا سالىقتىق جەڭىلدىكتەر بەرىلگەنىن ايتتى. «بۇل پرەفەرەنتسيالار ولارعا 2044 جىلعا دەيىن بەرىلەدى. ءبىز «قىزىلجار» اەا» ءوندىرىس ورنىن اشۋعا ەنگەن بارلىق كاسىپورىنعا وسىنداي جەڭىلدىكتەر قاراستىرعانبىز», دەي كەلىپ, Alageum Electric ءوز جۇمىسشىلارىنا قامقورلىق جاساپ, ولارعا جەڭىلدەتىلگەن باعاعا تۇرعىن ءۇي سالىپ بەرەتىندەرىن ايتتى. «ازىرگە ولار 40 پاتەرلى ءۇيدى پايدالانۋعا بەردى. ودان باسقا 104 پاتەرلى ءۇيدىڭ قۇرىلىسىنا كىرىستى. سوندىقتان بۇل كاسىپورىن قىزىلجاردا تۇپكىلىكتى تامىر جايۋعا بەت الىپ وتىر دەپ ساناۋعا بولادى», دەدى.
زاۋىتتىڭ اشىلۋ سالتاناتىنا قازاقستان كاسىپكەرلەرىنىڭ مۇددەسىن قورعايتىن «اق جول» پارتياسىنىڭ توراعاسى, ءماجىلىس دەپۋتاتى ازات پەرۋاشەۆ تە قاتىسقان ەدى. ول ءوزىنىڭ سوزىندە جاڭا قازاقستاندى قۇرۋدا وسىنداي كاسىپورىنداردىڭ ماڭىزدى ەكەنىن اتاپ ءوتتى. «جوعارى تەحنولوگيامەن جۇمىس ىستەيتىن وسىنداي زاۋىتتار كوپتەپ اشىلسا, ەلىمىزدىڭ ەكونوميكاسىنىڭ وركەندەي تۇسۋىنە ءوزىنىڭ وڭ ىقپالىن تيگىزەدى. باسقا كومپانيالار دا وسىنداي وزىق كاسىپورىنداردان ۇلگى الۋى كەرەك», دەدى ول.
ازىرگە جاڭا كاسىپورىن 1 ملرد تەڭگەنىڭ تاپسىرىسىن العان. بيىل شىعاراتىن ترانسفورماتورلار سانىن جىلدىڭ اياعىنا دەيىن 4 مىڭعا جەتكىزبەك. ازىرگە وندا 80 ادام جۇمىس ىستەۋدە. ايتۋلارىنا قاراعاندا, ورتا ەسەپپەن 250 مىڭ تەڭگەدەن ەڭبەكاقى الادى. ارينە, ونىمدەرى سۇرانىسقا يە بولاتىن وسىنداي كاسىپورىندار اشىلا بەرسە نۇر ۇستىنە نۇر بولار ەدى.
پەتروپاۆل
