قازاقستان قۇراماسى ناۋرىز ايىندا ۇلتتار ليگاسىنىڭ پلەي-وفف كەزەڭىندە مولدوۆا فۋتبولشىلارىن ەكى ماتچ قورىتىندىسى بويىنشا جەڭىپ, «س» ديۆيزيونىنداعى ورنىن ساقتاپ قالعان بولاتىن. ءسويتىپ, جاڭا ماۋسىمنىڭ جەرەبەسىنە سايكەس جەرلەستەرىمىز ۇلتتار ليگاسىنىڭ توپتىق كەزەڭىندە بەلارۋس, سلوۆاكيا جانە ازەربايجان كۆارتەتىندە باق سىناپ, العاشقى ويىنىن ءوز الاڭىندا ازەربايجان قۇراماسىمەن وتكىزەتىن بولدى.
بۇگىنگى تاڭدا ازەربايجان فيفا رەيتينگىندە قازاقستاننان ءتورت ساتى جوعارى تۇر. موگامەد اديەۆ شاكىرتتەرى ناۋرىز ايىنىڭ قورىتىندىسى بويىنشا 120-ساتىعا جايعاسقان بولسا, يتاليالىق مامان دجانني دە بيازي جاتتىقتىراتىن ازەربايجان 116-ورىندا ورنالاسقان. قارسىلاس قۇراما ساپىندا جەرلەسىمىز, گەرمانيانىڭ «ەرتسگەبيرگە» كلۋبىنىڭ شابۋىلشىسى دميتري نازاروۆ ونەر كورسەتەدى. فۋتبول جانكۇيەرلەرىنىڭ ءبىرى بىلسە, ءبىرى بىلمەس, ول – سولتۇستىك قازاقستان وبلىسىنىڭ تۋماسى. دەگەنمەن د.نازاروۆ 2014 جىلدان بەرى ازەربايجان ۇلتتىق قۇراماسىندا ويناپ كەلەدى.
سونداي-اق ازەربايجان قۇراماسىنىڭ ساپىندا پورتۋگاليانىڭ «توندەلا» كلۋبىنىڭ شابۋىلشىسى رەنات داداشوۆ, تۇركيانىڭ «بۋرساسپور» كلۋبىنىڭ جارتىلاي قورعاۋشىسى ناميك الەسكەروۆ, زاگرەبتىڭ «ديناموسىندا» وينايتىن شابۋىلشى ماحير ەمرەلي سياقتى فۋتبولشىلار بار. قۇرامانىڭ دەنى جەرگىلىكتى «كاراباح» فۋتبول كلۋبىنىڭ فۋتبولشىلارىنان جاساقتالعان. وسى جيىنعا شاقىرىلعان 26 فۋتبولشىنىڭ توعىزى – وسى كلۋبتىڭ ويىنشىلارى. سونىمەن قاتار 2018 جىلى «استانا» كلۋبىندا ءبىر ماۋسىم ويناپ, قازاقستان چەمپيونى اتانعان, شىققان تەگى برازيليالىق ريچارد المەيدا دا ازەربايجان قۇراماسىندا وينايدى.
3 ماۋسىمدا وتەتىن ۇلتتار ليگاسى اياسىنداعى قازاقستان مەن ازەربايجان قۇرامالارى اراسىنداعى ماتچ ەكى ەل تاريحىنداعى ونىنشى كەزدەسۋ بولماق. قۇرامالار ەڭ العاش 2004 جىلى 28 ساۋىردە الماتىدا وتكەن جولداستىق ماتچتا كەزدەسىپ, ويىن قوناقتاردىڭ جەڭىسىمەن اياقتالدى – 3:2. قازاقستان قۇراماسى ساپىنان بۇل ماتچتا اندرەي كارپوۆيچ پەن ەۆگەني لۋنەۆ گول سوقتى.
كەيىننەن ەكى ەلدىڭ كوماندالارى ەۋروپا چەمپيوناتىنىڭ ىرىكتەۋ ماتچتارىندا ءتورت رەت كەزدەستى. سولاردىڭ العاشقىسى 2006 جىلى 6 قىركۇيەكتە باكۋدە ءوتىپ, ويىن 1:1 ەسەبىمەن تەڭ اياقتالدى. الاڭ يەلەرىنەن اندرە لاداگا ەسەپ اشسا, ارادا 20 مينۋت وتكەندە دميتري بياكوۆ تارازى باسىن تەڭەستىردى. قارىمتا كەزدەسۋ 2007 جىلى 6 ماۋسىمدا الماتىدا ءوتىپ, بۇل ماتچتا دا ءدال وسىنداي ەسەپ تىركەلدى – 1:1. گولدىڭ اۆتورلارى – ۆۋگار ناديروۆ پەن رۋسلان بالتيەۆ.
ەۋروپا چەمپيوناتىنىڭ ىرىكتەۋ شەڭبەرىندەگى كەلەسى كەزدەسۋ 2011 جىلى ۇيىمداستىرىلدى. 3 ماۋسىمدا قازاقستاندىقتار سەرگەي گريديننىڭ ءدۋبلى ارقاسىندا ەلوردادا 2:1 ەسەبىمەن جەڭىسكە جەتسە, 2011 جىلدىڭ 6 قىركۇيەگىندە باكۋدە وتكەن قارىمتا ماتچتا ءبىزدىڭ فۋتبولشىلار 3:2 ەسەبىمەن جەڭىلىپ قالدى. قازاقستان قۇراماسىنان سەرگەي وستاپەنكو مەن ۆيتالي ەۆستيگنەەۆ مەرگەندىگىمەن كوزگە ءتۇستى. ۇلتتىق قۇرامادا العاشقى ويىنىن وتكىزگەن ەۆستيگنەەۆ 77-مينۋتتا الاڭعا شىعىپ, ءبىرىنشى سوققىسىمەن-اق قارسىلاس كوماندانىڭ قاقپاسىن ءدال كوزدەگەن ەدى.
سونداي-اق قازاقستان مەن ازەربايجان قۇرامالارىنىڭ جولدارى حالىقارالىق تۋرنيرلەردە ءتۇيىستى. ماسەلەن, 2007 جىلى شىمكەنتتە ۇيىمداستىرىلعان «الما-تۆ» كۋبوگىنىڭ فينالىندا ەكى ەلدىڭ قۇراماسى كەزدەسىپ, ماتچتىڭ سوڭعى مينۋتتارىندا اندرەي فينونچەنكونىڭ سوققان گولىنىڭ ارقاسىندا جەرلەستەرىمىز 1:0 ەسەبىمەن جەڭىپ كەتتى.
قازاقستان مەن ازەربايجان قۇرامالارى ەۋروپا چەمپيوناتتارى مەن باسقا دا حالىقارالىق تۋرنيرلەر شەڭبەرىندەگى كەزدەسۋلەردەن بولەك, تاعى دا ءۇش مارتە جولداستىق ماتچ وتكىزدى. 2008 جىلى 3 اقپاندا تۇركيانىڭ انتاليا قالاسىنداعى ويىندا قارسىلاستار ءبىر-ءبىرىنىڭ قاقپاسىنا گول سوعا المادى. ەكى ەلدىڭ تاعى ءبىر جولداستىق ماتچى 2016 جىلدىڭ 26 ناۋرىزىندا تۇركيانىڭ بەلەك قالاسىندا ءوتتى. ويىن الدىندا قازاقستان قۇراماسىن بىرقاتار دەبيۋتانت فۋتبولشىلار تولىقتىردى. ولاردىڭ اراسىندا ۆلاديمير پلوتنيكوۆ, المير مۋحۋتدينوۆ, ەركەبۇلان تۇڭعىشباەۆ, رومان مۋرتازاەۆ جانە جاسۇلان مولداقاراەۆ بولدى. بۇل جولى قازاقستاندىقتار جىلدام گول سوعىپ, جەڭىسكە جەتتى. كەزدەسۋدىڭ 8-مينۋتىندا ماقسات بايجانوۆ كامران اگاەۆتىڭ قاقپاسىنا باسپەن گول سوقتى. ەسەپ – 1:0.
قازاقستان مەن ازەربايجان اراسىنداعى ماتچتار تاريحى ازىرگە 2018 جىلدىڭ 5 ماۋسىمىندا ەلوردادا وتكەن جولداستىق كەزدەسۋمەن قورىتىندىلانىپ تۇر. بۇل ويىندا ستانيمير ستويلوۆ شاكىرتتەرى رومان مۋرتازاەۆ, سەرىكجان مۇجىقوۆ جانە باقتيەر زاينۋتدينوۆتىڭ سوققان گولدارىنىڭ ارقاسىندا ءىرى ەسەپپەن جەڭىسكە جەتكەن-ءدى – 3:0. وكىنىشكە قاراي, سول ويىندا جارقىن ونەرىمەن كوزگە تۇسكەن باقتيەر زاينۋتدينوۆ پەن سەرىكجان مۇجىقوۆ جاراقاتتارىنا بايلانىستى جۇما كۇنى وتەتىن ماتچتا ۇلتتىق قۇراماعا كومەكتەسە المايتىن بولدى.
