اسكەري شەرۋگە دايىندىق بەلگىلەنگەن تارتىپپەن ويداعىداي جۇرۋدە

7 مامىر – وتان قورعاۋشىلار كۇنىندە ەلوردادا دۇركىرەپ وتەتىن سالتاناتتى اسكەري شەرۋگە دايىندىق جۇمىستارى استانا ىرگەسىندەگى ارنايى دالالىق لاگەردە وتۋدە. ونداعى ساردارلار مەن ساربازداردىڭ تىنىس-تىرشىلىگى مەن ازىرلىكتەرىن كورسەتۋ ءۇشىن قورعانىس مينيسترلىگىنىڭ وكىلدەرى جۋرناليستەردى ءجۇرىپ جاتقان جۇمىستارمەن تانىستىردى. لاگەردە تىگىلگەن شاتىر­لاردىڭ جالپى سانى 100-ءدى قۇراسا, ونىڭ 60-ى جەكە قۇرام ساربازدارىنا تيەسىلى. ال قالعان 40 شاتىر اسحانا, دارىگەرلىك پۋنكت, قويما سەكىلدى ورىندارعا بەرىلگەن. شەرۋگە دايىندالاتىن ساردارلار مەن ساربازداردىڭ ءبىر مەزگىل ويلارىن سەرگىتۋ ماقساتىندا لاگەردە مادەني شارالار وتكىزىپ تۇرۋ دا نازاردان تىس قالماعان. وسى تۇرعىدا وعان ارنايى ورىن دا بەلگىلەنىپتى. «بيىلعى شەرۋدىڭ ەرەكشەلىگى اسكەري تەحنيكالارعا باسا نازار اۋدارىلاتىندىعىندا دەر ەدىك. مەحانيكالاندىرىلعان تەحنيكانىڭ سانى كوبىرەك بولماق. ەلىمىز اسكەرىنىڭ كۇش-قۋاتىن, تەحنيكالىق جاراقتاندىرىلۋ الەۋەتىن كورسەتۋ شەرۋدەگى باستى ماقساتىمىز. وسىعان بايلانىستى ەلىمىزدىڭ وڭىرلەرىندەگى ءوندىرىس وشاقتارىندا جاسالاتىن وتاندىق اسكەري تەحنيكانى وسى شەرۋدە كورسەتەمىز. وعان ءبىز دايىنبىز», – دەيدى لاگەرلىك جيىننىڭ شتاب باستىعى, پولكوۆنيك قاسىمسەيىت ومىربەكوۆ. مۇنان كەيىن باق وكىلدەرى مەرەكەلىك سالتاناتتى شەرۋدە ساپ تۇزەپ وتەتىن جەكە قۇرامالاردىڭ دايىندىعىن دا تاماشالادى. ارنايى اۋەنمەن العا قارىشتاپ قادام باسقان ساربازدار وزدەرىنە بەرىلگەن تاپسىرمانى مۇلتىكسىز ورىنداۋدا. بۇلاردىڭ اراسىندا 80-نەن استام اسكەردە قىزمەت ەتەتىن نازىك جانداردان تۇراتىن قىزدار توبى دا بار. بۇل رەتتە ەرلەرمەن قوسا ولاردىڭ دايىندىقتارىنىڭ دا جوعارى دەڭگەيدە ەكەندىكتەرىن اسكەري شەرۋگە دايىندىق لاگەرلىك جيىنىنىڭ باستىعى, پولكوۆنيك قايدار قاراقۇلوۆ ەرەكشە ريزاشىلىقپەن جەتكىزدى. سونىمەن بىرگە ول اسكەريلەردىڭ شەرۋگە دەگەن ىنتالارىنىڭ دا جوعارى ەكەندىگىن اتاپ كورسەتتى. ءابدىراحمان قىدىربەك, «ەگەمەن قازاقستان». استانا.