پاسحا مەيرامىمەن قۇتتىقتادى

قازاقستان رەسپۋبليكاسىنىڭ پرەزيدەنتى ن.ءا.نازارباەۆ پاسحا مەيرامىمەن قۇتتىقتادى, دەپ حابارلادى قازاقستان پرەزيدەنتىنىڭ ءباسپاسوز قىزمەتى. قىمباتتى وتانداستار! بۇكىل جەر شارىنداعى ميلليونداعان ادام ەرەكشە سەزىممەن كۇتەتىن جارقىن مەرەكە – پاسحامەن شىن جۇرەكتەن قۇتتىقتايمىن! بۇل – حريستياندار ءۇشىن ەڭ قاستەرلى كۇن جانە بيىل ونى پراۆوسلاۆيەلىكتەر مەن كاتوليكتەردىڭ ءبىر مەزگىلدە مەرەكەلەۋىندە سيمۆولدىق ءمان بار, دەلىنگەن پرەزيدەنتتىڭ قۇتتىقتاۋىندا. مەملەكەت باسشىسى, سونداي-اق, پاسحانىڭ جاڭارۋ, شاتتىق جانە ءۇمىت لەبىن الا كەلەتىنىن, ونىڭ ىزگىلىك باستاۋىنىڭ, اقيقات پەن ادىلەتتىڭ سالتاناتىن پاش ەتىپ, يگى ىستەرگە شاقىراتىنىن اتاپ كورسەتەدى. بۇل كۇندەرى بارلىق ادامعا بىرلىك, سەنىم, ءوزارا قۇرمەت جانە سۇحباتتاسۋعا بەيىلدىلىك سياقتى قۇندىلىقتاردىڭ ومىرشەڭ ءمانى ايرىقشا ايقىن سەزىلەدى. گۋمانيستىك مۇراتتار ورتاق رۋحاني كەڭىستىك قالىپتاستىرا وتىرىپ, مەيلىنشە قۇندى بولا تۇسەدى, دەلىنگەن قۇتتىقتاۋدا. قازاقستان – قوعامنىڭ نىعايۋىنا, ەلدىڭ دامۋى مەن وركەندەۋىنە ولشەۋسىز ۇلەس قوساتىن بارلىق ءدىن ءۇشىن قۇشاعى اشىق ەل. ءبىزدىڭ مەملەكەتىمىز بارلىق كونفەسسيا وكىلدەرىنە جايلى احۋال قالىپتاستىرىپ وتىر. ءبىز ءبارىمىز بىرگە, سونىڭ ىشىندە پراۆوسلاۆيەلىكتەر مەن كاتوليكتەردىڭ دە بەلسەنە قاتىسۋىمەن تاتۋلىق پەن كەلىسىم ارقىلى قۋاتتى قازاقستاندى قالىپتاستىرۋدامىز, دەيدى پرەزيدەنت ءوزىنىڭ قۇتتىقتاۋىندا. پاسحا – ادامداردى جاقىنداستىرا تۇسەتىن وتباسىلىق مەرەكە جانە بۇل تاتۋ-ءتاتتى تۇراتىن, ورتاق بولاشاعىنا سەنىممەن قارايتىن الىپ شاڭىراق ىسپەتتى ءبىزدىڭ ەل ءۇشىن ەرەكشە ماڭىزدى, دەي كەلىپ, مەملەكەت باسشىسى قۇتتىقتاۋىن مىناداي سوزدەرمەن اياقتايدى: «مەنىڭ قۇتتىقتاۋىمدى جانە باقىت, يگىلىك, جان جىلۋىن تىلەگەن لەبىزىمدى قابىل الىڭىزدار! بارشا قازاقستاندىقتارعا ءوزارا تۇسىنىستىك پەن كەلىسىم تىلەيمىن!».