وتكەن سەنبىدە اتالعان پويىزدىڭ 5-ۆاگونىنا قۇرمانعازى اۋدانىنىڭ ورتالىعىنان كەنجەگۇل قايىربولاتوۆا مىنگەن. ماقساتى – اتىراۋ قالاسىنا جەتۋ. الايدا تاڭعى ساعات 5-تە جۇكتى كەلىنشەكتىڭ تولعاعى باستالعان. پويىز باستىعى ساۋلە ءىلياسوۆانىڭ جولسەرىكتەر بريگاداسى كومەككە ۇمتىلادى. نۇسقاۋلىققا سايكەس بولعان جايتتى ماشينيسكە حابارلاپ, جەدەل جاردەم بريگاداسىن ەڭ جاقىن ستانساعا شاقىرۋعا شەشىم قابىلدايدى.
الايدا جەدەل جاردەم بريگاداسىن كۇتۋ مۇمكىن بولمادى. پويىز جولسەرىكتەرى مىرزاگۇل قاراجىگىتوۆا, مارياش ورازعاليەۆا مەن لاۋرا كامالوۆا جۇكتى ايەلدى بوساندىرۋعا كىرىسەدى. تاڭعى ساعات 05:30-دا جەدەل جاردەم كولىگىندە ەمەس, پويىز ۆاگونىندا كىشكەنتاي بۇرىمدى دۇنيەگە كەلدى.
– جولاۋشىلار پويىزىندا جۇمىس ىستەگەن 15 جىلدا العاش رەت جۇكتى انانى بوساندىردىق. ءبىزدىڭ كومپانيادا وسىنداي توسىن جاعدايدا ارەكەت ەتۋگە ۇيرەتەدى عوي. سوندىقتان ءبىز ءار كەز جولاۋشىلارعا كومەك كورسەتۋگە دايىنبىز, – دەيدى ساۋلە ءىلياسوۆا.
اتىراۋ ستانساسىندا جەدەل جاردەم قىزمەتكەرلەرى جاڭا تۋعان ءسابيدى اناسىمەن بىرگە كۇتىپ الدى. دارىگەرلەر انانىڭ دا, ءسابيدىڭ دە دەنساۋلىعىن ءجىتى تەكسەردى.
– تولعاق باستالعاندا, الدىمەن ءسابيىمنىڭ دەنساۋلىعى ءۇشىن الاڭدادىم. بىراق جولسەرىكتەردىڭ جەدەل كومەگىنىڭ ناتيجەسىندە ۆاگوندا امان-ەسەن بوساندىم. بۇل – ەستەن كەتپەيتىن وقيعا. كەيىن قىزىم وسكەندە, قالاي, قايدا ومىرگە كەلگەنىن ايتىپ بەرەمىن, – دەيدى كەنجەگۇل قايىربولاتوۆا.
اتىراۋ وبلىسى
