باياعىدا وقۋشىلاردىڭ ايعايىنا شىداپ جۇرگەن سابىرلى مۇعالىم ء«بىر كۇنى مەن دە جارىلامىن» دەگەن ەكەن. شىدامنىڭ دا شەگى بار. وبلىس اكىمى ابىلقايىر سقاقوۆتىڭ ەكىباستۇزدىقتارمەن كەزدەسۋىندە جەرگىلىكتى تۇرعىندار كومەك سۇرادى. جىلادى. بۇل – قاقاعان قاڭتاردا پاتەرىندە اياعىنان سىز وتكەن بالانىڭ جاسى. ايازدى اقپاندا پالتومەن ۇيىقتاعان قاريالاردىڭ جانايقايى. جەلتوقساننىڭ جەلى تەرەزەدەن گۋلەپ, الاقانىن ۇرلەپ سۋىعان شايىن كەسەنىڭ تۇبىندە قالدىرعان جاس وتباسىلاردىڭ جان جاراسى.
ەنەرگەتيكتەر كوشەسى, 73 مەكەنجايىندا ورنالاسقان ءۇيدىڭ تۇرعىندارى سوڭعى 20 جىلدا جىلۋعا جارىماي وتىرعاندارىن جەتكىزدى. كوشەنىڭ اتاۋى ەنەرگەتيكتەر دەپ اتالعاننان نە پايدا؟ جيىندا 100 پاتەر يەسىنىڭ اتىنان سويلەگەن اجە ءار قىستا اۋرۋحاناعا تۇسەتىنىن, ۇيدەن دالا جىلى ەكەنىن اشىنا ايتتى. №28 شاعىن اۋداننىڭ تۇرعىندارى دا 1989 جىلدان بەرى مۇرىنىنان سۋ اعىپ, بۇرسەڭدەپ كەلەدى. ءۇش جىل بۇرىن اتالعان اۋداندا قۇبىرلار جاڭارتىلىپ, تۇرعىندار جىلۋدىڭ راحاتىن سەزىنەمىز دەپ قۋانۋى مۇڭ ەكەن, ءار جىلۋ ماۋسىمى سايىن قۇبىرلار جارىلاتىن كورىنەدى.
ال درۋجبا, جۇمات وماشەۆ جانە ۆوينوۆ-ينتەرناتسيوناليستوۆ كوشەلەرىنىڭ تۇرعىندارى 10 جىل بويى ورتالىقتاندىرىلعان جىلۋ جۇيەسىنە قوسىلا الماي جۇرگەندەرىن ايتتى. جاعالاي ورنالاسقان 15-كە جۋىق ءۇيدىڭ تۇرعىندارىنىڭ جانايقايى سول.
– ينجەنەرلىك يگىلىكتەردەن ماقۇرىم قالدىق. قالادا تۇرساق تا ءالى كۇنگە دەيىن پەش جاعامىز. قىسقى ماۋسىمدا 20 تونناداي كومىر تۇتىنامىز. كومىردىڭ ۇستىندە وتىرساق تا, قارا وتىننىڭ باعاسى جىل سايىن قىمباتتاۋدا. جىلۋ ەلەكتر ستانسالارىنىڭ ىرگەسىندە تۇرىپ, جىلۋعا جارىماي وتىرعانىمىز وكىنىشتى. اكىمدىك جىلۋ جەلىسىن ءۇيدىڭ اۋلاسىنا دەيىن جەتكىزىپ بەرسە, ءارى قاراي ۇيگە ءوزىمىز تارتىپ الاتىن ەدىك, – دەيدى تۇرعىندار.
بەلگىلى بولعانداي, شاھارداعى جىلۋ جەلىلەرىنىڭ ۇزىندىعى 422,83 شاقىرىمدى قۇرايدى. ونىڭ باسىم بولىگى «ەكىباستۇزجىلۋەنەرگو» جشس-ءنىڭ يەلىگىندە (342,622 شاقىرىم). بۇگىندە اتالعان مەكەمەنىڭ ەسەبىندەگى جىلۋ قۇبىرلارىنىڭ 85,98 پايىزى توزعان. وكىنىشكە قاراي, جىل سايىن جوندەلۋگە ءتيىس كولەمنىڭ جارتىسى عانا ورىندالادى. جىلۋ تاراتۋعا جاۋاپتى ۇيىم باسشىلىعى «تاريف قۇنى تومەن, سول سەبەپتى جوندەۋ جۇمىستارىنا قاراجات جەتپەيدى», دەپ وزدەرىنە شاڭ جۋىتقىسى جوق.
ءبىزدىڭ جازعانىمىز ەكى-ءۇش مىسال عانا. كۇن سايىن قالا اكىمىنىڭ سايتىنا كەلىپ تۇسەتىن وتىنىشتەر قانشاما؟! قىس بولسىن, جاز بولسىن كوممۋنالدىق ماسەلەلەر بويىنشا ارىزداناتىن ازاماتتار از ەمەس. ءوڭىردىڭ ينجەنەرلىك جەلىلەر جۇيەسى جاڭعىرتىلماي, شاعىمداردىڭ ازايۋى ەكىتالاي. مونوقالالاردى دامىتۋ جوباسى شەڭبەرىندە ەكىباستۇز قالاسىنا قازىنادان قوماقتى قاراجات قاراستىرىلعانى بەلگىلى. بۇل رەتتە, شاھاردىڭ كوممۋنالدىق جۇيەسى جاڭا كەيىپكە ەنەدى دەگەن سەنىم مول.
پاۆلودار وبلىسى,
ەكىباستۇز قالاسى
