بۇل سۋرەت كەشەگى 90-جىلداردا وقىعان وقۋشىلارعا تانىس بولۋى مۇمكىن. نەگە دەسەڭىز, كىشكەنتاي قىزدىڭ جارىعى مول بولمەدە تاڭعى جاتتىعۋ جاساپ جاتقان بەينەسى مەكتەپ وقۋلىقتارىندا ءجيى كەزدەسەتىن. بالالارعا جىلۋلىق سىيلايتىن كارتينا سۋرەتشىلەردىڭ ادەتتەگى ءبىر ەڭبەگىندەي قاراپايىم كورىنەدى. الايدا تۋىندىنىڭ سالىنۋ تاريحىنا زەر سالساق, بەيمالىم ادامدار مەن تاعدىرلارعا جولىعاسىڭ.
كارتيناداعى قىزدىڭ ءپروتوتيپى – لەنا. اناسى تاتيانا يابلونسكايا – ۋكرايندىق سۋرەتشى. قىزىنا قاراپ وتىرىپ, وسى سۋرەتتى 1954 جىلى كيەۆتەگى ۇيىندە سالعان. ول كەزدە لەنا 13 جاستا بولاتىن.
«تاڭ» كارتيناسىندا كيەۆتىڭ ءبىر پاتەرى سۋرەتتەلەدى. ءۇي ءىشى جاپ-جارىق, بوياۋى ءتۇرلى-ءتۇستى بولعانىمەن, شىن مانىندە لەنا وتباسىمەن وتە كەدەي تۇرعان ەكەن. ول اپكەسى ەكەۋى سىنىپتاستارىن ۇيىنە شاقىرۋعا دا ۇيالاتىن دەسەدى. كارتينانىڭ ءساتتى شىققانى سونشالىق, اتاعى بىردەن اسپانداي جونەلەدى. ءتىپتى كسرو-داعى ءاربىر ەكىنشى ءۇي وسى كارتينانى قابىرعاسىنا ءىلىپ قوياتىن بولعان. الايدا سۋرەتتىڭ اتاعى اۆتورعا تابىس اكەلمەگەن.
ال لەنا ايگىلى كارتينانىڭ اۆتورى يابلونسكايانىڭ قىزى ەكەنىن ەشكىمگە ايتپاعان. ول ماقتانۋدى ۇناتپايتىن, ەلەۋسىز ءومىر سۇرگەندى ۇناتاتىن ۇياڭ قىز بولىپ وسكەن دەسەدى.
ءدال وسى تۇستا الماتىدا تۇراتىن 14 جاستاعى ارسەن بەيسەمبينوۆ تە اتالعان كارتينانى توسەگىنىڭ باسىنا ءىلىپ قويىپ, وعان قاراپ ءتۇرلى قيالعا بەرىلەتىن. «بۇل قىز ومىردە بار ما, ەسىمى كىم, قازىر نە ىستەپ جاتىر ەكەن...» ارسەن وسىلاي سۋرەتتەگى كەيىپكەر قىزدى ىشتەي ۇناتا باستايدى. ايتا كەتەيىك, ونىڭ ءوزى دە سۋرەت سالعاندى جاقسى كورگەن.
مەكتەپ بىتىرگەن سوڭ ول ماسكەۋ جوعارى كوركەم-يندۋستريالدى كوللەدجىنە وقۋعا تاپسىرادى. تاعدىر دەگەن وسى شىعار, ءدال سول ۋاقىتتا لەنا دا مەكتەپ ءبىتىرىپ, كيەۆتەن ستروگانوۆقا كەلەدى.
ارسەن مەكتەپتى التىن مەدالمەن بىتىرگەندىكتەن سۋرەتشىلەر وقۋىنا قينالماي تۇسەدى. ال لەنا ەمتيحانداردان ارەڭ ءوتىپ, ستۋدەنت اتانادى. وسىلايشا, لەنا مەن ارسەن بىردەن دوستاسىپ, دوستىقتىڭ سوڭى ماحابباتقا ۇلاسادى.
ارسەن ءوزى جاقسى كورگەن كارتيناداعى قىزدىڭ لەنا ەكەنىن بىلمەيدى. دەگەنمەن ونى كورگەندە ەسكى تانىسىن كورگەندەي الابوتەن جىلىلىق سەزىنەتىن. كەيىن ارسەن لەنانى الماتىداعى ۇيىنە الىپ كەلگەندە قابىرعادا «تاڭ» كارتيناسى ءالى ءىلىنىپ تۇرعان ەدى. مىنە, بار اقيقات وسى تۇستا اشىلادى. «سەن بىلەسىڭ بە, كارتيناداعى قىز – مەن».
كارتيناداعى كەيىپكەر مەن كورەرمەندى تاعدىر قوسىپ, ەكەۋى شاڭىراق كوتەرىپ, لەنا قازاقستانعا كەلگەن. زاڭعار اتتى ۇلى قازىر اقش-تا تۇرادى.
ال ارسەن 2000 جىلى اۋىرىپ قايتىس بولدى. قونىس اۋدارعاندا كارتينانىڭ سول ءبىر كوشىرمەسى جوعالىپ كەتكەن, بىراق لەنا ءوزىنىڭ وزگە پورترەتىن كوزىنىڭ قاراشىعىنداي ساقتاعان. ونى ارسەن تانىسقاننان كوپ ۋاقىت وتپەي, قارىنداشپەن سالىپ بەرگەن بولاتىن. سۋرەتتىڭ ەكىنشى بەتىندە «مەن سەنى سۇيەمىن, بۇل سۋرەتتى جوعالتپا» دەگەن جازۋ بار.
