حالىقارالىق بالالاردى قورعاۋ كۇنى قارساڭىندا ۇيىمداستىرىلعان كورمەگە باستاۋىش سىنىپ وقۋشىلارى, اتا-انالار قاۋىمى قاتىستى. كىتاپحانانىڭ سايالى ساياباعىندا وتكەن شارادا اۆتوردىڭ وسى ۋاقىتقا دەيىن تۇسىرگەن بالالاردىڭ باقىتتى ءارى قىزىقتى ساتتەرىنەن ۇزدىك تۋىندىلار كورەرمەن نازارىنا ۇسىنىلدى.
– كىشكەنتاي بالالار سۋرەتكە تۇسۋدە تۇرلەرىن جاساندى ەتپەيدى. كۇلسە دە رياسىز, شىنايى كۇلەدى. سوڭعى جىلدارى بالالاردىڭ وسىنداي باقىتتى دا قايتالانباس ساتتەرىن باقىلاپ ءجۇرىپ, سۋرەتكە ءتۇسىردىم. ناتيجەسى مىنە, حالىققا كورمە رەتىندە ۇسىنىپ وتىرمىن, – دەيدى وبلىستىق «Didar» گازەتىنىڭ ءفوتوتىلشىسى تىلەۋبەك شاياحمەت.
ءفوتوتىلشىنىڭ اۋەلگى ماقساتى – شىعىستا فوتوونەردى دامىتۋ. ايتۋىنشا, ەڭ جەدەل اقپارات فوتو مەن بەينەروليك. سوندىقتان دا وسى سالاعا ءمان بەرۋىمىز كەرەك دەپ ەسەپتەيدى.
ء«بىزدىڭ بولاشاق» اتتى العاشقى جەكە فوتوكورمەسىندە اۆتور قاتىسۋشىلار تاراپىنان قويىلعان سۇراقتارعا جاۋاپ بەرىپ, شەبەرلىك ساعاتى ارقىلى فوتوعا ءتۇسۋدىڭ جانە تۇسىرە ءبىلۋدىڭ قۇپيالارىمەن ءبولىستى. سونداي-اق فوتوگراف كىتاپحاناعا وسكەمەننىڭ كورىكتى جەرلەرى مەن ءارتۇرلى مەرەكە كۇندەرىندە تۇسىرىلگەن فوتوسۋرەتتەر جيناعىن سىيلادى.
كورىكتى كورمە الداعى ۋاقىتتا وسكەمەندەگى مەتاللۋرگتەر ساياباعىندا, ارباتتا جالعاسىن تابادى. ءفوتوتىلشىنىڭ جوسپارىنا قۇلاق تۇرسەك, كورمە بالالار كۇنىمەن عانا توقتاپ قالمايدى, الداعى مەرەكە-مەيرامداردا دا تاقىرىپتىق كورمەلەر ۇيىمداستىرۋدى جوسپارلاپ وتىر. ماسەلەن, ءار ماماندىقتىڭ مەرەكەسى قارساڭىندا فوتوسۋرەت ارقىلى سول جۇمىستىڭ قىزىعى مەن شىجىعىن سۋرەتكە تارتىپ, حالىق نازارىنا ۇسىنۋدى كوزدەيدى.
شىعىس قازاقستان وبلىسى
