ءبىلىم جانە عىلىم مينيسترلىگىنە قاراستى بالالار قۇقىقتارىن قورعاۋ كوميتەتىنە ءبىر ايدا 110 نىسانداعى كەلەڭسىزدىكتەر تۋرالى 1 مىڭنان اسا حابارلاما تۇسكەن. شاعىمداردىڭ باسىم بولىگى مەكتەپتەردەگى سانيتارلىق-گيگيەنالىق جاعدايلارعا بايلانىستى بولدى.
اتالعان كوميتەت ەلىمىزدەگى وقۋشىلارمەن جانە اتا-انالارمەن بىرلەسىپ, مەكتەپ اجەتحانالارى مەن اسحانالارىنداعى كەمشىلىكتەردى انىقتاۋ, مەكتەپتەردى جابدىقتاۋ جانە ولاردى ۇستاۋعا قارجى الاتىن اكىمدىكتەرمەن ەسكەرتۋلەردى جويۋ ماقساتىندا «بالاعا لايىق» اكتسياسىن باستاعان.
بالالار قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ: «اكتسيانىڭ ءبىرىنشى كەزەڭى اياقتالدى. جۇمىستى بەلسەندى جۇرگىزۋ ءۇشىن بارلىق وبلىستىڭ ءبىلىم باسقارمالارىمەن, بالالار وكىلدىكتەرىمەن ونلاين كەزدەسۋلەر وتكىزىلدى. ءبىلىم بەرۋ ۇيىمدارىندا مەسسەندجەرلەردىڭ QR-كودتارى بار بۋكلەتتەر تاراتىلعان», دەدى.
ە.يمانعاليەۆتىڭ مالىمدەۋىنشە, ءبىلىم وردالارىنىڭ سانيتارلىق-تۇرمىستىق جاعدايى مەن اسحانالارىنىڭ جاي-كۇيىنە قاتىستى بارلىق شاعىم اكىمدىكتەرگە جىبەرىلەدى. اكتسيا كەزىندە انىقتالعان كەمشىلىكتەر مەن ەسكەرتۋلەردى جويۋعا 1 قىركۇيەككە دەيىن ۋاقىت بەرگەن. ناتيجەسىندە Instagram-داعى @balaga.laiyq پاراقشاسىندا مەكتەپ اجەتحانالارى مەن اسحانالارىنىڭ «دەيىنگى جانە كەيىنگى» فوتو-ۆيدەولارى جاريالانادى.
اكتسيانىڭ ەكىنشى كەزەڭى جاڭا وقۋ جىلىندا باستالادى. ءبىر اي بۇرىن باستالعان اكتسيا «مەكتەپتىڭ جاقسارۋىنا كومەكتەس!» ۇرانىمەن ءوتىپ جاتىر. مونيتورينگ جازالاۋ ءۇشىن ەمەس, بالالارعا سانيتارلىق-گيگيەنالىق جاعدايلار جاسالماعان ءبىلىم بەرۋ ۇيىمدارىن انىقتاۋعا باعىتتالعان. بۇل رەتتە مەكتەپ اسحانالارىندا پروبلەمالى جۋىناتىن بولمەلەر, زاڭ بۇزۋشىلىقتار جايلى حابار بەرگەندەردىڭ اتى-ءجونى, ولار تۋرالى اقپاراتتاردىڭ جاريالانبايتىنىنا كەپىلدىك بەرىلەدى.
وسىعان دەيىن مينيسترلىك بىرقاتار وبلىستىڭ اكىمدىكتەرىنە اۋلاداعى دارەتحانالاردى جويۋ جانە مەكتەپتەردە بالالاردى قورعاۋ ءۇشىن دابىل تۇيمەلەرىمەن, بەينەكامەرالارمەن جانە باسقا دا قاۋىپسىزدىك جۇيەلەرىمەن جۇمىس جۇرگىزبەگەن لاۋازىمدى تۇلعالاردى جاۋاپقا تارتۋ تۋرالى حات جولداعان ەدى.
بالجان نۇرعاليقىزى,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ
2-كۋرس ستۋدەنتى
