16 مامىردا قازاقستاندا اۆتوكولىككە جەڭىلدەتىلگەن نەسيە باعدارلاماسى ەنگىزىلدى. تومەن پايىزبەن كولىك العىسى كەلەتىندەر سانى كۇن ساناپ ارتىپ كەلەدى. العاشقى كۇندەرى ءىرى قالالارداعى اۆتوسالونداردا ۇزىن-سونار كەزەك پايدا بولدى. قازىر جاعداي تۇراقتالدى.
«باعدارلاما جۇزەگە اسىپ جاتىر. العاشقى كۇندەردەگىدەي قالىڭ كەزەك بۇگىندە بايقالمايدى. 31 مامىر تاڭەرتەڭگى جاعداي بويىنشا 23 719 ءوتىنىش ءتۇسىپ, ونىڭ 9 918-ءى ماقۇلداندى. بۇل - 73,3 ملرد تەڭگە. بارلىعى 1 188 اۆتوكولىك بەرىلدى», دەيدى قازاقستان اۆتوبيزنەس قاۋىمداستىعىنىڭ وكىلى قايرات ەلامانوۆ.
ونىڭ ايتۋىنشا, حالىق اراسىندا بەرىلىس قورابى اۆتوماتتى تۇردەگى بيۋدجەتتىك كولىكتەر جوعارى سۇرانىسقا يە.
«كولىك قۇنىنا كەلەتىن بولساق, باعدارلاما ونىڭ باعاسىنا اسەر ەتكەن جوق. بىراق وتكەن جىلمەن سالىستىرعاندا بيىل كەيبىر ۇلگىلەرگە تۇزەتۋلەر ەنگىزىلگەنىن ەسكەرتەمىن. بۇل الەمدەگى گەوساياسي جاعدايعا, تەڭگە باعامىنىڭ اۋىتقۋىنا, لوگيستيكالىق قىزمەتتەردىڭ قىمباتتاۋىنا, سونداي-اق بىرقاتار ەكونوميكالىق سەبەپكە بايلانىستى», دەپ ءتۇسىندىردى سپيكەر.
سونىمەن قاتار ول بۇگىندە ديلەرلىك ورتالىقتاردا كولىك تاپشىلىعى جوق ەكەنىن تىلگە تيەك ەتتى.
الماتىداعى اۆتوسالونداردىڭ ءبىرىنىڭ دامۋ جونىندەگى ديرەكتورى الەكساندر ابراموۆتىڭ ايتۋىنشا, جەڭىلدەتىلگەن نەسيە باعدارلاماسىنا باستاپقىدا تانىمال كورەي كولىگىنىڭ بىرنەشە ۇلگىسى ەنگىزىلگەن.
«بۇگىنگى تاڭدا جەڭىلدەتىلگەن باعدارلاما بويىنشا تولەۋگە 2 مىڭعا جۋىق شوت-فاكتۋرا شىعارىلدى, ونىڭ ىشىندە 300-دەن استام اۆتوكولىك راسىمدەۋ ساتىسىندا. قازىردىڭ وزىندە قازاقستان بويىنشا 130-عا جۋىق كولىك ساتىلدى. كليەنتتەر نەگىزىنەن نۇر-سۇلتان, الماتى جانە شىمكەنت قالالارىنان», دەدى ول.
سونىمەن قاتار سپيكەر اۆتوكولىك ساتاتىن ورتالىقتاردا قوسىمشا جابدىق الۋعا ماجبۇرلەۋ زاڭسىز جانە وعان تىيىم سالىنعانىن باسا ايتتى.
«ەگەر كليەنت وسىنداي جاعدايعا تاپ بولسا, وندا ول 7007 ءنومىرى بويىنشا اۆتوورتالىق قولداۋ قىزمەتىنە حابارلاسا الادى», دەدى الەكساندر ابراموۆ.
ەسكە سالايىق, قازاقستاندا اۆتوكولىككە جەڭىلدەتىلگەن نەسيە بەرۋ 16 مامىردا باستالدى. باعدارلامانىڭ نەگىزگى شارتتارى مىناداي:
ءبىر جەڭىل اۆتوكولىكتى قارجىلاندىرۋ سوماسى 10 ملن تەڭگەدەن اسپايدى;
ءبىر زاەمشى ەكى جىلدىڭ ىشىندە ءبىر رەت قانا اۆتوكولىكتى جەڭىلدەتىلگەن نەسيەمەن الا الادى;
قارجىلاندىرۋ مەرزىمى 7 جىلدان اسپايدى;
باستاپقى جارناسى - 0%;
كولىك قۇرالىنىڭ قۇنى 15 ملن تەڭگەدەن اسپاۋى قاجەت.
ايانا توعانبەك
