Kaspersky كومپانياسىنىڭ ءباسپاسوز قىزمەتىنىڭ مالىمدەۋىنشە, 2022 جىلدىڭ ءبىرىنشى توقسانىندا قازاقستاندا بالالار اراسىنداعى ەڭ تانىمال قوسىمشا YouTube بولدى. ونىڭ ۇلەسىنە جىلدىڭ العاشقى ءۇش ايىندا ەڭ تانىمال ون قوسىمشادا وتكىزگەن ۋاقىتىنىڭ 30% تيەسىلى. ۇشتىككە سونىمەن قاتار WhatsApp جانە TikTok جەلىلەرى كىردى. ساراپشىلار وسىعان بايلانىستى كيبەرقاۋىپسىزدىك شارالارىن كۇشەيتۋدى ۇسىنىپ وتىر.
«زاماناۋي تەحنولوگيانىڭ پايدالى قىزمەتتەرى بالالاردىڭ مۇددەسىن جاقسى ءتۇسىنىپ, ولاردى قاۋىپتى اقپاراتتان قورعاۋعا كومەكتەسەدى. الايدا تەحنيكالىق مۇمكىندىكتەردى قولدانعان كەزدە جەكە شەكارا تۋرالى ۇمىتپاۋىمىز كەرەك. ويتكەنى, بالا – بۇل كىشكەنتاي تۇلعا», دەيدى Kaspersky كومپانياسىنىڭ ورتالىق ازياداعى كوممەرتسيالىق ديرەكتورى ۆالەري زۋبانوۆ.
ەندى اتا-انالار YouTube ۆيدەوحوستينگىنە ارنالعان جاڭا قىزمەت ءتۇرى ارقىلى ەرەسەكتەر مەن بالالاردىڭ قانداي بەينە كورگەنىن باقىلاي الادى.
اتالعان كومپانيا بالالاردىڭ جەلىدەگى قاۋىپسىزدگىن قامتاماسىز ەتۋ ماقساتىندا اتا-انالارعا بىرنەشە كەڭەس بەرەدى:
- بالالارمەن عالامتورداعى ءومىرى تۋرالى كوبىرەك سويلەسۋ;
- قۇپيالىلىق تۋرالى كەلىسىمدەردى مۇقيات وقىپ شىعۋعا ۇيرەتۋ;
- قاجەت بولسا اتا-انا باقىلاۋىنا ارنالعان قوسىمشانى ورناتۋ. بىراق بالاعا بۇل باعدارلامانىڭ ماقساتىن جانە مۇنداي شەشىمدى قابىلداۋ سەبەبىن ءتۇسىندىرۋ قاجەت.
سالتانات كەنجەباي
