ءۇش اپتاعا سوزىلعان باسەكەدە ۆەلوشاباندوزدار ماجارستان مەن سلوۆەنيانىڭ شەكاراسىن كەسىپ ءوتىپ, يتالياداعى جارىس كەزەڭدەرىن قوسا ەسەپتەگەندە, جالپى ۇزاقتىعى 3445,6 شاقىرىم جولدى ارتتا قالدىردى. سونداي-اق سپورتشىلار وسى ارالىقتا بيىكتىگى 50 شاقىرىمعا دەيىن جەتەتىن ەتنا, بلوكحاۋس, مورتيرولو, پوردوي, فەدايا سياقتى تاۋلى كەزەڭدەردى دە باعىندىردى.
بيىل 105-ءشى مارتە ۇيىمداستىرىلعان «دجيرو د’يتاليا» دوداسى ماجارستاندا جالپى كەزەڭمەن باستالىپ, جەكەلەي جارىس كەزەڭىمەن مارەسىنە جەتتى. ۆەرونا قالاسىنىڭ 4-ساناتتاعى بيىك شىڭىمەن وتكەن سوڭعى جارىس كۇنىندە 25 جاستاعى يتاليا چەمپيونى ماتتەو سوبرەرو (BikeExchange – Jayco) جەڭىمپاز اتاندى. ول 17,4 شاقىرىم قاشىقتىقتى 22 مينۋت 24,54 سەكۋندتا ورتاشا 46.588 كم/ساع جىلدامدىقپەن ءجۇرىپ ءوتتى. مارە سىزىعىن جەڭىمپازدان 15 سەكۋند كەيىن كەسكەن Team DSM ۆەلوكومانداسىنىڭ وكىلى تيمەن ارەنسمان (نيدەرلاند) ەكىنشى ورىنعا يە بولسا, تاعى ءبىر نيدەرلاندتىق ۆەلوشاباندوز ماتە ۆان دەر پۋل (Alpecin-Fenix) ءۇشىنشى ورىنعا تابان تىرەدى. ول ماتتەو سوبرەرودان 33 سەكۋندقا قالىپ قويدى.
BikeExchagne-Jayco ۆەلوكومانداسىنىڭ وكىلدەرى بيىلعى «دجيرو د’يتاليانىڭ» ەكى بىردەي جەكەلەي كەزەڭىندە ۇزدىك شىقتى. بۋداپەشتتە 9 شاقىرىمعا سوزىلعان العاشقى جەكەلەي جارىستا سايمون يەيتس توپ جارسا, كۇنى كەشە ماتتەو سوبرەرو الدىنا جان سالمادى. سونداي-اق س.يەيتس 14-كەزەڭنىڭ جەڭىمپازى اتاندى.
سوڭعى كەزەڭدەگى م.سوبرەرونىڭ جەڭىسى جالپى ەسەپتەگى ۇزدىك ۇشتىكتىڭ ناتيجەسىنە ەش اسەر ەتكەن جوق. 21 كەزەڭنىڭ قورىتىندىسى بويىنشا, بيىلعى «دجيرو د’يتاليا» دوداسىندا 26 جاستاعى اۋستراليالىق دجەي حيندلي (Bora-hansgrohe) 86 ساعات 31 مينۋت 14 سەكۋند كورسەتكىشىمەن باس جۇلدەنى جەڭىپ الدى. بۇل ونىڭ كارەراسىنداعى ءتورتىنشى «دجيروسى» بولدى. 9-شى ەڭ بيىك تاۋلى كەزەڭدە جەڭىمپاز اتانعان حيندلي 14-كەزەڭنەن 19-كەزەڭگە دەيىن جالپى ەسەپتە ەكۆادورلىق ريچارد كاراپاستى (Ineos) وكشەلەپ كەلدى دە, سوڭعى اسا كۇردەلى تاۋلى 20-كەزەڭدە ونى شاڭ قاپتىرىپ, كوشباسشىعا تيەسىلى قىزعىلت جەيدەسىن كيدى. ال جالپى ەسەپتە ەكىنشى ورىنعا تابان تىرەگەن ر.كاراپاس اۋستراليالىقتان 1 مينۋت 18 سەكۋندقا قالىپ قويسا, ۇزدىك ۇشتىكتى دجەي حيندليدەن 3 مينۋت 24 سەكۋند ۇتىلعان «استانانىڭ» ەكس-ۆەلوشاباندوزى يسپانيالىق ميكەل لاندا (Bahrain Victorious) قورىتىندىلادى.
ال قازاقستاندىق «استانا» ۆەلوكلۋبىنىڭ وكىلدەرى اراسىندا ەڭ ۇزدىك ناتيجەگە «دجيرو د’يتاليانىڭ» ەكى دۇركىن جەڭىمپازى, 37 جاستاعى ارداگەر ۆەلوشاباندوز يتاليالىق ۆينچەنتسو نيبالي قول جەتكىزدى. جەڭىمپازدان 9 مينۋت 2 سەكۋندقا قالىپ قويعان نيبالي جالپى ەسەپتە ءتورتىنشى ورىنعا تۇراقتادى. Astana Qazaqstan Team باسشىلىعىنىڭ اۋەلگى جوسپارى بويىنشا بيىلعى دودادا ميگەل انحەل لوپەسكە سەنىم ارتىلىپ, بۇكىل كوماندالاستارى كولۋمبيالىقتىڭ كومبەگە قاراي ەركىن جەتۋىنە مۇمكىندىك جاساۋعا ءتيىس ەدى. الايدا لوپەس «دجيرونىڭ» 4-كەزەڭىندە جاراقاتىنا بايلانىستى جارىستى ەرتە اياقتاۋعا ءماجبۇر بولدى. ءسويتىپ, كوماندانىڭ بار جاۋاپكەرشىلىگى ۆينچەنتسوعا جۇكتەلدى. جارىس بەل ورتاعا تاياعان تۇستا, ياعني 9-كەزەڭدە نيبالي سەگىزىنشى ورىنعا تابان تىرەسە, 14-كەزەڭدە جۇلدەلى ورىنعا ءبىر ساتى قالعاندا توقتادى. ءسويتىپ, وسى كەزەڭنەن باستاپ ول جالپى ەسەپتەگى توپ-10 ۆەلوشاباندوزدىڭ قاتارىنا قوسىلدى. ودان كەيىن «استانا» كاپيتانى 16-كەزەڭدە بەسىنشى, 18-كەزەڭدە ءتورتىنشى ورىنعا كوتەرىلدى. ءدۇبىرلى دودا اياقتالعانعا دەيىن ۆينچەنتسو سول ورنىن ساقتاپ قالدى.
بيىلعى «دجيرو د’يتاليانىڭ» جەكەلەي اتالىمدارىنا توقتالار بولساق, 30 جاستاعى فرانتسيالىق ارنو دەمار (Groupama-FDJ) كارەراسىندا ەكىنشى رەت ۇپاي كلاسسيفيكاتسياسىندا توپ جارسا, 28 جاستاعى نيدەرلاندتىق كۋن باۋمان (Jumbo-Visma) تاۋلى كەزەڭىنىڭ ۇزدىگى اتاندى. سونداي-اق Trek-Segafredo كومانداسىنىڭ يسپانيالىق وكىلى حۋان پەدرو لوپەس جارىستىڭ ەڭ ۇزدىك جاس ۆەلوشاباندوزى اتاعىنا يە بولدى. بۇل سىندا 22 جاستاعى قازاقستاندىق ۆاديم پرونسكي بەسىنشى ورىنعا تۇراقتادى. ال Bahrain Victorious ۆەلوكلۋبى كوماندالىق جالپى ەسەپتە ۇزدىك شىقتى. «استانا» ۇجىمى بەسىنشى ساتىعا جايعاستى.
