ءىس-شاراعا قازاقستانداعى ازەربايجان رەسپۋبليكاسى ەلشىلىگىنىڭ, ەلوردالىق ەتنومادەني ورتالىقتاردىڭ جانە جاستار قاناتتارىنىڭ وكىلدەرى قاتىستى. دەلەگاتسيا ەتنومادەني بىرلەستىكتەردىڭ كابينەتتەرىندە بولىپ, ەتنوستاردىڭ كوپعاسىرلىق تاريحىمەن جانە مادەنيەتىمەن تانىستى.
نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ مەيمانعا ەتنوسارالىق كەلىسىمنىڭ قازاقستاندىق ۇلگىسى تۋرالى ايتىپ, قاتىسۋشىلاردى كىتاپتىڭ تۇساۋكەسەرىمەن قۇتتىقتادى.
كىتاپتىڭ اۆتورى – ازەربايجان تاريحشىسى, ساياساتتانۋشى, ازەربايجان SVS تەلەارناسىنىڭ «سىرتقى ىستەر اسپەكتىلەرى» باعدارلاماسىنىڭ جۇرگىزۋشىسى, ازەربايجاننىڭ دياسپورالارمەن جۇمىس جونىندەگى مەملەكەتتىك كوميتەتىنىڭ ساراپشىسى اتاەۆ تەيمۋر وكتاي وگلى.
تاريحنامادا العاش رەت ابايدىڭ ويلارىن قۇران اياتتارىمەن سالىستىرۋعا تالپىنىس جاسالدى. اباي يدەيالارىن تولىق ءتۇسىنۋ ءۇشىن اۆتور قازاق تاريحىنىڭ ماڭىزدى بەتتەرىنە جانە ويشىل ءومىربايانىنىڭ ماڭىزدى ەپيزودتارىنا جۇگىنەدى. ونىڭ پىكىرىنشە, بۇل ابايدىڭ بارلىق ۋاقىتتا دا وزەكتى جولدارىن تەرەڭىرەك تۇسىنۋگە مۇمكىندىك بەرەدى.
اتاەۆ تەيمۋر وكتاي وگلى ءوزىنىڭ قۇتتىقتاۋ سوزىندە ەلىمىزدىڭ ساياساتىن جۇزەگە اسىرۋ ءۇشىن قۇرىلعان, الەمدە بالاماسى جوق قوعامدىق ينستيتۋت – قازاقستان حالقى اسسامبلەياسى تۋرالى ايتىپ, ادەمى عيماراتتا ەتنومادەني بىرلەستىكتەردىڭ قىزمەتىن دامىتۋ ءۇشىن بارلىق جاعداي بار ەكەنىن اتاپ ءوتتى.
ازەربايجان رەسپۋبليكاسىنىڭ قازاقستانداعى ەلشىلىگىنىڭ كەڭەسشىسى كيازيموۆ روۆشان دجاۆانشير وگلى ءىس-شارانى ۇيىمداستىرۋشىلارعا العىسىن ءبىلدىردى.
كەزدەسۋ سوڭىندا اۆتور دوستىق ۇيىنە كىتاپتار تابىستاپ, وقىرماندارعا قولتاڭبا بەردى.
