رەفەرەندۋمدى قوعامدىق قولداۋ رەسپۋبليكالىق شتابىنىڭ قولداۋىمەن وتكەن ءىس-شارانى اقپارات جانە قوعامدىق دامۋ مينيسترلىگىنىڭ «قازاقستاندىق قوعامدىق دامۋ ينستيتۋتى» كەاق ۇيىمداستىردى.
جيىنعا قاتىسۋشىلارى الداعى رەفەرەندۋمنىڭ ەلدى دامىتۋ مەن قوعامدى دەموكراتيالاندىرۋداعى ماڭىزىن, سونداي-اق جاڭا قازاقستاندى قۇرۋداعى كونستيتۋتسيالىق رەفورمانىڭ ءرولىن تالقىلادى. ساراپشىلار مەملەكەتتىڭ باستى قۇجاتىنا ەنگىزىلەتىن وزگەرىستەر مەن تولىقتىرۋلاردىڭ ەلىمىزدىڭ ساياسي جۇيەسىنە قالاي اسەر ەتەتىنى تۋرالى پىكىر الماستى.
جيىنعا اقتاۋ قالاسى اكىمىنىڭ ورىنباسارى ابىلقايىر بايپاقوۆ, وبلىستىق جانە قالالىق ءماسليحات دەپۋتاتتارى, مەملەكەت جانە قوعام قايراتكەرلەرى, ساياساتتانۋشىلار, سونداي-اق قازاقستاننىڭ قوعامدىق دامۋ ينستيتۋتىنىڭ ساراپشىلارى قاتىستى.
ءىس-شاراعا مودەراتورلىق جاساعان «قازاقستاندىق قوعامدىق دامۋ ينستيتۋتى» كەاق باسقارما توراعاسىنىڭ كەڭەسشىسى سامات نۇرتازا الداعى رەفەرەندۋم مەملەكەتتىڭ ساياسي جۇيەسىن دەموكراتيالاندىرۋ مەن ليبەراليزاتسيالاۋ ءجۇرىپ جاتقانىن كورسەتەتىنىن اتاپ ءوتتى. «بۇل مەملەكەتتى وزگەرتۋ مۇمكىندىگى. مەملەكەت باسشىسى حالىقپەن اقىلداسىپ, جاۋاپكەرشىلىكتى ءبولىسىپ جانە حالىقتىڭ كەرى بايلانىسقا شىعۋىن قالايدى. بىزگە ليبەراليزمدى, دەموكراتيانى جانە ەڭ باستىسى ادىلەتتىلىكتى تاڭداۋ ۇسىنىلادى», دەدى ول.
وتىرىستا ءسوز العان اقتاۋ قالاسى اكىمىنىڭ ورىنباسارى Əبىلقايىر بايپاقوۆ: «كونستيتۋتسيالىق رەفورما بۇكىل مەملەكەتتىك مودەلدى كەشەندى تۇردە ترانسفورماتسيالاۋعا باعىتتالعان. ءبىز ەلىمىزدىڭ بولاشاعىنا نەمقۇرايدى قاراماۋىمىز كەرەك. قازاقستاننىڭ بولاشاعى ءبىزدىڭ قولىمىزدا, ءبىز قابىلدايتىن شەشىمدەردەن قۇرالادى», دەدى.
ماڭعىستاۋ وبلىستىق ءماسليحاتىنىڭ دەپۋتاتى اببات ورىسباەۆ پرەزيدەنتتىڭ باستاماسىن قولداۋعا شاقىرىپ, بۇل وزگەرىستەر حالىق وتىنىشىنە دەگەن جاۋاپ ەكەنىن اتاپ ءوتتى. «حالىق كونستيتۋتسياعا ەنگىزىلىپ وتىرعان وزگەرىستەردى قولداپ جاتقاندىعىن بايقاپ ءجۇرمىز, دەگەنمەن ءاربىر ازاماتتىڭ داۋىسى ماڭىزدى بولعاندىقتان وتكىزىلگەلى وتىرعان رەفەرەندۋم تۋرالى نەعۇرلىم كوپ اقپارات ايتىپ, اقپاراتتاندىرۋ جۇمىستارىن قارقىندى جالعاستىرۋ كەرەك», دەدى ول.
سوڭعى الەۋمەتتىك ساۋالداما ناتيجەلەرى بويىنشا رەفەرەندۋمدى حالىقتىڭ 72%-دان استامى قولداعان. بۇل تۋرالى ققدي ساراپشىسى جاقسىبەك جيەناليەۆ مالىمدەدى. «كونستيتۋتسياعا وزگەرىستەر مەن تولىقتىرۋلاردى ەنگىزۋ بۇعان دەيىن دە بولعانى بەلگىلى. وسى ۋاقىتقا دەيىن وزگەرتۋلەر پارلامەنت قاراۋىنا ۇسىنىلىپ, دەپۋتاتتاردىڭ ماقۇلداۋىمەن وزگەرەتىن.
سوڭعى الەۋمەتتىك ساۋالدامانىڭ ناتيجەسى بويىنشا 72%-دان استام حالىق رەفەرەندۋمدى قولداپ وتىر. بۇل جاقسى كورسەتكىش, ازاماتتارىمىزدىڭ ساياسي بەلسەندىلىگى جوعارى ەكەنى بايقالادى. قازاقستاندا 11 ميلليوننان استام ادام رەسپۋبليكالىق رەفەرەندۋمعا قاتىسا الادى, ولاردىڭ باسىم بولىگى جاستار. ياعني 18-45 جاس ارالىعىنداعى ءاربىر قازاقستاندىق ءبىرىنشى رەت ءوز تاڭداۋىن جاساپ, ەلىمىزدىڭ ءادىل ءارى دامىعان مەملەكەت بولۋىنا ءوز ۇلەسىن قوسايىن دەپ وتىر», دەپ اتاپ ءوتتى ا.ورىسباەۆ.
