اۆتونارىقتى تالداۋ جانە مونيتورينگىلەۋ ورتالىعىنىڭ باسشىسى ارتۋر ميسكارياننىڭ مالىمەتىنشە, ساۋىردە كوپ ساتىلعان توپ-5 برەندتىڭ قاتارىنا Chevrolet (3 004 ساتىلعان), Hyundai (1 802), KIA (968), Toyota (950) جانە LADA (798) ەنگەن.
– ءساۋىر ايىنىڭ قورىتىندىسى العاشقى وندىقتاعى بىرقاتار تانىمال برەندتىڭ ساتىلىمىنىڭ ايتارلىقتاي تومەندەگەنىن كورسەتتى. مىسالى, Nissan ساتىلىمى 81 پايىزعا, Volkswagen – 81 پايىزعا, GAZ – 78 پايىزعا, Renault – 67 پايىزعا قۇلدىرادى, – دەدى ا.ميسكاريان.
2022 جىلدىڭ قاڭتار-ءساۋىر ارالىعىندا كوپ ساتىلعان برەندتەردىڭ بەستىگى كەلەسىدەي: Hyundai – 8 675, Chevrolet – 5 893, KIA – 3 326, LADA – 3 121 جانە Toyota – 3 094.
ساراپشىنىڭ پىكىرىنشە, كولىك تاپشىلىعى مەن لوگيستيكالىق پروبلەمالارعا گەوساياسي جاعداي قوسىلدى. بۇل نارىقتىڭ كەيبىر قاتىسۋشىلارىنىڭ جۇمىسىنا ءسوزسىز اسەر ەتتى.
– قازىرگى جاعدايدا وزىمىزدە قۇراستىرىلعان اۆتوموبيلدەردى ساتىپ العانداردىڭ ۇپايى تۇگەل. بىرىنشىدەن, وتاندىق ونىمدەردىڭ باعاسى يمپورتتىق اۆتوموبيلدەرمەن سالىستىرعاندا شامالى عانا قىمباتتادى. ەكىنشىدەن, جەڭىلدەتىلگەن باعدارلاما بويىنشا اۆتوكولىك ساتىپ الۋ مۇمكىندىگى بەرىلىپ وتىر, – دەپ ناقتىلادى اۆتونارىقتى تالداۋ جانە مونيتورينگىلەۋ ورتالىعىنىڭ باسشىسى.
ساراپشى ۆاليۋتا نارىعىنداعى وزگەرىستەردى دە ەستەن شىعارۋعا بولمايتىنىن ەسكەرتتى. 1 ءرۋبلدىڭ باعامى 7 تەڭگە ەكەنىن ەسكەرسەك, بۇل رەسەيلىك تۇتىنۋشىلاردىڭ قازاقستاننان اۆتوكولىك ساتىپ الۋ جولىن قاراستىرۋعا نەگىز بولماق.
– سوڭعى ەكى ايدا «رەسەيدەن كەلەتىن ساتىپ الۋشىلار اعىنى» ميفولوگيالىق سيپاتقا يە بولىپ كەلدى. ەگەر كۋرس ۇزاق ۋاقىت بويى وسى دەڭگەيدە ساقتالسا, رەسەيلىكتەردەن ناقتى سۇرانىس ءتۇسۋى ابدەن مۇمكىن, – دەدى ا.ميسكاريان.
ەسكە سالا كەتەيىك, 16 مامىردا قازاقستاندا جەڭىلدەتىلگەن اۆتونەسيە باعدارلاماسى ىسكە قوسىلدى. 23 مامىرداعى جاعداي بويىنشا, ەل تۇرعىندارىنان 14 507 ءوتىنىم تۇسكەن. ونىڭ 4 834-ءى ماقۇلداندى. بۇل دەگەنىمىز – 35,7 ملرد تەڭگە. 2 857 ءوتىنىمدى «بانك تسەنتركرەديت» ماقۇلداسا, قالعان 2 013 وتىنىمگە «ەۋرازيالىق بانك» وڭ جاۋاپ بەرگەن. ازىرشە رەسپۋبليكادا 34 اۆتوكولىك بەرىلدى.
