جاپونيا تۋريستەردى قابىلداي باستايدى

كۇنشىعىس ەلىنىڭ بيلىگى 10 ماۋسىم­نان باستاپ ۇلىبريتانيا، اقش، فران­تسيا، يسپانيا، كانادا جا­نە مالايزيا ەلدەرىمەن قوسا العاندا 98 ەل مەن اي­ماق­تان تۋريستەردى قابىل­دايتىنىن مالىم­دەدى. بىراق ساياحاتتاۋشىلار تۋريستىك توپتاردىڭ قۇرامىندا بولۋى كەرەك، سەبە­بى تۋريستىك ماقساتتا جالعىز كەلگەن ادامعا ەلگە كىرۋگە رۇقسات ەتىلمەيدى. سو­نى­مەن قاتار جاپونيا سىرتقى ىستەر مينيسترلىگىنىڭ مالىمەتىنشە، ۇلى­بريتانيا سەكىلدى ەلدەردەن كەلگەن تۋريستەر ءۇش تاۋەكەل ساناتىنا بولىنەدى: قىزىل، سارى جانە كوك. بۇل ساناتتار كەلۋشىلەردىڭ كارانتيندىك شارالاردى قاي دەڭگەيدە ساقتايتىندارىن انىقتايدى. جاپونياعا بارار الدىندا بارلىق كەلۋشىلەر COVID-19-عا قارسى تەرىس سىناقتان ءوتۋى كەرەك جانە ولار­دىڭ كوپشىلىگى كەلگەننەن كەيىن پتر تەستتى قايتا تاپسىرۋلارى قاجەت. دەگەن­مەن كەيبىر ەلدەردەن كەلگەن تولىق ۆاك­تسي­نالانعان ادامدار قوسىمشا سىناقتان، سونداي-اق باسقالار ءۇشىن تالاپ ەتىلەتىن ءۇش كۇندىك كارانتيننەن بوساتىلۋى مۇمكىن. «تۋريستىك وپەراتورلارعا كەلۋشىلەردىڭ امبەباپ ماسكا كيۋى جانە كوۆيد تاۋەكەلدەرىن سالىستىرمالى تۇردە تومەندەتۋگە ارنالعان وزگە دە شارالاردى ساقتاۋىن قامتاماسىز ەتۋ جاۋاپكەرشىلىگى جۇكتەلەدى»، دەپ حابارلادى ەل بيلىگى.

جاپونيا سونداي-اق حالىقارالىق رەيستەردى قابىلدايتىن اۋەجايلاردىڭ سانىن جەتىگە دەيىن ارتتىرادى، ولاردىڭ قاتارىندا وكيناۆا پرەفەكتۋراسىنىڭ وڭتۇستىگىندەگى ناحا مەن حوككايدونىڭ سولتۇستىگىندەگى ساپپورو ماڭىندا ورنا­لاس­قان جاڭا تيتوسە اۋەجايلارى بار.

جاپونيا – COVID-19 ىندەتىنە قارسى الەمدە ەڭ قاتاڭ شارالاردى ەنگىزىپ، وسى ۋاقىتقا دەيىن ءجىتى ۇستانعان ەلدەردىڭ ءبىرى. كەيىنگە شەگەرىلگەن توكيو-2020 وليمپياداسىنان باستاپ شەتەلدىك كەلۋشىلەرگە ەلگە كىرۋگە تىيىم سالدى. كەيىن ەلدە تۇراتىن شەتەلدىكتەر مەن ىسكەرلىك ساپارمەن كەلگەندەر ءۇشىن شەكتەۋلەر ءسال جەڭىلدەتىلدى. ال جاقىندا ەل ۇكىمەتى وسى جىلدىڭ 1 ماۋسىمىنان باستاپ شەتەلدەن كۇندەلىكتى كەلۋشىلەردىڭ سانىن 20 مىڭعا دەيىن ارتتىرعانىن مالىمدەدى. سونىمەن قاتار پرەمەر-مينيستر فۋميو كيشيدا شەكاراداعى قاتاڭ باقىلاۋدى بوساڭسىتىپ، ەمىن-ەركىن قاتىناس ورناتقىسى كەلەتىنىن ايتتى، الايدا قازىر ەلدە پاندەميا كەزىندە ەنگىزىلگەن تەمىردەي ءتارتىپ ساقتاۋلى.

2019 جىلى جاپونيا 31،9 ملن شە­تەلدىك ءتۋريستى قابىلدادى، بۇل وزگە جىلدارمەن سالىستىرعاندا رەكوردتىق كورسەتكىش بولىپ سانالادى. ەل ۇكىمەتى مۇنىمەن توقتاماي كەلەسى جىلى، ياعني 2020 جىلعا 40 ملن ادامعا جوسپار قۇردى. الايدا الەمگە لەزدە تاراعان ىندەت سالدارىنان بۇل جوسپار ورىندالماي قالدى. ەسەسىنە شەكاراسىن بەكىتىپ، وسى ۋاقىتقا دەيىن جابىق بولدى. ال مۇنداي شەكتەۋلەر تۋريستىك يندۋسترياعا قاتتى اسەر ەتتى. ەل ەكونوميكاسىنىڭ نەگىزگى بولىگىن قۇرايتىن تۋريستەر اعىنى 2020 جىلى 90% قىسقاردى، تۋريستىك قىز­مەت مەكەمەلەرى دە ءبىراز شىعىنعا ۇشىرادى.

ۇكىمەتتىڭ 100-گە جۋىق ەلدەن تۋريس­تەر قابىلدايمىز دەگەن جاڭالىعىن تۋريستىك اگەنتتىكتەر قۋانا قابىلدادى. «جاپونيانىڭ شەكاراسى تۋريستەر ءۇشىن ەكى جىل جابىق بولعانىنا قاراماستان، ەلگە كەلۋشىلەر تاراپىنان ۇلكەن قىزىعۋشىلىقتى بايقايمىز. شەكارا تولىق اشىلعاننان كەيىن تاپسىرىستار قىزا تۇسەتىنىنە سەنىمدىمىن»، دەيدى Intrepid Travel كومپانياسىنىڭ باسقارۋشى ديرەكتورى زينا بەنچەيح. ال Japan Journeys تۋريستىك اگەنتتىگىنىڭ باسقارۋشى ديرەكتورى دجەيمس گرينفيلد «جاپون ۇكىمەتى وتە ساق»، دەيدى. «ولار ءبىرىنشى تۋريستەردىڭ ەكسكۋرسياعا كەلگەنىن قالاپ وتىر، ارينە، ءبىز مۇنى ورىنداۋعا دايىنبىز. تۇتىنۋشىلارىمىزدى قۋانتۋ ءۇشىن جۇمىس ىستەيمىز. ونىڭ ۇستىنە ەكى جىلدان استام ۋاقىت تابىسسىز وتىردىق، سونىڭ ورنىن تولتىرۋ ءۇشىن قولدان كەلگەننىڭ ءبارىن جاسايمىز»، دەيدى ول.

P.S. ەل ەكونوميكاسىنا تۋريزم يندۋسترياسىنان كەلەر تابىس ايتارلىقتاي ازايسا دا، وسى ۋاقىتقا دەيىن تۋريستەردى كىرگىزبەي شەكاراسىن بەكەم ۇستاپ كەلگەن ەل جاپونيا عانا. وزگە ەلدەر پاندەميا ءورشىپ تۇرعان كەزدە دە تۋريستەردى قابىلداۋىن توقتاتپادى. ۆاكتسينالاۋدى جاۋاپكەرشىلىكپەن قابىلداپ، حالىقتىڭ بارلىعىن تەگىن ەكپەمەن دەر كەزىندە قامتاماسىز ەتكەن ەلدەردىڭ قاتارىندا دا جاپونيا الدىڭعى ورىندا تۇر. وزگەدەن كەلەر كىرىستى ەمەس، الدىمەن حالقىنىڭ ساۋلىعىن ويلاعان مەملەكەتتىڭ بۇل شەشىمى وزگەلەرگە ۇلگى بولاتىنى ءسوزسىز.