ەكىنشى دۇنيەجۇزىلىك سوعىس كينو, ادەبيەت جانە كەسكىندەمە ونەرىنە تاقىرىپ جاعىنان وراسان شابىت اكەلدى. سوعىستان كەيىنگى ءومىر ونەر كەڭىستىگىنەن ءوز بەينەسىن تاپتى. سول ءۇردىس ۋكراين ۇلتىنىڭ داڭقتى سۋرەتشىسى گريگوري ۆاسەتسكيدىڭ شىعارماسىنان دا كورىنىس بەرگەن ەدى. ونىڭ «1945 جىلعى مامىر. ورالۋ» كارتيناسى – جاستىق شاعى سوعىس جىلدارىنا تۋرا كەلگەن جاڭا بۋىننىڭ تۋىندىسى. بۇل كەزەڭ ولار ءۇشىن ەڭ ماڭىزدى وقيعا بولدى.
سۋرەتشى ءوز جۇمىسىندا ساربازدىڭ سوعىستان ورالۋىن جەتكىزگەن. ول وسى كومپوزيتسيا ارقىلى تۋعان جەرىنە امان كەلگەن باتىردى كۇتىپ العان جاس ارۋدىڭ قۋانىشىن ادەمى سۋرەتتەگەن. الايدا ولار سوعىستىڭ بارلىق اۋىرتپالىعىن باستارىنان وتكەرگەن. كەۋدەلەرىندە قايسار رۋح قونىستانعان جانە الداعى ومىرىنە سەنىممەن قادام باسادى.
قىلقالام شەبەرى كەسكىندەمەدە سيمۆولدارعا, اللەگوريالارعا جانە مەتافورالارعا سۇيەنەدى. كەنەپ بەتىنە تۇتاس جازىلعان ءدوڭنىڭ ۇستىندەگى كومپوزيتسيا كەيىپكەرلەرى كەڭىستىكتى تۇگەلدەي الىپ جاتىر, ولار قول ۇستاسىپ, كورەرمەنگە قاراي جىلجىپ كەلەدى. سۋرەتشى وسى ارقىلى كەڭەس ادامىنىڭ ءفاشيزمدى جەڭۋ جولىندا جاساعان ەرلىگىنىڭ ماڭىزى مەن ءمانىن كورسەتكەن, سول سياقتى كەلەشەك تە سولاردىڭ قولىندا ەكەنىن بايقاتقانداي. ولار جاڭا داۋىرگە نىق قاداممەن ادىمدايدى.
سۋرەتكەر كەيىپكەرلەردى تاۋدىڭ باۋرايىندا جايقالىپ تۇرعان الما باعىنىڭ اياسىندا جازعان. سول ارقىلى تابيعاتتىڭ جاڭا ءومىر ءۇشىن ويانىپ جاتقانىن كورسەتىپ تۇر. سوعىس اياقتالعالى ونداعان جىل وتسە دە, ونىڭ ەلەسى حالىقتىڭ جادىنان وشپەك ەمەس. وتكەن عاسىردىڭ زۇلمات وقيعالارىمەن بايلانىسى بار ارداگەرلەردىڭ ولشەۋسىز ەرلىگى ۇلت ساناسىنان جويىلمايدى. جەڭىستىڭ بوياۋى ەكى عاشىقتىڭ العاۋسىز ماحابباتىنداي قاشاندا ىپ-ىستىق ءارى ءموپ-ءمولدىر بولىپ قالا بەرەدى.
