ۇكىمەت • 28 مامىر، 2022

ءاليحان سمايىلوۆ ددۇ وكىلدەرىمەن تەمەكىگە باقىلاۋدى كۇشەيتۋ ماسەلەسىن تالقىلادى

31 رەت كورسەتىلدى

ۇكىمەت ۇيىندە قازاقستاندا تەمەكىگە باقىلاۋدى كۇشەيتۋدىڭ وزەكتى ماسەلەلەرى تالقىلاندى، دەپ حابارلايدى Egemen.kz primeminister.kz سايتىنا سىلتەمە جاساپ.

قر پرەمەر-ءمينيسترى ءاليحان سمايىلوۆ دۇنيەجۇزىلىك دەنساۋلىق ساقتاۋ ۇيىمىنىڭ تەمەكىگە قارسى كۇرەس جونىندەگى نەگىزدەمەلىك كونۆەنتسياسى (ددۇ تكنك) حاتشىلىعىنىڭ باسشىسى ادريانا بلانكو ماركيزومەن كەزدەسۋ وتكىزدى.

تاراپتار قازاقستاندىق زاڭنامانى ددۇ تكنك ستاندارتتارىنا ۇيلەستىرۋ باعىتىندا ىنتىماقتاستىقتى دامىتۋ، سونداي-اق قازاقستاندا تەمەكىگە باقىلاۋدى كۇشەيتۋدىڭ وزەكتى ماسەلەلەرىن تالقىلادى.

ءاليحان سمايىلوۆ ازاماتتاردىڭ دەنساۋلىعىن نىعايتۋ ماسەلەسى تۇراقتى نازاردا ەكەنىن اتاپ ءوتتى. قازاقستان دۇنيەجۇزىلىك دەنساۋلىق ساقتاۋ ۇيىمىنىڭ راتيفيكاتسيادان وتكەن تەمەكىگە قارسى كۇرەس جونىندەگى نەگىزدەمەلىك كونۆەنتسياسىن ساقتايدى.

ء«بىزدىڭ ەلىمىز ۇلتتىق زاڭناما دەڭگەيىندە قاعيداتتاردى ەنگىزە وتىرىپ، ددۇ مىندەتتەمەلەرىن ورىنداۋ باعىتىندا ەلەۋلى ناتيجەلەرگە قول جەتكىزدى. جۇرگىزىلىپ جاتقان شارالاردىڭ ارقاسىندا حالىقتىڭ ءومىر ءسۇرۋ ۇزاقتىعى ارتىپ، تەمەكى تۇتىنۋ دەڭگەيى تومەندەدى. قازاقستاندىقتار تەمەكى ءتۇتىنى جوق ورتانى قولدايدى جانە تەمەكىدەن باس تارتقىسى كەلەتىندەردىڭ قاتارى كوبەيىپ كەلەدى»، دەدى ۇكىمەت باسشىسى.

ءوز كەزەگىندە ادريانا بلانكو ماركيزو قازاقستاندا حالىقتىڭ دەنساۋلىعىن جاقسارتۋ ءۇشىن قابىلدانىپ جاتقان ءىس-شارالاردى اتاپ ءوتتى.

«قازاقستاندا 2022 جىل كەلەشەك ۇرپاقتى قولداۋ ماقساتىندا بالالار جىلى دەپ جاريالاندى. قازاقستان ساياساتىندا دەنساۋلىق ماسەلەلەرىنە باسىمدىق بەرىلەتىنى وتە ماڭىزدى»، دەدى ددۇ وكىلى. كەزدەسۋ قورىتىندىسى بويىنشا تاراپتار ىنتىماقتاستىقتى ودان ءارى جالعاستىرۋعا نيەتتى ەكەندەرىن ءبىلدىردى.

 

سوڭعى جاڭالىقتار

ورال قوقىس استىندا قالۋى مۇمكىن

ايماقتار • بۇگىن، 16:47

دوللار قايتا قىمباتتادى

قارجى • بۇگىن، 15:58

ۇقساس جاڭالىقتار