قازاقستان • 27 مامىر، 2022

«ساعادات ساياباعىنا» قويىلعان گۇل شوقتارى

قارۋلى كۇشتەردە كەڭەس وداعىنىڭ باتىرى، حالىق قاھارمانى، تاۋەلسىز قازاقستاننىڭ العاشقى قورعانىس ءمينيسترى، ارميا گەنەرالى ساعادات نۇرماعامبەتوۆتى ەسكە الۋ ءىس-شارالارى ءوتتى.

Egemen Qazaqstan

اتى اڭىزعا اينالعان قولباسشىنىڭ تۋعان جەرى اقكول قالاسىندا وتكەن ەسكە الۋ ءىس-شاراسىنا قارۋلى كۇشتەردىڭ ارداگەرى حالىق قاھارمانى، وتستاۆكاداعى گەنەرال-لەيتەنانت باقىتجان ەرتاەۆ، باس شتاب باستىعىنىڭ ورىنباسارى – تاربيە جانە يدەولوگيالىق جۇمىستار دەپارتامەنتىنىڭ باسشىسى، گەنەرال-مايور سەرىك بورامباەۆ، اۋدان اكىمى يۋري كۋرۋشين، سونداي-اق باتىردىڭ نەمەرەسى – زاپاستاعى پودپولكوۆنيك كەلدەن نۇرماعامبەتوۆ قاتىستى. قازاقتىڭ داڭقتى قولباسشىسىن ەسكە الۋعا قارۋلى كۇشتەردىڭ اسكەري قىزمەتشىلەرى مەن ارداگەرلەرى، اسكەري كوللەدجدىڭ، «جاس سارباز» رەسپۋبليكالىق اسكەري-پاتريوتتىق قوزعالىسىنىڭ، مامانداندىرىلعان سىنىپتاردىڭ تاربيەلەنۋشىلەرى، قوعام مەن جەرگىلىكتى اتقارۋشى ورگانداردىڭ وكىلدەرى كەلدى.

– ساعادات قوجاحمەت ۇلى نۇرماعامبەتوۆ وتانىن سۇيگەن، ءوز ءىسىنىڭ ناعىز مامانى، اسكەري بورىشقا ادال تۇلعانىڭ ۇلگىسى رەتىندە جادىمىزدا ماڭگى ساقتالادى. ول قازاقستاننىڭ تاۋەلسىزدىگى مەن قاۋىپسىزدىگىنىڭ كەپىلى – قارۋلى كۇشتەردىڭ قالىپتاسۋىنا وراسان زور ۇلەس قوستى. ارميا گەنەرالى ساعادات نۇرماعامبەتوۆتىڭ ەسىمى تاۋەلسىز قازاقستان تاريحىنا التىن ارىپتەرمەن جازىلدى، – دەدى گەنەرال-مايور سەرىك بورامباەۆ.

ءىس-شارا سوڭىندا اقكول قالاسىنداعى الاڭدا قارۋلى كۇشتەردىڭ ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ كونتسەرتى ءوتتى.

باتىردىڭ ەسكەرتكىشتەرىنە گۇل شوقتارىن قويۋ بىرقاتار گارنيزوندا، ونىڭ ىشىندە الماتىداعى قۇرلىق اسكەرلەرىنىڭ اسكەري ينستيتۋتىندا، استاناداعى اسكەري كوللەدجدە، سونداي-اق گۆاردەيسك گارنيزونىنداعى «ساعادات ساياباعىندا» ءوتتى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز