ساۋىر-سايقاننىڭ ەتەگىن ەن جايلاعان زايسان اۋدانىندا 7 مەكتەپ عيماراتى كۇردەلى جوندەۋدەن وتكىزىلسە, ودان بولەك جىل سايىن 7-8 مەكتەپكە اعىمداعى جوندەۋ جۇمىستارى جۇرگىزىلەدى. ءبىر ەرەكشەلىگى, اۋداننىڭ جەتى مەكتەبىنىڭ جىلۋ قازاندىقتارى گازعا اۋىستىرىلدى. سىنىپ كابينەتتەرىن جاڭعىرتۋ, زاماناۋي قۇرال-جابدىقتارمەن جابدىقتاۋدا مەكتەپ تۇلەكتەرىمەن, ارداگەر ۇستازدارمەن بىرلەسكەن قايىرىمدىلىق جۇمىستارى اۋدان مەكتەپتەرىندە جۇيەلى تۇردە جۇرگىزىلەدى. ناتيجەسىندە, ءبىلىم بەرۋدە ەڭبەك سىڭىرگەن ۇستازدار اتىنا 53 كابينەت اشىلىپ, وقۋشىلار يگىلىگىنە ۇسىنىلعان.
– زايسان قالاسىندا كوپبالالى وتباسىلارعا مەملەكەت تاراپىنان ءۇي بەرىلگەندىكتەن, مەكتەپ وقۋشىلارىنىڭ سانى ارتتى. سول ءۇشىن دە ساپالى جالپى ورتا ءبىلىم بەرۋدى قامتاماسىز ەتۋ ماقساتىندا ساۋىر شاعىن اۋدانىندا 300 ورىندىق زاماناۋي ۇلگىدەگى مەكتەپتىڭ قازىعى قاعىلدى. ءساتتى اياقتالسا, مەكتەپتى 2023 جىلى بەرىلەدى دەپ جوسپارلاپ وتىرمىز, – دەيدى اۋدان اكىمىنىڭ ورىنباسارى سەرىك تلەمەسوۆ.
ساۋىر شاعىن اۋدانىندا جاڭا مەكتەپ بوي كوتەرەتىن بولسا, «تسيفرلى قازاقستان» باعدارلاماسى اياسىندا جالپى اۋدانداعى مەكتەپتەر تسيفرلى تەحنولوگياعا اۋىسىپ جاتىر. 11 تولىق جيناقتى جانە 1 شاعىن جيناقتى مەكتەپتە روبوتتەحنيكا كابينەتى, 15 شاعىن جيناقتى مەكتەپتە ءىت كابينەتى جۇمىس ىستەيدى. 27 مەكتەپ, 17 بالاباقشا, 2 قوسىمشا ءبىلىم بەرۋ مەكەمەلەرى ينتەرنەت جەلىسىنە 100 پايىز قوسىلعان.
– قازىرگى زاماندا ينتەرنەتتىڭ اۋاداي قاجەت ەكەنىن پاندەميا جىلدارىندا شىن تۇسىندىك. مەكتەپتەردىڭ بارلىعىنا دەرلىك ينتەرنەت تارتىلعاندىقتان اسا قيىندىق كورە قويعان جوقپىز. سونىمەن قاتار ءىت كابينەتتەر جۇمىس ىستەپ تۇر. وقۋشىلار تسيفرلى زامان تالابىنا ساي بىلىمدەرىن الىپ وتىر, – دەيدى پىكىر بىلدىرگەن م.داۋلەنوۆ اتىنداعى مەكتەپ-ينتەرناتىنىڭ فيزيكا ءپانىنىڭ مۇعالىمى الماگۇل يسابەكوۆا.
ال ح.مۋستافينا اتىنداعى مەكتەپ بازاسىندا 2016 جىلى مەكتەپ-ليتسەيى اشىلىپ, دارىندى 343 وقۋشىنىڭ جاراتىلىستانۋ-ماتەماتيكالىق باعىتىندا تەرەڭ ءبىلىم الۋىنا جاعداي جاسادى. سول جىلى اۋدان مەكتەپتەرىندە سپورت سىنىبى, كادەت سىنىبى, مەكتەپالدى دايارلىق زياتكەر سىنىبى جانە «ەرتوستىك» بالاباقشاسىندا ۆالەولوگيالىق توپ جۇمىسىن باستادى. سونداي-اق 2019 جىلى م.لومونوسوۆ مەكتەبىندە كادەت سىنىبى اشىلىپ, تاۋەلسىز ەلدىڭ قورعانى بولاتىنداي پاتريوت ازاماتتار تاربيە الىپ جاتىر.
– اۋداننىڭ ءبىلىم سالاسىنداعى اتقارىپ جاتقان جۇمىستارىن ءبىز جاقسى بىلەمىز. وقۋشىلار ءار ءتۇرلى سايىستارعا قاتىسىپ, جۇلدەلى ورالىپ جاتقاندارىن دا كورىپ, قۋانىپ وتىرامىز. ساۋىر شاعىن اۋدانىندا جاڭا مەكتەپتىڭ قۇرىلىسى باستالاتىنىن ەستىگەندە, قۋانىشىمىز ەكى ەسەلەندى, – دەيدى التى بالانىڭ اناسى تاتيانا روديونوۆا.
ايتا كەتەرلىگى, زايسان اۋدانىندا تاۋەلسىزدىك جىلدارى 11 مەكتەپ, 17 بالاباقشا, 14 شاعىن ورتالىق اشىلعان ەكەن. جەكەمەنشىك بالاباقشالاردىڭ ۇلەسى جىل سايىن ارتىپ, بۇگىندە ونعا جەتىپ, 58,8 پايىزىن قۇراپ وتىر.
شىعىس قازاقستان وبلىسى,
زايسان اۋدانى
