ەلوردالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ كونستيتۋتسيالىق رەفورمانىڭ نەگىزگى باعىتتارىنا توقتالدى.
«بۇل شىن مانىندە جاڭا قازاقستاننىڭ قالىپتاسۋىنداعى باستى ساياسي وقيعا. مەملەكەت باسشىسى قاسىم-جومارت توقاەۆتىڭ رەفەرەندۋم وتكىزۋ تۋرالى شەشىمى ەلدىڭ ساياسي ومىرىندە عانا ەمەس, قوعامدىق ومىرىندە دە ماڭىزدى. رەفەرەندۋم ءبىزدىڭ ازاماتتىق ۇستانىمىمىزدى نىعايتۋعا مۇمكىندىك بەرەدى جانە ەلدەگى قوعامدىق-ساياسي جاعدايعا جاعىمدى اسەر ەتەدى. مەديتسينالىق قوعامداستىقتى الداعى ساياسي وزگەرىستەر ماسەلەسىندە شەتتە قالماۋعا شاقىرامىن», دەدى ول.
ەستەرىڭىزگە سالا كەتەيىك, 5 ماۋسىمدا قازاقستاندا كونستيتۋتسياعا تۇزەتۋلەر بويىنشا رەفەرەندۋم وتەدى. ونى وتكىزۋ كەزەڭىندە بارلىق سايلاۋ ۋچاسكەلەرى قۇرامىندا مەديتسينا قىزمەتكەرلەرى بار مەديتسينالىق پۋنكتەرمەن جاراقتاندىرىلاتىن بولادى. وسى كۇنى قالا بويىنشا بارلىعى 247 اشىق ۋچاسكە جۇمىسىن باستايدى. ماجىلىستە كونستيتۋتسيالىق رەفورمالاردى تالقىلاۋدان باسقا, دەنساۋلىق ساقتاۋ جۇيەسىندەگى اعىمداعى ماسەلەلەردى تالقىلاندى, قالانىڭ مەديتسينالىق ۇيىمدارىنىڭ, سونىڭ ىشىندە جەكەمەنشىك ۇيىمداردىڭ جۇمىسىنىڭ نەگىزگى باعىتتارىنا توقتالدى. COVID-19-عا قارسى ۆاكتسينالاۋ ماسەلەسىنە ەرەكشە نازار اۋدارىلدى. بۇعان دەيىن دەنساۋلىق ساقتاۋ مينيسترلىگى كوروناۆيرۋستىڭ جاڭا شتامدارىنىڭ اينالىمى تۋرالى ايتقان بولاتىن.
دەنساۋلىق ساقتاۋ باسقارماسىنىڭ باسشىسى قالا تۇرعىندارىن ۆاكتسينالاۋعا جانە دەنساۋلىعىنا جاۋاپكەرشىلىكپەن قاراۋعا شاقىرادى. بۇگىنگى كۇنى قالا بويىنشا 500 مىڭعا جۋىق تۇرعىن يممۋنداۋدىڭ تولىق كۋرسىنان ءوتتى, شامامەن 128 مىڭ ادام قايتا ۆاكتسينا الدى.
