ا.بايتۇرسىن ۇلى اتىنداعى قوستاناي ۋنيۆەرسيتەتىندە وتكەن القالى جيىندا ەلىمىزدىڭ سولتۇستىك ايماقتارىنىڭ 5 مامىردا وتەتىن رەسپۋبليكالىق رەفەرەندۋمعا دايىندىق بارىسى تالقىلاندى.
– رەفەرەندۋم – حالىق بيلىگىنىڭ, ءاربىر قازاقستاندىقتىڭ ءوز ازاماتتىق ۇستانىمىن ءبىلدىرۋ ارقىلى جاڭا قازاقستاندى قۇرۋعا ەلەۋلى ۇلەس قوسۋىنىڭ جارقىن كورىنىسى. الداعى رەفەرەندۋمنىڭ تاريحي ءمان-ماڭىزى تۇتاستاي ۇلتتىڭ تاعدىرىنا قاتىستى ماسەلەلەردى حالىقتىڭ تالقىسىنا شىعارۋ, بۇقارا كوپشىلىكتىڭ مەملەكەتتىك بيلىككە تىكەلەي قاتىسۋىن قامتاماسىز ەتە وتىرىپ, دەموكراتيا نەگىزدەرىن ورنىقتىرۋ. بۇگىن الدىمىزداعى ماڭىزدى ساياسي ناۋقانعا وڭىرلەردە جۇرگىزىلىپ جاتقان دايىندىق جۇمىستارىن ءبىر پىسىقتاپ الىپ, رەفەرەندۋمنىڭ ءمان-ماڭىزىن حالىققا ءتۇسىندىرۋ بارىسىنداعى وزىق ۇلگىلەردى, ءتيىمدى تاجىريبەلەردى ءبولىسۋ ماقساتىندا باس قوسىپ وتىرمىز, – دەدى قازاقستان دەپۋتاتتارى بىرلەستىگىنىڭ توراعاسى تولەۋبەك مۇقاشەۆ.
ودان كەيىن ءتورت وبلىستاعى وڭىرلىك شتاب باسشىلارى رەفەرەندۋمعا دايىندىق بارىسىنىڭ قالاي ءجۇرىپ جاتقانى تۋرالى ەسەپ بەردى. ماسەلەن, قوستاناي وبلىسىنداعى وڭىرلىك شتاب مۇشەسى اباي دۇيسەكوۆتىڭ ايتۋىنشا, رەفەرەندۋمنىڭ ەل تاريحىنداعى ورنى ەرەكشە ەكەنىن حالىققا جەتكىزۋ ماقساتىندا وبلىستا 10 مامىردان بۇگىنگە دەيىن 600-دەن استام ءىس-شارا ۇيىمداستىرىلعان.
– قالالار مەن اۋىلداردى ارالاپ, جەرگىلىكتى تۇرعىندارمەن كەزدەسۋلەر وتكىزدىك. كوپشىلىك تاراپىنان تۇسكەن ساۋالدارعا جاۋاپ بەردىك. 6 مامىردا قوستاناي وبلىسىندا رەفەرەندۋمدى قولداۋ جونىندەگى رەسپۋبليكالىق شتابتىڭ وكىلدىگى قۇرىلدى. شتابتى سەناتورلار كەڭەسىنىڭ مۇشەسى, زاڭ عىلىمدارىنىڭ دوكتورى سەرگەي جالىبين باسقارادى. شتاب قۇرامىندا 16 ادام جۇمىس ىستەيدى. وبلىس ورتالىعىنان تىس قالالار مەن اۋدانداردا ءوز وكىلدىكتەرىمىز بار. نەگىزگى كەستە بويىنشا جوسپارلانعان شتاب جۇمىسىنان تىس, جەكەلەگەن عالىمدار مەن زيالى قاۋىم وكىلدەرىنىڭ, بەلگىلى كاسىپكەرلەر مەن بەدەلدى قايراتكەرلەردىڭ حالىقپەن جەكە كەزدەسۋلەرى ۇيىمداستىرىلدى, – دەدى اباي دۇيسەكوۆ.
قوستانايداعى قوعامدىق شتاب وكىلدەرى بۇگىنگە دەيىن ءتۇرلى كاسىپورىندار مەن ۇجىمداردا, جوعارى وقۋ ورىندارىندا, الىس-جاقىن ەلدى مەكەندەردە 523 رەت كەزدەسۋ وتكىزگەن. مۇنىڭ سىرتىندا, شتابتىڭ ارنايى جەدەل چاتى جۇمىس ىستەيدى. وندا كۇن سايىن اتقارىلعان ءىس-شارالار ورتاعا سالىنىپ, تەزيستەر تالدانادى. سونداي-اق اقپاراتتىق ناۋقاندى جاقسارتۋ جونىندە ۇسىنىستار ەنگىزىلەدى.
جيىندا «اق جول» پارتياسى وبلىستىق فيليالىنىڭ توراعاسى ماحاببات جۇتاەۆ جاڭارعان كونستيتۋتسيانىڭ جاستارعا بەرەر يگىلىگى مول ەكەنىن جان-جاقتى بايانداپ وتسە, قوستاناي وبلىسىنىڭ ىسكەر ايەلدەر قاۋىمداستىعىنىڭ توراعاسى گۇلسارا جامانقۇلوۆا اتا زاڭعا ەنەتىن ەلەۋلى وزگەرىستەردىڭ ەلىمىزدىڭ گەندەرلىك ساياساتىنىڭ جەتىلۋىنە زور ىقپال ەتەتىنىن اتاپ ءوتتى.
قوستاناي وبلىسى
