بالعىن سپورتشىلار «مينيستر كۋبوگىن» ساراپقا سالدى

مەملەكەت باسشىسى قاسىم-جومارت توقاەۆ 2022 جىلدى ەلىمىزدە «بالالار جىلى»، دەپ جاريالاعان بولاتىن. پرەزيدەنت ءوز سوزىندە وسكەلەڭ ۇرپاقتىڭ بولاشاعىنا باسا ءمان بەرەتىنىن، جاستارعا زور ءۇمىت ارتاتىنىن ايتقان ەدى. «جاستارىمىز اتقارىلىپ جاتقان اۋقىمدى جۇمىستىڭ، رەفورمالاردىڭ يگى­لىگىن مىندەتتى تۇردە كورەدى. ولاردىڭ اراسىندا كوزى اشىق، كوكىرەگى وياۋ، ويى ۇشقىر ازاماتتار از ەمەس. ءبىز وسكەلەڭ ۇرپاققا جول اشۋ ءۇشىن بارلىق جاعدايدى جاساۋىمىز كەرەك. ولاردىڭ اماندىعى – مەملەكەتىمىزدىڭ جار­قىن بولاشاعىنىڭ سەنىمدى كەپىلى. سوندىقتان دا 2022 جىلدى «بالالار جىلى»، دەپ جاريالاۋ كەرەك دەپ ەسەپتەيمىن. اڭگىمە جالاڭ ۇران مەن مەرەكەلىك شارالار تۋرالى ەمەس. ەڭ الدىمەن، بيلىك تاراپىنان بالالاردى قورعاۋ ءۇشىن دەنساۋلىق ساقتاۋ، ءبىلىم بەرۋ، الەۋمەتتىك قولداۋ باعىتىندا ناقتى شارالار قولعا الىنۋى كەرەك. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – ءبىزدىڭ جالپىۇلتتىق مىندەتىمىز»، دەدى قاسىم-جومارت توقاەۆ.

«بالالار جىلىنا» وراي تۇڭ­­­عىش رەت ۇيىمداستىرىلعان «مي­­نيستر كۋبوگى» ءبىر اي بويى ەلى­مىزدىڭ بىرنەشە قالاسىن­دا وتكىزىلدى. 2-24 مامىر ارا­لى­عىندا رەسپۋبليكانىڭ 17 ما­مانداندىرىلعان وقۋ ورنى­نىڭ وكىلدەرى وليمپيادا باعدار­لاماسىنا ەنگەن جانە ەلىمىزدە كەڭ تاراعان سپورت تۇرلەرىنەن، اتاپ ايتقاندا بوكس، دزيۋدو، گرەك-ريم جانە ەركىن كۇرەس تۇرلەرىنەن باس جۇلدە ءۇشىن باق سىنادى.

ءساۋىر ايىندا ەلورداداعى «قا­زاقستان» جەڭىل اتلەتيكا كەشەنىندە جارىستىڭ جەرەبە تارتۋ ءراسىمى ءوتىپ، وندا 17 كوماندا ءتورت توپقا ءبولىندى. ودان ءارى كوماندالار نۇر-سۇلتان، الماتى، اقتوبە جانە تاراز قالالارىندا ايماقتىق ىرىكتەۋ جارىستارىندا باق سىنادى. ياعني ءار توپتاعى كوماندالار اينالمالى جۇيە بويىنشا ءبىر-بىرىمەن كەزدەسىپ، ءتورت سپورت ءتۇرى بويىنشا جەڭىپ العان مەدالدارىنىڭ ساپاسى جاعىنان ءبىرىنشى ورىن العان كوماندالار جارتىلاي فينالعا شىقتى. جارتىلاي فينالدا ا توبىنىڭ جەڭىمپازى س توبىنىڭ ۇزدىگىنە، ۆ توبىنىڭ مىقتىسى D توبىنىڭ جەڭىمپازىنا قارسىلاس اتاندى. ىرىكتەۋ سايىستارىنىڭ قورىتىندىسى بويىنشا، ءوز توپتارىندا وزا شاپقان كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامان­داندىرىلعان مەكتەپ-ينتەرنات-كوللەدجى (ال­ما­تى قالاسى)، ءجا­لاڭ­توس ءباھا­دۇر سەيىتقۇل ۇلى اتىنداعى وليم­پيا­دا رە­زەرۆ­تىڭ وبلىستىق ما­مان­­دان­دى­رىلعان مەكتەپ-ينتەرنات-كوللەدجى (قى­زىلوردا وبلىسى)، قا­جىمۇقان مۇڭايتپاس ۇلى اتىن­­داعى وليمپيادا رەزەر­ۆى­­نىڭ رەسپۋبليكالىق مامان­دان­دىرىلعان مەكتەپ-ين­­تەرنات-كوللەدجى (نۇر-سۇل­تان قالاسى) جانە ءاليا مولدا­عۇلوۆا اتىنداعى وبلىس­تىق ما­مانداندىرىلعان وليمپيا­دالىق رەزەرۆتەگى مەك­تەپ-ينتەر­نات-كول­لەدجىنىڭ (قارا­عان­دى وبلىسى) سپورتشىلارى 22-24 مامىر ارا­لىعىندا «مينيستر كۋبوگىن» ساراپقا سالدى.

– سپورتشىلار مەن جاتتىق­تى­رۋشىلار جانە بولاشاق چەم­پيونداردىڭ اتا-انالارى ءۇشىن شىن جۇرەكتەن قۋانىشتىمىن. وڭىرلەردە وسى جارىستى وتكىزۋ تۋرالى باستامانى ۇلكەن ىنتامەن قارسى العاندارى قۋانتادى. كۇردەلى ىرىكتەۋ كەزەڭدەرىنەن كەيىن ەلوردادا ەڭ مىقتى سپورت­شىلار جينالدى. بۇل جارىس­تاردىڭ اتموسفەراسى سىزدەرگە جاعىمدى ەموتسيا مەن ادەمى اسەر سىيلايدى، ال جارقىن جەڭىس قوسىمشا سەرپىن مەن موتيۆاتسيا بەرەدى دەگەن سەنىمدەمىن، – دەدى جارىستىڭ رەسمي اشىلۋ سالتاناتىندا ءسوز العان مادەنيەت جانە سپورت ءمينيسترى داۋرەن اباەۆ.

سپورتتىق ءىس-شارانىڭ العاش­قى كۇنىندەگى جارتىلاي فينال باسەكەسىندە قارسىلاستارىنا جول بەرگەن ءا.مولداعۇلوۆا اتىن­داعى وليمپيادالىق رەزەرۆتەگى ينتەرناتىنىڭ سپورتشىلارى مەن ءجالاڭتوس ءباھادۇر اتىنداعى وليمپيادالىق رەزەرۆتىڭ مامان­داندىرىلعان مەكتەپ-ينتەرنات-كوللەدجىنىڭ وكىلدەرى ەرتەسى كۇنى ءتۋرنيردىڭ قولا جۇلدەسىن ساراپقا سالدى. ءۇشىنشى ورىنعا تالاسقان جاس سپورتشىلار تاتامي، رينگ جانە بوزكىلەمدە جان الىسىپ، جان بەرىستى. ناتيجەسىندە، سپورتتىڭ ءتورت ءتۇرى بويىنشا جال­پى ەسەپتە مىقتىلىق تا­نىت­قان قىزىلوردا وبلىسىنىڭ جاس ورەندەرى جەڭىمپاز اتانىپ، تۋر­نير ەرەجەسىنە ساي جارىستىڭ قولا جۇلدەسى مەن قوسىمشا 2 ملن تەڭگە كولەمىندە قارجىلاي سىياقىعا يە بولدى.

ال شەشۋشى سايىس­تا ق.مۇڭ­ايت­­پاس ۇلى اتىن­دا­­عى وليمپيا­دا رەزەرۆى­ رەسپۋبليكالىق ما­مان­­دان­دىرىلعان مەكتەپ-ين­تەر­نات-كوللەدجى مەن ك.احمەتوۆ اتىن­داعى وليمپيادا رەزەر­ۆى رەسپۋبليكالىق مامان­دان­دىرىلعان مەكتەپ-ينتەرنات-كول­لەدجىنىڭ سپورتشىلارى «قوس قۇلاقتى» كۋبوكتى جەڭىپ الۋعا بارىن سالدى. فينالدىق شەشۋشى ايقاس بولعان سوڭ بارلىق باسەكە وتە تارتىستى ءوتتى. ويتكەنى كەز كەلگەن ءبىر جەڭىلىستىڭ ءوزى، بول­­ماشى قاتەلىكتىڭ سالدارى كو­مان­­داسىن جۇلدەدەن قاعۋى ابدەن مۇمكىن ەدى. سوندىقتان سايىسقا شىققان سپورتشىلاردىڭ ەشقايسىسى دا جەڭىلگىسى كەلمەي، بار كۇش-جىگەرىن الاڭدا قالدىرىپ، سوڭعى دەمى قالعانشا جەڭىس ءۇشىن كۇرەستى. 

بوزكىلەمدە بەلدەسكەن با­لۋان­­داردىڭ، تاتاميدە ونەر كورسەتكەن دزيۋدوشىلاردىڭ تاما­شا ايلا-تاسىلدەرى، شارشى الاڭداعى بىل­عارى قولعاپ شەبەرلەرىنىڭ ءاربىر جاساعان سوققىسى سپورت كەشەنىنە جي­نال­عان جانكۇيەرلەردىڭ قو­شەمەتىنە بولەنىپ وتىردى. ناتي­جەسىندە، بوكس، ەركىن جانە گرەك-ريم كۇرەسىندە جەڭىسكە جە­تىپ، تەك دزيۋدو باسەكەسىندە عا­نا قارسىلاسىنا جول بەرگەن ەلور­­دالىق ق.مۇڭايتپاس ۇلى اتىن­داعى وليمپيادا رەزەر­ۆى مەكتەپ-ينتەرنات-كوللەدجى سپورت­شىلارى تۇڭعىش رەت ۇيىم­­داستىرىلعان رەسپۋبلي­كا­لىق «مينيستر كۋبوگى» جا­رى­سىنىڭ جەڭىمپازى اتانىپ قانا قويماي، مادەنيەت جانە سپورت ءمينيسترى داۋرەن اباەۆتىڭ قو­لىنان كۋبوك پەن 5 ميلليون تەڭگە قارجىلاي سىياقى الدى. ەكىنشى ورىنعا تابان تىرەگەن الماتىلىق سپورتشىلارعا 3 ملن تەڭگە سىياقى بەرىلدى.

سونىمەن قاتار تۋرنيردە جەكەلەگەن اتالىمدار بويىنشا دا ۇزدىك اتانعان سپورتشىلار ارنايى ماراپاتقا يە بولدى. اتاپ ايتار بولساق، بوكستان 80 كيلو سالماقتا ونەر كورسەتكەن ەلور­دالىق راسۋل اساحانوۆ (ق.مۇڭايتپاس ۇلى اتىنداعى وليم­پيادا رەزەرۆى) «ۇزدىك تەحني­كاسى ءۇشىن»، ەركىن كۇرەستە 71 كيلوعا دەيىنگى سالماقتا بەلدەس­كەن الماتىلىق دانيلا تاۋرباەۆ (ك.احمەتوۆ اتىنداعى وليمپيادا رەزەرۆى) «جەڭىسكە دەگەن جىگەرى ءۇشىن»، دزيۋدودا 60 كيلوعا دەيىنگى سالماقتا كۇرەسكەن قاراعاندىلىق دياس تاڭاتقان ء(ا.مولداعۇلوۆا اتىنداعى سپورت ينتەرناتى) «ۇز­دىك ءادىسى ءۇشىن» جانە گرەك-ريم كۇرەسىنەن 80 كيلوعا دەيىنگى سال­ماقتا باق سىناعان نۇر-سۇلتان قالاسىنىڭ تاعى ءبىر با­لۋانى ءاسا­نالى سەرىكباەۆ «كورەرمەن كوزايىمى» اتالىمدارىندا جەڭىم­­پاز اتاندى. جوعارىدا اتال­­­عان بارلىق سپورتشىعا جارىس­تى ۇيىمداستىرۋشىلار ىنتالان­دىرۋ رەتىندە 250 مىڭ تەڭگە كولە­مىندە قارجىلاي سىياقى بەردى.

جارىس سوڭىنداعى جەڭىمپاز­دار مەن جۇلدەگەرلەردى ماراپات­تاۋ سالتاناتىنا مادەنيەت جا­نە سپورت ءمينيسترى داۋرەن اباەۆ­تان بولەك،  بوكستان وليمپيا ويىندارىنىڭ ەكى دۇركىن كۇمىس جۇلدەگەرى، الەم چەمپيونى بولات ءجۇمادىلوۆ، دزيۋدودان وليمپيا ويىندارىنىڭ كۇمىس جۇلدەگەرى اسحات جىتكەەۆ، ەركىن كۇرەستەن الەم جانە ازيا چەمپيوناتىنىڭ كۇمىس جۇلدەگەرى نۇرلان بەكجا­نوۆ، سونداي-اق گرەك-ريم كۇرە­سىنەن الەم چەمپيوناتىنىڭ بەس دۇركىن جۇلدەگەرى جانە ازيا چەم­پيونى المات كەبىسپاەۆ قاتى­سىپ، ەكى كۇن بويى سپورت سا­رايىنىڭ شاڭىن قاققان جاس ءىزباسارلارىنىڭ جارقىن ونەر­لەرىنە ءدان ريزا بولىپ، بولاشاقتا ولار دا ەل نامىسىن حالىقارالىق ارەنالاردا، وليمپيا ويىندارى مەن الەم بىرىنشىلىكتەرىندە لايىقتى تۇردە قورعايتىنىنا سەنىم ءبىلدىردى.