پرەزيدەنت • 26 مامىر، 2022

مەملەكەت باسشىسى بىشكەكتە اباي ەسكەرتكىشىنىڭ اشىلۋ راسىمىنە قاتىستى

قاسىم-جومارت توقاەۆ پەن سادىر جاپاروۆ قىرعىزستان استاناسىنداعى «تەاتر» گۇلزارىنىڭ ورتالىق اللەياسىنا قويىلعان ۇلى اباي ەسكەرتكىشىنىڭ اشىلۋ سالتاناتىنا قاتىستى، دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.

Egemen Qazaqstan

مەملەكەت باسشىسى بۇل كۇندى قازاق پەن قىرعىزدىڭ رۋحاني ومىرىندەگى ەرەكشە كۇن رەتىندە باعالاپ، بىشكەك تورىندە اباي ەسكەرتكىشىنىڭ بوي كوتەرۋىن قىرعىز ەلىنىڭ قازاق حالقىنا دەگەن ايرىقشا قۇرمەتىنىڭ بەلگىسى دەپ اتاپ ءوتتى.

قاسىم-جومارت توقاەۆ وسى يگى باستاماعا قولداۋ كورسەتكەنى ءۇشىن سادىر جاپاروۆقا زور ريزاشىلىعىن ءبىلدىرىپ، بۇل قادام الاتاۋدىڭ بوكتەرىن قاتار جايلاعان ەكى ەلدىڭ باۋىرلاستىعىن بەكەمدەي تۇسەتىنىن ايتتى.

«اعايىن ەلدەردىڭ تامىرلاستىعىن كەزىندە اباي دا ايتقان. ۇلى اقىن قازاقتىڭ تاريحىنا توقتالعان كەزدە قىرعىز باۋىرلاردى ەرەكشە اتاپ وتكەن. ول «ەش قازاق قىرعىز بەن قازاقتىڭ ءبىر تۇقىمداس ەكەنىنە تالاسپايدى» دەگەن. شىن مانىندە، ەكى ۇلتتىڭ تەگى مەن ءتىلى ءبىر، جۇرەگى مەن تىلەگى ءبىر. ايىر قالپاقتى اعايىنعا ءبىزدىڭ ىقىلاسىمىز قاشاندا ەرەكشە. كوپ ۇزاماي ەلىمىزدە ماناس ەسكەرتكىشى بوي كوتەرەدى. بۇل ەسىم قازاق اراسىندا وتە تانىمال. ايگىلى ماناسقا قۇرمەتىمىز ەرەكشە. ماناستانۋ عىلىمىنىڭ نەگىزىن قالاعان شوقان ءۋاليحانوۆ ەكەنىن ەسكە سالعىم كەلەدى. «ماناس» جىرىنىڭ تاعدىرى تارتىسقا تۇسكەن كەزدە وعان مۇحتار اۋەزوۆ اراشا تۇسكەنىن بىلەمىز»، دەدى قازاقستان پرەزيدەنتى.

قاسىم-جومارت توقاەۆ وسىنىڭ ءبارىن ءبىر-بىرىمىزگە دەگەن جاناشىرلىق پەن تىلەكتەستىكتىڭ كورىنىسى دەپ اتاپ ءوتىپ، ەكى ەلدىڭ باۋىرلاستىعى مەن دوستىعى ەشقاشان مىزعىمايتىنىنا سەنىم ءبىلدىردى. سونداي-اق قىرعىز حالقىنا باق-بەرەكە تىلەدى.

سادىر جاپاروۆ سويلەگەن سوزىندە وسى كۇندى قىرعىز-قازاق ءۇشىن ماڭىزدى كۇن دەپ اتاپ ءوتتى.

«فيلوسوف، گۋمانيست تۇلعا، قازاقتىڭ ۇلى اقىنى ابايعا بىشكەك قالاسىندا قويىلعان ەسكەرتكىشتىڭ اشىلۋىمەن بارشاڭىزدى قۇتتىقتايمىن. ەكى ەلگە ورتاق تۇلعاعا ديپلوماتيامىزدىڭ 30 جىلدىعى قارساڭىندا قۇرمەت كورسەتىلىپ وتىرعانى – ەرەكشە وقيعا. جازدا جايلاۋى، قىستا قىستاۋى قوڭسى قونعان ەكى حالىقتىڭ رۋحاني الەمىنىڭ جاقىندىعىن اباي مەن توقتوعۇلدىڭ، مۇحتار مەن شىڭعىستىڭ مۇرالارى كورسەتىپ كەلەدى. ابايدىڭ 175 جىلدىعى كەزىندە ۇلتتىق كىتاپحانادان ارنايى مادەني بۇرىش اشىلعانىن دا ەسكە سالعىم كەلەدى. ءبىزدىڭ باۋىرلاس قازاق حالقىمەن دوستىعىمىز بارلىق سالادا دامي بەرەتىنىنە سەنەمىن»، دەدى قىرعىزستان پرەزيدەنتى.