بۇل تۋرالى قر ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ توراعاسى ارمان ابەنوۆ ءمالىم ەتتى.
«بۇگىندە ءبىز بىرلەسكەن كۇش-جىگەرىمىزبەن ءونىمنىڭ تولىققاندى ورتاق نارىعىن قۇردىق. تەحنيكالىق رەگلامەنتتەگى مىندەتتى نورمالار مەن ستاندارتتاردى ەرىكتى تۇردە قولدانا وتىرىپ ءونىمنىڭ قاۋىپسىزدىگىن قامتاماسىز ەتەمىز. سول سەكىلدى تاۋارلاردىڭ ەاەو نارىعىندا ەركىن قوزعالىسىنىڭ نەگىزگى شارتتارىن تولىق ورىنداپ وتىرمىز. تالداۋ ناتيجەسى كورسەتكەندەي, قازاقستاندا ەۋرازيا ەكونوميكالىق وداق ەلدەرىنە ەكسپورتتالاتىن تاۋارلاردىڭ تۇراقتى ءوسۋى بايقالادى. نازارلارىڭىزعا سوڭعى 5 جىلعى ستاتيستيكانى ۇسىنامىن. ەگەر 2017 جىلى ءبىزدىڭ ەلدەن 809 تاۋار ءتۇرى ەكسپورتقا شىعارىلسا, وتكەن جىلى اتالعان كورسەتكىش 837 تاۋار تۇرىنە ارتتى», دەدى ارمان ابەنوۆ بىشكەكتە ءوتىپ جاتقان ەۋرازيا ەكونوميكالىق فورۋمىندا.
ونىڭ ايتۋىنشا, ەلىمىزدەن ەاەو-عا نەگىزىنەن تاماق, ەت-ءسۇت, ماشينا جاساۋ ونىمدەرى مەن تاعى سول سياقتى تاۋارلار ەكسپورتتالادى.
«سونداي-اق وداققا مۇشە ەلدەر اراسىندا تاۋار اينالىمىنىڭ تۇراقتى ءوسۋى بايقالادى. ياعني 2017 جىلى كورسەتكىش 407 بولسا, 2021 جىلدىڭ سوڭىنا قاراي 446-عا جەتكەن. وداق قۇرىلعالى الەمدىك ەكونوميكانىڭ جاھاندىق سىن-قاتەرىنە جاۋاپ بەرەتىن ينتەگراتسيالىق بىرلەستىكتىڭ ءتيىمدى جۇمىسى كورىنىس تاپتى. قازىرگى ۋاقىتتا ءوزارا جەتكىزىلەتىن ءونىمنىڭ 85%-عا جۋىعى بىرىڭعاي رەتتەۋگە جاتادى. ول دەگەنىمىز - وداق نارىعىندا تاۋار اينالىمى ءۇشىن بىرىڭعاي تالاپتار مەن قاعيدالار قولدانىلادى دەگەن ءسوز», دەيدى ول.
