ەلىمىز قىسقى سپورت تۇرلەرىنەن قارجى اياعان ەمەس. بىراق العا باسۋ دەگەن مۇلدەم بايقالمايدى. قازاقستانداعى قىسقى سپورت تۇرلەرى بويىنشا جالعىز سپورت مەكتەپ-ينتەرناتىندا بولعانىمىزدا, وسى ماسەلە مازالاعان ەدى.
پاندەمياعا بايلانىستى قىسقى سپورت تۇرلەرىنەن سپورتشىلار دايىندايتىن ريددەردەگى سپورت مەكتەبىنە اياق باسپاعالى ەكى جىل وتە شىعىپتى. جان-جاعىن قاراعاي, شىرشا, قايىڭ اعاشتارى قورشاعان مەكتەپ-ينتەرنات ورنالاسقان جەردىڭ تابيعاتى عاجاپ. وقۋشىلاردىڭ الاڭسىز جاتتىعۋىنا بارلىق جاعداي جاسالعان. مۇندا شاكىرتتەرگە بەس مەزگىل تاعام بەرىلەدى. قۇنارلى دارۋمەندى قوسپالار ءوز الدىنا. وقۋ ورنىنىڭ ماقساتى – ەلىمىزدىڭ قۇراما كومانداسىنا كانديداتتار دايىنداۋ, قازاق ەلى سپورتشىلارىنىڭ باسەكەگە قابىلەتتىگىن ارتتىرۋ.
اتالعان وقۋ ورنىنىڭ باسشىسى كيكبوكستان الەمنىڭ بەس دۇركىن چەمپيونى, مەملەكەتتىك قىزمەتتە شىڭدالعان قازاقستاننىڭ ەڭبەك سىڭىرگەن جاتتىقتىرۋشىسى اسقار موجانوۆ ەكەنىن ايتا كەتەيىك. ول الدىمەن ءبىزدى اۋماعى ونداعان گەكتار جەردى الىپ جاتقان وقۋ ورنىنىڭ جوسپارلارىمەن تانىستىردى. «وكىنىشكە قاراي, 2018 جىلى باستالىپ, ەكى جىلدان كەيىن پايدالانۋعا بەرىلەدى دەپ بەلگىلەنگەن جاڭا وقۋ كورپۋسىنىڭ قۇرىلىسى اياقسىز قالدى. سەبەبى كەزىندە قۇرىلىسقا جاۋاپتى ەكى ادام مەملەكەتتىڭ ميلليونداعان تەڭگەسىن قۇلقىندارىنان وتكىزىپ جىبەرگەن. كىنالىلەر جازاسىن العانىمەن, امال بار ما, شاكىرتتەرگە قولايسىز جاعداي تۋعىزدى. بۇرىنعى بەس قاباتتى كورپۋستا سىعىلىسىپ ساباقتارىن وقيدى, اشىق اسپان استىندا جاتتىعادى. بۇعان شىداۋدان باسقا امال جوق. ەگەر مادەنيەت جانە سپورت مينيسترلىگىنىڭ باسشىلارى قارجى كوزىن تاۋىپ, قۇرىلىستى اياقتاۋعا قولعابىس جاساسا, العىستان باسقا ايتارىمىز جوق», دەيدى اسقار بايجىگىت ۇلى.
قىسقى سپورت تۇرلەرىنەن كەتىپ جۇرگەن ەسەمىزدى قايتارامىز دەسەك, ەرتەڭ ەل نامىسىن ابىرويمەن قورعايتىن بالعىن سپورتشىلاردى دايىنداۋ ماسەلەسىنە باسا ءمان بەرۋىمىز اسا كەرەك-اق!
وڭداسىن ەلۋباي,
قازاقستاننىڭ قۇرمەتتى سپورت قىزمەتكەرى
شىعىس قازاقستان وبلىسى,
ريددەر قالاسى
