ءىس-شارا ەكولوگيالىق ماسەلەلەر, كومىرتەگى بەيتاراپتىعى ءھام ەكولوگيالىق باستامالارعا بايلانىستى حالىقتىڭ حاباردار بولۋ دەڭگەيىن ارتتىرۋ ماقساتىندا ۇيىمداستىرىلىپ وتىر.
بىرنەشە كەزەڭنەن تۇراتىن جوبا بارىسىندا وقۋشىلار مەن ستۋدەنتتەر ىرىكتەلىپ, ونلاين جانە وفلاين فورماتتاعى ترەنينگتەر, شەبەرلىك سىنىپتارى, پراكتيكۋمدارعا قاتىسادى. ترەنينگتەردى ەكولوگيا جانە قورشاعان ورتانى قورعاۋ تاقىرىبىنا ماماندانعان تاجىريبەلى ساراپشىلار, ۆولونتەرلەر, جاتتىقتىرۋشىلار جۇرگىزەدى. ايتا كەتەيىك, اتالعان باستامانى «شەلل قازاقستان» كومپانياسى جانە ازاماتتىق باستامالاردى قولداۋ ورتالىعىنىڭ EcoBatys باستاماسى شەڭبەرىندە QazaqGeography رەسپۋبليكالىق قوعامدىق بىرلەستىگى ىسكە اسىرىپ وتىر.
«بۇل جوبا ارقىلى جاستار اراسىندا ەكولوگيالىق ويلاۋدى, ەكولوگياعا قاتىستى بەلسەندى ازاماتتىق ۇستانىمدى قالىپتاستىرعىمىز كەلەدى. ءبىزدىڭ ماقساتىمىز – بولاشاقتا جەرگىلىكتى جانە جاھاندىق ەكولوگيالىق كۇن تارتىبىنە اسەر ەتە الاتىن ەكو-كوشباسشىلاردى تاربيەلەۋ», دەيدى جوبا جەتەكشىسى, «QazaqGeography» رقب وكىلى مادينا قيناياتوۆا.
جوبا جەتەكشىسىنىڭ ايتۋىنشا, ەلدەگى ەكولوگيانى جاقسارتۋ جۇمىسىن ەكو-ويلاۋدى دامىتۋدان باستاۋ كەرەك.
«بىلتىر قازاقستان 2060 جىلعا قاراي كومىرتەگى بەيتاراپتىعىنا قول جەتكىزۋ تۋرالى دوكترينانى قابىلدادى. كومىرتەكتىڭ بەيتاراپتىعى دەگەنىمىز نە؟ بۇل ونەركاسىپتىك كاسىپورىندار كومىرقىشقىل گازى شىعارىندىلارىن كومىرتەگى تەرىس جوبالاردى جۇزەگە اسىرۋ ارقىلى وتەۋى كەرەك دەگەندى بىلدىرەدى. الايدا بۇكىلالەمدىك انتيكومىرتەكتى ناۋقانداعى ەڭ ماڭىزدى نارسە – ەكولوگيانىڭ نەگىزگى ۇعىمدارى پريزماسى ارقىلى جاڭاشا ويلاۋدى ۇيرەنۋ», دەدى ول.
جوباعا قاتىسۋ ءۇشىن ۇمىتكەرلەر وبلىس تۇرعىندارىنىڭ ناقتى ماسەلەلەرىن اشىپ كورسەتىپ, سونداي-اق ولارمەن كۇرەسۋ جولدارى ۇسىنىلاتىن «مەنىڭ ايماعىمنىڭ ەكولوگيالىق پروبلەمالارى» اتتى ەسسە جازىپ جىبەرۋى قاجەت. «ەكو-حاكاتون» ءىس-شاراسى اياسىندا قاتىسۋشىلار ايماقتىڭ, بولاشاقتا بۇكىل ەلدىڭ ەكولوگيالىق كۇن تارتىبىنە اسەر ەتە الاتىن ەكو-يدەيالارىن ۇسىنا الادى.
ۇيىمداستىرۋشىلار EcoVision پيلوتتىق جوبا ەكەنىن, بولاشاقتا ونى قازاقستاننىڭ باسقا ايماقتارىنا دا تاراتۋعا بولاتىنىن اتاپ ءوتتى.
