تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين بۇگىن ق.جۇبانوۆ اتىنداعى اقتوبە وڭىرلىك ۋنيۆەرسيتەتىندە بولدى. ول ۋنيۆەرسيتەت جانىنداعى تەحنوپاركتىڭ قىزمەتىمەن تانىسىپ, ءوڭىردىڭ IT قاۋىمداستىعىمەن جانە ستۋدەنتتەرمەن كەزدەسۋ وتكىزدى. كەزدەسۋ بارىسىندا مينيسترلىك, ۆەدومستۆوعا قاراستى ۇيىمدار, ۋنيۆەرسيتەت جانە ءوڭىر اراسىنداعى ءوزارا ءىس-قيمىل ماسەلەلەرى تالقىلاندى.
«IT سالاسى – جۇبانوۆ ۋنيۆەرسيتەتىنىڭ دامۋ ستراتەگياسىنىڭ باسىم باعىتتارىنىڭ ءبىرى. باتىس ءوڭىردىڭ IT ورتالىعىنا اينالۋعا بارلىق مۇمكىندىگىمىز بار. وقۋ ورنى IT مامانداردى 1999 جىلدان باستاپ دايارلاپ كەلەدى. بيىل 285 مامان وقۋ بىتىرەدى. عىلىمي جۇمىستار مەن ستۋدەنتتىك ستارتاپ جوبالار جولعا قويىلعان. ءبىز IT سالاسىنداعى وڭىرلىك حابقا اينالۋعا, جاستار ءۇشىن كرەاتيۆتى كەڭىستىك ۇسىنۋعا دايىنبىز», دەپ اتاپ ءوتتى ق.جۇبانوۆ اتىنداعى ارۋ رەكتورى لاۋرا قاراباسوۆا.
ناتيجەسىندە Astana Hub حالىقارالىق IT-ستارتاپتار تەحنوپاركىنىڭ قىزمەتىن ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ اۋماعىندا كەڭەيتۋ بويىنشا كەلىسىمگە قول جەتكىزىلدى. Astana Hub تەحنوپاركىنىڭ باسقارۋشى ديرەكتورى اباي ابسامەت پەن جۇبانوۆ ۋنيۆەرسيتەتىنىڭ رەكتورى ءوزارا ىنتىماقتاستىق تۋرالى مەموراندۋمعا قول قويدى. وسىلايشا, ق.جۇبانوۆ اتىنداعى اقتوبە وڭىرلىك ۋنيۆەرسيتەتىندە تەحنولوگيالىق كاسىپكەرلىكتى دارىپتەۋگە باعىتتالعان ءتۇرلى ءىس-شارالاردى وتكىزۋگە, Astana Hub ءبىلىم بەرۋ باعدارلامالارىن قولدانۋعا جانە قوردىڭ ينكۋباتسيالىق جانە اكسەلەراتسيالىق باعدارلامالارىنا قاتىسۋعا جول اشىلدى.
