قوعام • 24 مامىر، 2022

وتكەن جىلى ەلىمىزدە 446 مىڭ ءسابي دۇنيەگە كەلگەن

28 رەت كورسەتىلدى

كوروناۆيرۋس ورشىگەن 2020 جىلدان باستاپ قازاقستاندا بالا تۋ كورسەتكىشى ارتقان، دەپ حابارلايدى Egemen.kz Energyprom پورتالىنا سىلتەمە جاساپ.

قازاقستانداعى بەبي-بۋم 2020 جىلى باستالدى. سول كەزدە ەلىمىزدە 426،8 مىڭ بالا دۇنيەگە كەلگەن ەدى. دەگەنمەن 2021 جىلى بۇل رەكورد بۇزىلىپ، دۇنيەگە كەلگەن سابيلەر سانى ءبىر جىل بۇرىنعى كورسەتكىشتەن - 4،6 پايىزعا، ال 2019 جىلعى كورسەتكىشتەن - 11 پايىزعا ارتىق. 446،5 مىڭ بالا دۇنيە ەسىگىن اشتى.

وسى جىلدىڭ ءۇش ايىندا عانا رەسپۋبليكادا 95،6 مىڭ بالانىڭ تۋ تۋرالى كۋالىگى تىركەلدى. دەمەك، وسىدان ەكى جىل بۇرىن باستالعان بەبي-بۋم جالعاسىپ جاتىر دەگەن ءسوز. 2021 جىلى تۋ كوەففيتسيەنتى دە جاڭا رەكورد ورناتتى: 10 مىڭ تۇرعىنعا شاققاندا 235 ءسابي دۇنيەگە كەلگەن. 

سالىستىرمالى تۇردە ايتار بولساق، وسىدان 20 جىل بۇرىن 10 مىڭ تۇرعىنعا ەسەپتەگەندە تۋ كورسەتكىشى 149 ءسابي بولاتىن. مۇنىڭ ۇستىنە تۋدىڭ جيىنتىق كوەففيتسيەنتى 3،32-گە جەتتى. ياعني، ءبىر ايەلگە 3-تەن كوپ بالادان كەلەدى. مۇنداي رەكورد ەلىمىزدە تەك سوڭعى 2 جىلدا تىركەلىپ وتىر. بۇل كوەففيتسيەنت 1999 جىلى نەبارى 1،8 بولاتىن. ءبىر قىزىعى، 2021 جىلى 125،1 مىڭ بالا كوپبالالى وتباسىندا دۇنيەگە كەلگەن.

ال ەلىمىزدە 4 جانە ودان دا كوپ بالاسى بار وتباسى كوپبالالى دەپ سانالادى. سونىمەن قاتار دۇنيە ەسىگىن اشقان 95 مىڭ ءسابي 10-شى نە ودان كەيىنگى بالا سانالادى.

 

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار