سەزد جۇمىسىنا رەسپۋبليكانىڭ 17 وڭىرىنەن دەلەگاتتار, زيالى قاۋىم وكىلدەرى, ارداگەرلەر قاتىستى. سەزد جۇمىسىن جۇرگىزگەن «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ توراعاسى باقتىقوجا ىزمۇحامبەتوۆ اتا زاڭنىڭ جاڭا جوباسىنداعى باستى ماڭىزدى وزگەرىستەرگە جەكە-جەكە توقتالدى. اتاپ ايتقاندا, سەنات پەن ءماجىلىس دەپۋتاتتارىن سايلاۋدىڭ جاڭا ءتارتىبى, ءماجىلىس سايلاۋىنا ارالاس سايلاۋ جۇيەسى, ءبىر مانداتتى اۋماقتىق سايلاۋ وكرۋگى بويىنشا سايلانعان ءماجىلىس دەپۋتاتتارىن سايلاۋشىلاردىڭ كەرى قايتارىپ الۋ, سەناتتىڭ ءماجىلىس قابىلداعان زاڭدى ماقۇلداۋ نەمەسە ماقۇلداماۋ قۇقىعى, جەرگىلىكتى مەملەكەتتىك باسقارۋ جانە ءوزىن ءوزى باسقارۋ كەپىلدىكتەرىنىڭ كۇشەيتىلۋى, ءولىم جازاسىنىڭ جويىلۋى, ادام قۇقىقتارى جونىندەگى ۋاكىلدىڭ كونستيتۋتسيالىق مارتەبەسىنىڭ كۇشەيتۋ تۋرالى ماسەلەلەر ەنگەنىن اتاپ ءوتتى.
«كونستيتۋتسيانى جالپىحالىقتىق داۋىس بەرۋ ارقىلى وزگەرتۋ – «حالىق ۇنىنە قۇلاق اساتىن مەملەكەت» تۇجىرىمداماسىن تابىستى جۇزەگە اسىرۋعا جول اشادى. پارلامەنتتىڭ ءرولى كۇشەيتىلمەك, حالىقتىڭ سەنىم مانداتىنا يە بولعان دەپۋتاتتارعا جوعارى جاۋاپكەرشىلىك جۇكتەلەدى. ۇلتتىق قوعامدىق سەنىم كەڭەسىنىڭ ورنىنا ۇلتتىق قۇرىلتاي قۇرىلادى. قۇرىلتاي ەلىمىزدى دامىتۋدىڭ وزەكتى ماسەلەلەرىن تالقىلاۋ ءۇشىن بيلىك پەن حالىقتىڭ اراسىنداعى دانەكەر بولادى. ونىڭ قۇرامىنا ەلىمىزدەگى بارلىق ايماقتىڭ ءتۇرلى سالا وكىلدەرى مۇشە بولادى. «مەملەكەتتىك بيلىكتىڭ بىردەن-ءبىر قاينار كوزى – حالىق» دەگەن ءپرينتسيپتىڭ ءىس جۇزىندە ورىندالۋىنىڭ ايعاعى. رەفەرەندۋم مەملەكەتتىڭ ناقتى وزگەرىستەرگە بەت بۇرعانىن كورسەتەدى», دەدى ب.ىزمۇحامبەتوۆ.
سونىمەن قاتار ول مەملەكەت باسشىسى قاسىم-جومارت توقاەۆتىڭ قابىلداۋىندا بولىپ, ارداگەرلەرگە پرەزيدەنتتىڭ ءسوزىن جەتكىزدى. «وتە جىلى قابىلداۋ بولدى. پرەزيدەنتكە ارداگەرلەردىڭ جۇمىسى تۋرالى ايتتىم. رەفەرەندۋم بويىنشا ەكى باعىتتا جۇمىس ىستەپ جاتقانىمىزدى, ءبىرىنشى – كونستيتۋتسياعا وزگەرىس ەنگىزۋدىڭ ماڭىزدىلىعى تۋرالى, ەكىنشى – ارداگەرلەر تۇرعىندارعا رەفەرەندۋمنىڭ ءمانىن ءتۇسىندىرىپ, قاتىسۋعا بەلسەندىلىك تانىتۋعا شاقىرىپ جۇمىس ىستەپ جاتقانىمىز تۋرالى باياندادىم. اڭگىمە بارىسىندا بىرنەشە ۇسىنىسىمدى جەتكىزىپ, ول بويىنشا مەملەكەتتىك ورگاندارعا تاپسىرما بەرەتىنىن ايتتى. پرەزيدەنت ءوز تاراپىنان قوعامدىق جۇمىستاردا ەل ارداگەرلەرىنىڭ بەلسەندىلىك كۇتەتىنىن ايتتى», دەدى بىرلەستىك توراعاسى.
ءوز كەزەگىندە قازاقستاننىڭ ەڭبەك سىڭىرگەن قايراتكەرى, سەناتورلار كەڭەسىنىڭ مۇشەسى جابال ەرعاليەۆ قازاقستاندىق قوعامنىڭ ساياسي الاڭىندا قىزۋ ويىن ءجۇرىپ جاتقانىن العا تارتتى. «قوعام بەلسەندىلىگىنىڭ وسە تۇسۋىنە جىل باسىنداعى قاڭتار وقيعاسى اسەر ەتكەنى داۋسىز. ەل تاعدىرى, تاۋەلسىزدىك تاعدىرى سىنعا تۇسكەن كەزدە مەملەكەت باسشىسى ق.توقاەۆ الدىڭعى ساپتا بولىپ, قازاقستاننىڭ تاۋەلسىزدىگىن ساقتاپ قالدىق. وتىز جىل بويعى قولامتانى اقتارىپ جاتقانىمىز دا تەگىن ەمەس. نەگە بار بايلىعىمىز ساناۋلى ادامداردىڭ قولىنا ءتۇستى؟ حالىقتىڭ سۇراۋى دا, تالاپ قويۋى دا ورىندى. جان القىمعا تاقالىپ, كەدەيشىلىك پەن جوقشىلىق تيتىقتاتۋعا اينالعان حالىق الاڭعا شىعۋعا ءماجبۇر بولدى. پرەزيدەنت قاسىم-جومارت توقاەۆ ادىلەتتى قوعام ورناتۋ يدەياسىن ورتاعا تاستادى. رەفەرەندۋمدى ءوز باسىم حالىقپەن كەلىسىپ شەشۋ دەپ بىلەمىن. پرەزيدەنتىمىزدى, ونىڭ جۇرگىزىپ وتىرعان ساياساتىن قولدايىق! سىن ساعاتتا تۇرعانىمىزدى ۇمىتپايىق!», دەدى ارداگەر.
ءىس-شاراعا ونلاين قوسىلعان وڭىرلەردەگى ارداگەرلەر دە پىكىرلەرىن ايتىپ, ساياسي ناۋقانعا قولداۋ ءبىلدىردى. «اعا بۋىن پرەزيدەنتتىڭ ەلىمىزدى جايلاعان سىبايلاس جەمقورلىققا قارسى باعىتتالعان باتىل شارالارىن ۇلكەن ريزاشىلىقپەن قابىلداپ جاتىر.
قىزىلوردا وبلىسى ارداگەرلەرىنىڭ اتىنان ءسوز تىزگىنىن العان وڭىرلىك كەڭەس توراعاسى س.دۇيسەنباەۆ كونستيتۋتسيا بويىنشا حالىق كوكەيىندە جۇرگەن كوپ ماسەلەنىڭ كۇن تارتىبىنە شىققانىن اتاپ ءوتتى. «سۋپەرپرەزيدەنتتىك باسقارۋ ۇلگىسىنەن پرەزيدەنتتىك رەسپۋبليكاعا كوشۋ ءوز شەشىمىن تاباتىن بولدى. ەندى ەلدى باسقارۋ ىسىنە حالىقتىڭ قاتىسۋ مۇمكىندىگىن كەڭەيەدى. دەپۋتاتتار سايلاۋىنداعى وزگەرىستەر دە حالىق پەن وكىلەتتى ورگاننىڭ اراسىنداعى بايلانىستى, سونىڭ ىشىندە كەرى بايلانىستى كۇشەيتپەك», دەدى ول. ارداگەر سوزىندە ازاماتتاردىڭ قۇقىقتارىن قورعاۋ تاسىلدەرىن جەتىلدىرۋ دە, كونستيتۋتسيالىق سوت قۇرۋ جانە كونستيتۋتسيالىق باقىلاۋ جاساۋ ينستيتۋتىن جاڭارتۋ جايىندا دا وي-پىكىرىن ورتاعا سالدى.
سەزد سوڭىندا ارداگەرلەر ەلدىڭ ءاربىر ازاماتى كونستيتۋتسياعا وزگەرىستەر ەنگىزۋ تۋرالى ءوز پىكىرىن بىلدىرۋگە قۇقىلى ەكەنىن ايتىپ, قازاقستان حالقىن بۇكىلحالىقتىق رەفەرەندۋمدى قولداۋعا شاقىرعان ۇندەۋىن جاريالادى. سونىمەن قاتار «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ جاڭادان قۇرىلعان اباي, جەتىسۋ, ۇلىتاۋ وبلىستارىندا فيليالدارى قۇرىلاتىن بولدى. بۇگىندە ارداگەرلەردىڭ ورتالىق كەڭەسىندە جانە بارلىق 17 وڭىردەگى فيليال توراعالارىنىڭ ۇيىمداستىرۋىمەن رەفەرەندۋمدى قوعامدىق قولداۋ شتابتارى قۇرىلىپ, جۇمىس ىستەۋدە. توپقا جەرگىلىكتى وڭىرگە تانىمال, مەملەكەت جانە قوعام قايراتكەرلەرى, ەلگە سىيلى ارداگەرلەر جۇمىلدىرىلدى. ولار كونستيتۋتسيالىق رەفورمالاردىڭ نەگىزگى ەرەجەلەرىن تۇرعىندارعا كەڭىنەن ءتۇسىندىرۋدى قولعا العان.
