قوعام • 21 مامىر، 2022

الماتىدا قازاقستان تەمىر جولى 73 جاڭا ۆاگونمەن تولىعادى

قازاقستان تەمىر جولى كومپانياسى جازعى ماۋسىمداعى جولاۋشىلار تاسىمالىنا قىزۋ دايىندالىپ جاتىر. بارلىق ۆاگوندارعا سالقىنداتقىش ورناتىلىپ، تۇراقتى تۇردە تەحنيكالىق قىزمەت كورسەتىلىپ تۇرادى، دەپ حابارلايدى Egemen.kz «حابار 24»-كە سىلتەمە جاساپ.

Egemen Qazaqstan

قازاقستان تەمىر جولىنىڭ وتاندىق ءتۋريزمدى دامىتۋداعى ۇلەسى وراسان زور. وسى جازدا 158 جولاۋشىلار پوەزى جولعا شىعادى. ونىڭ ىشىندە، 107 باعىت «جولاۋشىلار تاسىمالى» اكتسيونەرلىك قوعامىنىڭ، 30 باعىت جەكە تاسىمالداۋشىلاردىڭ ۇلەسىندە. وعان قوسا 21 ترانزيتتىك پوەزد قاتىنايدى.

ء«بىز جازعى ماۋسىمدا 158 باعىتتا، باسقا ۋاقىتتا 122 باعىتتا جولاۋشى تاسىمالدايمىز. پاركتى جاڭارتۋ جۇمىستارى كوبىنەسە مەملەكەتتىك قولداۋمەن جۇزەگە اسىرىلادى. ويتكەنى الەۋمەتتىك باعىتتار ۇكىمەت تاراپىنان قارجىلاندىرىلادى. سوندىقتان شىعىننىڭ ءبىر بولىگىن مەملەكەت ەسەبىنەن، قالعان بولىگىن تەمىرجول تاسىمالىنان تۇسكەن تابىسپەن جابامىز»، دەدى «جولاۋشىلار تاسىمالى» اق باس ديرەكتورى جانىبەك تايجانوۆ

2019 جىلى ىسكە قوسىلعان «موبيۋس» ەدەكتروندى جۇيەسى جولاۋشىلاردىڭ ۋاقىتىن كادىمگىدەي ۇنەمدەيدى. وعان قوسا بيلەتتى الىپ-ساتارلاردىڭ ارەكەتىن شەكتەيدى. ءار بيلەت جەكە سايكەستەندىرۋ نومەرى مەن سمس كود ارقىلى تەكسەرىلەدى. بۇدان باسقا قازاقستان تەمىر جولىنىڭ 156 رەسمي كاسساسى، 3 مىڭ اگەنتتىك جانە 15 سايت جۇمىس ىستەيدى.

«وتكەن جىلدىڭ العاشقى 5 ايىندا ونلاين بيلەت ساتىلىمىنىڭ ۇلەسى 56% بولسا، بيىلعى كورسەتكىش 70%-تەن استى. بۇل ەلەكتروندى بيلەت ساتىلىمىنىڭ ءتيىمدى ەكەنىن كورسەتەدى. «موبيۋس» جۇيەسىنىڭ باستى ماقساتتارىنىڭ ءبىرى – بيلەتتەردى زاڭسىز الىپ-ساتارلاردىڭ جولىن كەسۋ»، دەپ ءتۇسىندىردى «جولاۋشىلار تاسىمالى» اق دەپارتامەنتىنىڭ ديرەكتورى ەرلان جيمايلوۆ.

جولاۋشىلار تاسىمالىنداعى سانيتارلىق تالاپ تا كۇشەيگەن. مىسالى ساپالى ماتا مەن تازا ماقتادان جاسالعان توسەك-ورىن سۋ وتكىزبەيدى، وتقا ءتوزىمدى. «جولاۋشىلار تاسىمالى» اكتسيونەرلىك قوعامى بيىل تاعى 73 ۆاگون ساتىپ الۋدى جوسپارلاپ وتىر.

ايانا توعانبەك

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز