ەلوردا • 21 مامىر، 2022

ەلوردالىق جوو-دا كونستيتۋتسيالىق تۇزەتۋلەر مەن الداعى رەفەرەندۋم تالقىلاندى

27 رەت كورسەتىلدى

نۇر-سۇلتاندا قازاقستان رەسپۋبليكاسى جوعارى وقۋ ورىندارى قاۋىمداستىعىنىڭ وكىلدەرى مەن ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورلىق-وقىتۋشىلىق قۇرامى كونستيتۋتسيالىق رەفورمالاردى تالقىلاۋ بويىنشا كەزدەسۋ وتكىزدى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

جيىنعا ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەك ۇلى، «تۇران-استانا» ۋنيۆەرسيتەتىنىڭ رەكتورى، نۇر-سۇلتان قالاسى ءماسليحاتىنىڭ دەپۋتاتى گۇلجامال جاپاروۆا، «استانا مەديتسينا ۋنيۆەرسيتەتىنىڭ» پرورەكتورى جانار بوكەەۆا، ەۋرازيا گۋمانيتارلىق ينستيتۋتى رەكتورىنىڭ م.ا. امانگەلدى يسمايىلوۆ، ل.ن. گۋميلەۆ اتىنداعى ەۇۋ قۇقىق تەورياسى مەن تاريحى، كونستيتۋتسيالىق قۇقىق كافەدراسىنىڭ پروفەسسورى، استانا مەديتسينا ۋنيۆەرسيتەتىنىڭ مەديتسينالىق قۇقىق جانە ەتيكا كافەدراسىنىڭ پروفەسسورى جامالادەن يبراگيموۆ جانە ەۇۋ جاراتىلىستانۋ عىلىمدارى فاكۋلتەتىنىڭ وقىتۋشىلارى قاتىستى. كەزدەسۋگە قاتىسۋشىلار كونستيتۋتسيانىڭ ەل دامۋىنداعى ءرولىن، سول سياقتى «جاڭا قازاقستاندى» قۇرۋداعى كونستيتۋتسيالىق رەفورمانىڭ ماڭىزدىلىعىن اتاپ ءوتىپ، ءوزىنىڭ بەلسەندى ازاماتتىق ۇستانىمىن ءبىلدىردى.

ف

«29 ساۋىردە مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ XXXI سەسسياسىندا سويلەگەن سوزىندە كونستيتۋتسياعا تۇزەتۋلەر ەنگىزۋ جونىندە رەفەرەندۋم وتكىزۋدى ۇسىندى. پرەزيدەنت قازاقستانداعى رەفەرەندۋم سوڭعى رەت 1995 جىلى، قولدانىستاعى كونستيتۋتسيا بەكىتىلگەن كەزدە وتكەنىن اتاپ ءوتتى. وتىرىسقا قاتىسۋشىلار جاڭا قازاقستاندى قۇرۋداعى رەفەرەندۋمنىڭ نەگىزگى ءرولىن تالقىلادى، سونداي-اق داۋىس بەرۋ قورىتىندىلارى ەلدەگى قوعامدىق-ساياسي جاعدايعا قالاي اسەر ەتەتىنىنە تالداۋ جاسادى»، دەپ اتاپ ءوتتى «تۇران-استانا» ۋنيۆەرسيتەتىنىڭ رەكتورى، نۇر-سۇلتان قالاسى ءماسليحاتىنىڭ دەپۋتاتى گۇلجامال جاپاروۆا.

ءوز كەزەگىندە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇقىق تەورياسى مەن تاريحى، كونستيتۋتسيالىق قۇقىق كافەدراسىنىڭ پروفەسسورى، استانا مەديتسينا ۋنيۆەرسيتەتىنىڭ مەديتسينالىق قۇقىق جانە ەتيكا كافەدراسىنىڭ پروفەسسورى جامالادەن يبراگيموۆ كونستيتۋتسيالىق تۇزەتۋلەر جايلى ايتىپ ءوتتى.

ف

«مەملەكەت باسشىسى «جاڭا قازاقستان – ادىلەتتى قازاقستان» ەكەنىن بىرنەشە رەت اتاپ ءوتتى. ال ادىلەتتىلىككە ازاماتتاردىڭ قۇقىقتارى جان-جاقتى ساقتالعان جانە قورعالعان جاعدايدا عانا قول جەتكىزىلەدى. ادام قۇقىقتارىن قورعاۋ ينستيتۋتتارىنىڭ ءرولىن ارتتىرۋ ءۇشىن كونستيتۋتسياعا ادام قۇقىقتارى جونىندەگى ۋاكىل تۋرالى دەربەس باپ (83-1-باپ) ەنگىزىلەدى. رەفورمالار باس پروكۋراتۋرانىڭ وكىلەتتىگىن كەڭەيتىپ، ءرولىن كۇشەيتەدى. سۋديا لاۋازىمىنا ارنالعان كونكۋرستىڭ ونلاين-ترانسلياتسيا پراكتيكاسىن ەنگىزۋ، سونداي-اق ونىڭ قورىتىندىلارى بويىنشا ەگجەي-تەگجەيلى، دالەلدى تۇسىندىرمەلەردى جاريالاۋ ۇسىنىلادى»، دەدى پروفەسسور.

كەزدەسۋگە قاتىسۋشىلار مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ «ەل بىرلىگى – جاڭارعان قازاقستاننىڭ تىرەگى» ءحححى سەسسياسىندا ايتىلعان كونستيتۋتسياعا وزگەرىستەر مەن تولىقتىرۋلار ەنگىزۋ ءۇشىن رەسپۋبليكالىق رەفەرەندۋم وتكىزۋ تۋرالى ۇسىنىسىن ءبىراۋىزدان قولدادى.

ايتا كەتۋ كەرەك، قازاقستان رەسپۋبليكاسى جوعارى وقۋ ورىندارىنىڭ قاۋىمداستىعى – ەلىمىزدىڭ 81 اككرەديتتەلگەن جوعارى وقۋ ورنىن بىرىكتىرەتىن كوممەرتسيالىق ەمەس ۇيىم. وندا رەسپۋبليكانىڭ بارلىق ستۋدەنتتەرىنىڭ 86%-دان استامى وقيدى.

ۇيىمنىڭ ميسسياسى قازاقستاننىڭ، تمد ەلدەرىنىڭ سەرپىندى الەۋمەتتىك-ەكونوميكالىق دامۋىنا جانە الەمنىڭ دامىعان ەلدەرىنىڭ ءبىلىم دەڭگەيىنە جاۋاپ بەرەتىن ءبىلىم بەرۋ ساپاسىن ارتتىرۋ بولىپ سانالادى.

ايانا توعانبەك

سوڭعى جاڭالىقتار

ورال قوقىس استىندا قالۋى مۇمكىن

ايماقتار • بۇگىن، 16:47

دوللار قايتا قىمباتتادى

قارجى • بۇگىن، 15:58

ۇقساس جاڭالىقتار