قازاقستان • 20 مامىر، 2022

مۇنايدى كاسپي قۇبىرىنا بالاما جولدارمەن ەكسپورتتاي الامىز - اقشولاقوۆ

قر ەنەرگەتيكا ءمينيسترى بولات اقشولاقوۆ مۇناي تاسىمالى بويىنشا كاسپي قۇبىرىنا بالاما مارشرۋتتاردىڭ سىيىمدىلىعىن كەڭەيتۋ مۇمكىندىكتەرى قاراستىرىلىپ جاتقانىن حابارلادى، دەپ جازادى Egemen.kz.

بوتاكوز باقبەرگەن

«كاسپي قۇبىر كونسورتسيۋمى جايلى ايتاتىن بولساق، بۇل نەگىزگى ەكسپورتتىق مارشرۋت. نەگىزگى جوندەۋ جۇمىستارى اياقتالدى. سوڭعى ەڭ شەتكى ايلاق جوسپار بويىنشا ايدىڭ سوڭىنا دەيىن جوندەلەدى. نەگىزىندە، مارشرۋت شتاتتىق رەجيمدە 100 پايىزعا جۇمىس ىستەپ تۇر دەۋگە بولادى. بىزدە بالاما جولدار بار. بىراق كاسپي قۇبىرى سياقتى ۇلكەن كولەمدە ەمەس. ويتكەنى جىلىنا 54 ميلليون توننا مۇنايدى تاسىمالدايتىن بالاما جولدى ءبىر تۇندە تابۋ مۇمكىن ەمەس»، دەدى ۆەدومستۆو باسشىسى ەلوردا تۇرعىندارىمەن كەزدەسۋى كەزىندە.

ونىڭ ايتۋىنشا، مۇنداي كولەمدى ورنالاستىرۋ ءۇشىن كەم دەگەندە ءۇش جىل قاجەت.

ء«تىپتى قىتايعا جەتىزەتىن بالاما جولدىڭ قۋاتى 20 ملن توننا عانا. مۇمكىندىكتى كەڭەيتەمىز دەگەن كۇننىڭ وزىندە قىتاي سونشا كولەمدە مۇناي الۋعا دايىن با دەگەن ماسەلە بار. ول مارشرۋت بويىنشا جالعىز تۇتىنۋشى عانا بار – قىتاي. ولاردان باسقا ەشكىم تۇتىنا المايدى. باكۋ مارشرۋتىن بالاما رەتىندە قالىپتاستىرۋ ينفراقۇرىلىم تۇرعىسىنان وتە ۇزاق. اۋەلى پورتتى قالپىنا كەلتىرىپ، كەيىن كولەمىن ۇلعايتا باستاۋ كەرەك بولادى. ەكىنشى قۇرىق پورتىن ورناتىپ، مۇناي قۇبىرىن تارتۋ كەرەك. تانكەرلەر تابۋ قاجەت. كاسپيدىڭ تابانى تاياز بولعاندىقتان وندا كەز كەلگەن تانكەر جۇزە المايدى. تەك 12 مىڭ توننالىق تانكەرلەر عانا جۇزە الادى»، دەدى بولات اقشولاقوۆ.

ول باكۋ تاراپى قازاقستان تاسىمالدايتىن كولەمدەگى مۇنايدى قابىلداۋعا دايىن بولماۋى مۇمكىن ەكەنىن قوسا ايتتى.

«وسىنىڭ ءبارىن ەسكەرسەك بۇل ماسەلە وتە كۇردەلى. بىراق ءبىز بالاما نۇسقالاردى قولدانامىز. بۇگىندە مۇنايدىڭ ءبىر بولىگىن وسى بالاما جولدارعا جونەلتىپ جاتىرمىز. بۇل 16،5 ملن تونناداي بولادى. ارينە، ول 54 ملن توننا ەمەس. ءبىز باسقا باعىتتار بويىنشا جۇك تاسىمالدايمىز. سوندىقتان بۇل ماسەلەنى تۇبەگەيلى شەشپەيدى. بىراق ءبىز باسقا دا تاسىلدەرىن قاراپ جاتىرمىز»، دەدى مينيستر.

شارادان كەيىن باق وكىلدەرىنىڭ ساۋالىنا بەرگەن جاۋابىندا كاسپي قۇبىرىنا بالاما جول توسەۋدىڭ مۇمكىندىگى تۋرالى تۇسىنىكتەمە بەردى. ايتۋىنشا، باكۋ باعىتى بىرنەشە جىلدىڭ ىشىندە ينفراقۇرىلىم توسەۋگە بولادى. بىراق ونى رەزەرۆتە ۇستاپ تۇرۋدىڭ شىعىنى وراسان كوپ بولۋى مۇمكىن.

«قۇبىرعا قىزمەت ەتۋ شىعىندارى بولادى. مىسالى قۇبىر توسەپ، باسقا ەلدىڭ اۋماعىنا پورت سالىندى دەيىك. ول پورتتى جالداۋ اقىسىن مۇناي تاسىمالداساق تا، تاسىمالداماساق تا تودەۋ كەرەك بولادى. وسىنداي ءتۇرلى شىعىندار بار. قازىر سونىڭ ءبارىن زەردەلەپ جاتىرمىز»، دەدى ۆەدومستۆو باسشىسى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز