بۇل تۋرالى سەناتتاعى جاستاردى قولداۋ تاقىرىبىنا ارنالعان پارلامەنتتىك تىڭداۋدا پرەمەر-ءمينيستردىڭ ورىنباسارى ەرالى توعجانوۆ ايتتى.
«ەڭبەككە باۋلۋدىڭ ۇرپاق تاربيەسىندەگى ماڭىزى زور ەكەنى بەلگىلى. سوندىقتان جاڭا وقۋ جىلىندا 1-سىنىپتان باستاپ «ەڭبەككە باۋلۋ» ءپانى قايتا ەنگىزىلەدى. جوبا رەتىندە مەكتەپتەر جانىندا جىلىجايلار اشۋ قولعا الىنادى. بۇگىننىڭ وزىندە 7%-عا جۋىق مەكتەپتە بۇل تاجىريبە بار», دەدى ە. توعجانوۆ.
ونىڭ ايتۋىنشا, العاش رەت بيىلدان باستاپ مەكتەپتەردە 7-سىنىپتان باستاپ بولاشاق ماماندىقتى تاڭداۋعا باعىتتايتىن «پەداگوگ-كاسىپتىك باعدار بەرۋشى» مامانى ەنگىزىلەدى.
بۇدان بۇرىن حابارلانعانداي, سەنات توراعاسى م. اشىمباەۆ بارلىق رەفورمانىڭ تۇپكى ماقساتى دا جاستاردىڭ ءال-اۋقاتىن ارتتىرۋعا ءارى ولاردىڭ دامۋىنا جاعداي جاساۋعا ارنالعانىن اتاپ ءوتتى .
سونىمەن قاتار ول ۋنيۆەرسيتەت بىتىرگەن تۇلەكتەرگە ەڭبەك نارىعىندا سۇرانىس جوق ەكەنىن ايتتى.
ايانا توعانبەك
